JEREMIA 14:13 - BIBEL JAMITA NA DENGGAN

¹³ Dung i hudok ma, “O Tuhan Debata, diboto Ho do na dung didok angka panurirang tu rayat i bahaso na so adong giot ro porang sanga haleon, angke antong madung dijanjihon Ho, anggo di luat on sai na dumpang do hasonangan.”

JEREMIA 14:13 ပူးပေါင်းရင်းမြစ်များ

JESAYA 56:10

angke angka na mapitung do anggo pamimpin ni bangsongKu! Nada diboto halahi bagi aha. Songon anjing panjago na so martunggu do halahi, tapi na modom sajo do halahi.

JEREMIA 1:6

Hualusi ma, “O Tuhan Debata, nada malo au manghobari angke maposotu dope au.”

JEREMIA 20:6

Jana ho ale Pashur rap dohot isi ni bagasmu laing tangkuponna ma ho jana obanonna tu Babel. Disi ma ho mate jana ditanom; laing songon i ma sude donganmu na manangihon angka gabus na nipardokkonanmi.’ ”

JEREMIA 23:17

Tu angka halak na so ra manangihon hata na Hudok sai didokkon halahi do, ‘Malua do hamu.’ Jana tu ganop halak sijogal roha, didok halahi do, ‘Nada pola marmara ho.’ ”

JEREMIA 37:19

Di dia dehe angka panurirang ni raja i na mandok na so ro raja ni Babel manyerang raja i dohot luat on?

JEREMIA 4:10

Jadi hudok ma, “Tuhan Debata, madung dipaoto-oto Ho halak Jerusalem! Ho do mandok na giot adong ma dame, hape saonnari diondam podang do hosanami.”

JEREMIA 5:12

Madung mangalo bangso ni Tuhan maradopkon Tuhan i. Didok halahi, “Tole ma da, nada pola baenonNia bagi aha. Nada pola hona parmaraan hita jana nada pola songgop tu hita porang sanga haleon.

JEREMIA 5:13

Etong ma angka panurirang i songon alogo, angke nada adong tona ni Tuhan di halahi.” Dung i didok Tuhan Debata Na Markuaso i ma tu au, “Hara ni na songon i didok angka jolma i, baenonKu ma hatangKu songon api di bagasan pamanganmu. Gabe songon soban ma bangso on, jana tutungon ni api i ma halahi lopus abis.”

JEREMIA 5:31

Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”

JEREMIA 6:14

Diubati halahi do bugang ni bangsongKu, tapi layas do halahi marnidasa, jana ninna do: ‘Hasonangan, hasonangan!’ Tapi nada adong hasonangan.

JEREMIA 8:11

Marlayas ni roha do halahi hatiha mangubati bugang ni boru ni bangsongKu, ning halahi, ‘Hasonangan, hasonangan!’ Tapi nada adong hasonangan.

JEHESKIEL 12:24

Di Israel, nada adong be ro parnidaan sanga alatan gabus.

JEHESKIEL 13:22

Angka halak na burju na so adong Huhahua, dipahancit hamu ma roha ni halahi marhite pargabusonmunu i. Angka halak na jahat dipagodang hamu rohana anso tongtong mardosa boti anso ulang dipalua.

MIKA 3:11

Anso dapotan hepeng sogok do umbaen na mamarenta angka parkuaso ni kota, angka malim mangajarkon Uhum Ni Tuhan anso dapotan gaji, marjamita angka panurirang anso dapotan hepeng – dung i diambang halahi ma di pihak ni halahi Tuhan i. Didok halahi ma, “Di tonga-tonganta do Tuhan; nada pola ro parmaraan tu hita.”

2 PETRUS 2:1

Najolo di tonga-tonga ni bangso ni Debata, ro do angka panurirang pargabus. Laing songon i muse do di tonga-tongamunu, marroan ma angka guru pargabus. Baritahonon ni halahi ma angka pangajaran na so tutu, na pasegohon. Jana diporso halahi do Parkuaso na dung marhancit laho paluahon halahi. Jadi na mangalap magona do halahi disi, na tibu mandondoni halahi sandiri.