JEHESKIEL 14:3 - BIBEL JAMITA NA DENGGAN

³ “Ale anak ni jolma, na dung dipasahat ni angka jolma on do ngoluna tu gana-ganaan gabe julung halahi tu bagasan dosa. Dia dope dalanna umbaen tu Au halahi marsapa?

JEHESKIEL 14:3 ပူးပေါင်းရင်းမြစ်များ

2 RAJA-RAJA 3:13

“Aha urusanku tu ho?” ning si Elisa tu raja ni halak Israel i. “Tu angka panurirang ni amangmi ma ho kehe.” “Nada!” ning si Joram mangalusi. “Angke na nisangkap ni Tuhan do laho pasahatkon hami na tolu tu raja Moab.”

MASMUR 101:3

hajahatan nada padiaronku. Huhagigihon do parbuatan ni halak na balik, nada ra au marsiantoan dohot halahi.

MASMUR 66:18

Sugari na sonang rohangku mamikir hajahatan, pasti nada ra Tuhan umbegean.

PODA 15:29

Ditangihon Tuhan do muda martangiang halak na burju, tapi nada diterge Ia halak na so tontu.

PODA 15:8

Sonang do roha ni Tuhan muda denggan halak martangiang, tapi anggo haul ni halak na jahat ditulak Ia.

PODA 21:27

Nada jop roha ni Tuhan tu haul ni jolma na so hasaya, lumobi muda na dihaulkon mardongan maksud na targora.

PODA 28:9

Muda nada oloanmu uhum, tangiangmu pe sihagigian do.

JESAYA 1:15

Muda pe diangkat hamu tanganmunu martangiang, nada Huterge be i. Nada parduli Au sanga na sadia bahat tangiangmunu i, nada ra Au manangihonsa angke dohot tanganmunu i madung bahat hamu mamunu.

JESAYA 33:15

Tarbaen hamu do martahan disi muda tigor hamu mandok hata jana dibaen hamu na denggan. Ulang pake hamu kuasomunu laho manggabusi halak na pogos, jana ulang jagit hamu hepeng sogok, ulang dohot-dohotan hamu tu halak na mambaen sangkap mamunu jolma sanga mambaen hajahatan na asing.

JEREMIA 11:11

Patunda ni i, Au Tuhan, madung Hupaingot bahaso na giot paroonKu hamamago tu halahi, jana nada tarbaen halahi pasidingkonsa. Muda pio-pio halahi mangido tolong tu Au, nada ra Au manangihonsa.

JEREMIA 17:9

Nada tardodo anggo roha ni jolma umbisuk do i sian sasudena jana sun antong jahatna.

JEREMIA 21:2

“Mangkobari ma jolo ho dohot Tuhan salaho tu hita, harana madung dihobuk si Nebukadnesar raja ni Babel rap dohot paranganna kotanta on. Betak na giot baenon ni Tuhan do hahomangan di hita, jana paksaonNa si Nebukadnesar manarik mundur parangannia.”

JEHESKIEL 11:21

Tapi anggo angka halak na sai marhagiot marsomba gana-ganaan na jorbut jana sihagigian i, uhumanKu do i hara ni pangalaho ni halahi.” Songon i ma pandok ni Tuhan Debata i.

JEHESKIEL 14:2

Dung i didok Tuhan ma tu au,

JEHESKIEL 14:4

Jadi hara ni i dokkon ma tu halahi bahaso Au Tuhan Debata martona songon on: ‘Sandok halak Israel na dung pasahat dirina tu gana-ganaan jana padiarkon dirina madabu tu bagasan dosa, dung i ro mangido sipaingot sian sada panurirang, alusanKu do i dohot alus na patut tu angka gana-ganaan na bahat i!

JEHESKIEL 14:7

Sandok halak Israel dohot halak sileban na maringanan di tonga-tonga ni bangso Israel, na mandao sian Au jana kehe marsomba gana-ganaan, dung i ro muse mangido sipaingot tu sada panurirang, Au sandiri na mangalusisa.

JEHESKIEL 20:16

Hubaen pe janji i hara ni na dipasiding ni halahi do angka parentangKu, dilaosi halahi angka tona na sian Au jana ramun dibaen halahi Ari Sabat. Gumonan do di halahi marsomba angka gana-ganaan ni halahi.

JEHESKIEL 20:3

“Ale jolma parsantongkinan, manghobari ma ho dohot angka pamimpin i jana dok ma bahaso Au Tuhan Debata mandok songon on, ‘Na puluk ma hamu antong mangido panogu-noguon tu Au! Hara ni Au, Debata na mangolu, nada ra Au anggo hamu do mangido panogu-noguon sian Au! Au Tuhan Debata madung mandok songon i.’

JEHESKIEL 20:31

Jana lopus tu sadari on pe dipahodar hamu do dirimunu marhite na maroban pelean dohot na manutungi angka dakdanakmunu baen haul tu angka gana-ganaan i. Antong laing puluk dope he hamu mangido panogu-noguon tu au? Hara ni Au na mangolu, Tuhan Debata, nada Huloas hamu mangido panogu-noguon sian Au.

JEHESKIEL 3:20

Muda dipungka sada halak na burju mambaen dosa, jana Hupaadop ia tu batu partuktuhan, mate ma ia. Hara ni na so dipaingot ho ia, mate ma ia di bagasan dosana, jana angka pangalahonia na denggan i nada ingotonKu be i. Tapi anggo patunda ni hamamatenia, sian ho do i tungguonKu.

JEHESKIEL 33:30

Didok Tuhan ma, “Ale jolma parsantongkinan, sihata-hataan ni angka dongan sabangsomu noma ho muda marpungu-pungu halahi di lambung ni angka tembok ni kota i sanga di jolo ni angka pintu ni bagas. Marsipandohonan ma halahi na sada tu donganna, ‘Beta, hita tangihon ma sanga aha tona ni Tuhan sadari on.’

JEHESKIEL 36:25

Dung i pispisonKu ma hamu dohot aek na lan, anso ias hamu sian sude gana-ganaanmunu dohot sian sasude na pahodarkon hamu.

JEHESKIEL 44:12

Tapi hara ni na dung dohot halahi mandalankon parsombaan ni gana-ganaan di bangso Israel jana i ma dalanna umbaen na dohot tarsarat bangso i tu dosa, jadi gabe Husumpahon ma, Au Tuhan Debata manyumpahon, angkon manaon uhuman ma halahi.

JEHESKIEL 6:9

Disi, di tonga-tonga ni angka bangso, tu dia halahi na tartaban i dioban, angka halak na malua sian tonga-tongamunu angkon mangingot Au. PaulakonKu do muse roha ni halahi na markarosuan i, na dung mandao sian Au jana manundali halahi, na tongtong markarosuan mangihutkon gana-ganaan ni halahi, dung i gabe goyak ma roha ni halahi mida dirina sandiri hara ni sude hajahatan dohot hajorbutan ni halahi.

JEHESKIEL 7:19

Ambungkonon ni halahi noma sere dohot perak songon rompak-rompak di topi dalan angke anggo di ari disi dipalalu Tuhan gilap ni murukNa nada tarpalua sere dohot perak i be halahi, mur mangonjarkon halahi noma i tu bagasan dosa. Nada tarpargunahon halahi be i laho papuaskon hagiot sanga laho manggohi butuha ni halahi.

HOSEA 4:5

Arian na borngin do hamu mambaen hasalaan, songon i muse angka panurirang. Hara ni i giot abisanKu ma Israel, inangmi.

ZEPANYA 1:3

sude jolma dohot binatang sude unggas dohot ihan. PutusanKu noma sandok jolma manusia, sahalak pe nada paloasonKu be mangolu. Au Tuhan, madung mandok songon i.

ZAKARIA 7:13

Nada Hualusi tangiang ni halahi, harana halahi pe antong nada ditangihon halahi taran mangkuling Au ninna Tuhan Na Markuaso.

LUKAS 20:8

Dung i didok Jesus ma tu halahi, “Antong anggo songon i do, Au pe nada paboaonKu di hamu sanga dohot kuaso ni ise Hubaen i sudena.”

EPESUS 5:5

Ingot hamu ma on tangkas: Sanga ise na rorang pangalahona, sanga na so ture, sanga na sai ahut tu diri (sarupa tu na marsomba gana-ganaan do pangalaho na songon i), nada tarbaen halak na songon i gabe anggota ni bangso ni Kristus dohot Debata.

1 PETRUS 2:8

Tartuktuk pe halahi, hara ni na so dioloi halahi do hata ni Debata. Songon i ma panontuhon ni Debata taringot tu halahi.

HALUMBAAN 2:14

Tapi haru songon i pe, laing adong do piga-piga pangalaho na so dihagioti ni rohangKu di hamu: Adong deba sian hamu na mangihutkon pangajaran ni si Bileam. Diajari si Bileam do si Balak paoto-otohon halak Israel anso mambaen dosa, i ma na mangankon pelean na nihaulkon tu gana-ganaan dohot mambaen pangalaho na markarosuan.

1 SAMUEL 28:6

Gabe mangido panogu-noguon ma ia tu Tuhan, hape nada dialusi Tuhan ia, sanga di nipi bope dohot na mamake Urim dohot Tumim sanga pe markite-hite panurirang.