JEHESKIEL 17:9 - BIBEL JAMITA NA DENGGAN

⁹ Jadi gabe marsapa ma au tu Tuhan Debata songon on: Tarbaen dehe mangolu jana manjarampak bona ni anggur i? Nada he umpaton ni unggas rajawali na parjolo i angka uratna i, rurusonna batuna i, rampingkononna angka dangkana jana padiaronna i malos? So pola porlu bahat gogo sanga bangso na gogo laho mangumpat bonana i lopus tu angka uratna i.

JEHESKIEL 17:9 ပူးပေါင်းရင်းမြစ်များ

2 JUJUR TAON 13:12

Debata sandiri do anggo pamimpinnami jana dison do angka malimNia. Ma pola rade halahi laho mangombus sarune songon tandana di hami laho mamorangi hamu. O, hamu halak Israel, ulang alo hamu Tuhan, Debata ni ompumunu! Nada bolas monang hamu!”

2 JUJUR TAON 20:20

Ancogotna i sogot sajo dope, ruar ma rayat i jana kehe ma halahi tu luat halongonan na di lambung ni Tekoa. Di na laho kehe halahi, jolo didok si Josafat ma sipaingot songon on, “Hamu angka rayat ni Juda dohot Jerusalem! Porsaya ma hamu tu Tuhan Debatamu, gabe margogo ma hamu martahan. Jagit hamu ma angka sipaingot sian panurirangmunu, gabe manjadi ma hamu!”

JEREMIA 32:5

Dung i obanonna ma si Zedekia tu Babel jana maringanan disi lopus Huuhumi ia. Haru pe diporangi ia halak Babel, nada manjadi karejonia i. Au Tuhan, madung mandok songon i.”

JEREMIA 37:10

Haru pe umpamana ditaluhon hamu sude tentara ni Babel i lopus tading hum angka jolma na margasai di bagasan angka bandar ni halahi, laing jongjong do halahi manyurbu sude kota on.”

JEHESKIEL 17:10

Madung nian togu panyuanna, tapi tarbaen ma he torus tubu anggur i jana manjarampak? Nada he malos i muda dung mangombus alogo sian Habincaran? Nada he malos di inganan panyuananna i do anggur i?”

JEHESKIEL 17:8

Hape nian tarsuan di tano na napu do anggur i mardongan aek na marsonang-sonang gabe tarbaen ia marbulung na sarmak, ramos marbatu jana gabe bona ni anggur na denggan.

AMOS 2:9

Haru songon i pe ale bangsongKu, hara ni hamu do umbaen na Huabisi halak Amori na ginjang-ginjang i songon bona ni tusam dohot na gogo-gogo i songon bona ni sampinur.

BILANGAN 14:41

Tapi didok si Musa ma, “Biasi langgaronmunu dope saonnari parenta ni Tuhan? Nada adong guna ni karejomunu i!