JEHESKIEL 13:9 - BIBEL JAMITA NA DENGGAN

⁹ UhumanKu ma hamu, ale angka panurirang na pajojorkon alatan gabus dohot na marnipihon angka parnidaan! Na so tola be hamu dohot mambaen haputusan di bagasan angka sidang ni bangsongKu, sesaon noma angka goarmunu sian rayat ni Israel, jana nada mulak be hamu tu bona bulumunu. Jadi gabe botoonmunu ma bahaso Au do Tuhan Debata.’

JEHESKIEL 13:9 ပူးပေါင်းရင်းမြစ်များ

1 RAJA-RAJA 13:18

Gabe margabus ma panurirang na matobang na sian Betel i didok ma tusia, “Au pe laing panurirang do songon ho. Na dung diparentahon Tuhan do sahalak surusuruan marsuru au mangalap dohot manjagit ho di bagasku.”

ESRA 2:59

Angka halak na kehe marangkat sian kota Telmelah, Telharsa, Kerub, Adan, dohot Imer bahatna 652 halak. Masuk ma disi horong ni si Delaya, si Tobia dohot si Nekoda, tapi nada tarbuktihon halahi na tutu halahi pomparan ni bangso Israel.

MASMUR 101:7

Anggo pangicu nada tola maringanan di bagasku, halak pangalancap nada tahan di jolongku.

MASMUR 69:28

Sugari nisesa noma gumonan goar ni halahi sian buku ni halak na mangolu, indangkon sai disuratkon be i di panyuratan ni goar-goar ni halak na tigor.

MASMUR 69:5

Ale Debata, diboto Ho do angka hasalaanku nada buni sian adopanMu angka dosangku.

MASMUR 87:6

Dietong Tuhan do angka bangso di hatiha manyuratkon, “On ma na disorangkon disi.”

MASMUR 95:11

Gabe marsumpa Au di bagasan murukKu, nada masuhan ni halahi tano i laho maradian rap dohot Au.”

JESAYA 4:3

Ganop halak na tading di Sion jana pasipasi ni Jerusalem angkon digoari na badia, i ma ganop halak na di Jerusalem na nitodo manjagit haluaan.

JEREMIA 14:15

Didok halahi ma mangasahon goarKu bahaso na so tondongon ni parporangan luat on sanga haleon, hape nada Husuru halahi mandok songon i. Au Tuhan, giot paboaonKu tu ho Jeremia, sanga aha na giot baenonKu tu angka panurirang na so Husuru i. BunuonKu ma halahi marhite porang dohot tangkuraparon.

JEREMIA 17:13

Tuhan, Ho do pos ni roha ni Israel bangsoMi, angkon gabe maila do sude na manadingkon Ho. Na giot kehe ma halahi tu inganan ni jolma na mate i; angke Ho do mual ni aek hangoluan madung ditadingkon halahi, ale Tuhan.

JEREMIA 23:20

Nada ra mombun hamumurukNia i salolot so abis sude mardalan na disangkaphonNia. Di pudian ni ari muse botoon ni bangso ni Tuhan do torang taringot tusi.

JEREMIA 4:9

Didok Tuhan, “Anggo di ari i mandele ma angka raja dohot angka halak na marpangkat. Tarsonggot ma angka malim jana longang ma angka panurirang.”

JEHESKIEL 11:10

Mate di porang do hamu di tanomunu sandiri, jadi gabe botoonmunu ma bahaso Au do Tuhan.

JEHESKIEL 12:20

Angka kota na laing diingani halak angkon gabe maronco jana tano ipe angkon gabe gariang, dung i botoonmunu ma bahaso Au do Tuhan.”

JEHESKIEL 13:14

Madung marniet Au laho mangarumpakkon tembok na nikapurmunu i, giot sarsarkononKu i lopus tinggal ojahanna i sajo. Dondonan ni tembok i ma hamu jana i noma mambaen mate hamu sudena. Jadi gabe botoonmunu ma bahaso Au do Tuhan.

JEHESKIEL 13:23

Anggo saonnari marujung noma angka parnidaan gabus dohot angka alatanmunu na so tutu i. PaluaonKu ma bangsongKi sian gogo ni hajahatanmunu. Jadi gabe botoonmunu ma bahaso Au do Tuhan.”

JEHESKIEL 20:38

PaorotonKu ma sian tonga-tongamunu angka halak pangalo dohot parjahat. ObanonKu halahi haruar sian inganan ni halahi saonnari jana nada paloasonKu mulak tu tano Israel. Jadi gabe botoonmunu ma bahaso Au do Tuhan.”

DANIEL 12:1

Didok surusuruan na marpakean linen i ma mangulahi, “Tarida ma di hatiha i Mikhael surusuruan na godang pangondian ni bangsomi. Dung i masa ma hasusaan na so adong tudosanna dope mamungka adong angka bangso. Tapi sandok halak na sian bangsomu na tarsurat goarna di bagasan Buku i, paluaon ma i.

HOSEA 4:5

Arian na borngin do hamu mambaen hasalaan, songon i muse angka panurirang. Hara ni i giot abisanKu ma Israel, inangmi.

HOSEA 9:3

Hamu ale halak Israel, nada tongtong hamu tinggal di tano na nilehen ni Tuhan tu hamu. Angkon mulak hamu tu Mesir jana angkon panganonmunu sipanganon na haram di Asur.

MIKA 3:5

Dipaoto-oto angka panurirang do bangsongKu, i ma angka panurirang na burju tu angka jolma na mangalehen hepeng, tapi na margoyak ni roha tu halak na so mangalehen. Tu angka panurirang na songon i didok Tuhan ma,

MIKA 3:6

“O Panurirang, marujung ne ma hatihamu; mamungka lusut ma mataniarimu. Dipaoto-oto hamu do bangsongKi, hara ni i nada jagitonmunu be parnidaan na pabotohon angka sangkapKu. Nada be tarlumbahon hamu sanga na aha.”

LUKAS 10:20

Haru pe songon i, ulang marjop ni roha hamu hara ni na nioloan ni angka tondi na jahat hamu, tapi gumonan ma marjop ni roha hamu hara ni na dung tarsurat goarmunu di banua ginjang.”

PILIPPI 4:3

Laing hupangido dope tu ho, donganku na bonar roha i sai urupi ma halahi, na dung marporang rap dohot au hara ni Jamita Na Denggan i rap dohot si Klemen dohot donganku saparkarejoan na asing i, na tarsurat do goar ni halahi di buku hangoluan i.

IBRANI 12:23

Sada parsuoan godang do na niadopanmunu – parsuoan ni angka anak siangkaan ni Debata na dung disuratkon goarna di banua ginjang. Debata do na niadopanmunu, Panguhum ni sude jolma manusia. Adopanmunu do angka tondi ni halak na burju na dung dipasanggam.

HALUMBAAN 13:8

Sombaon ni sude jolma na mangolu di ginjang tano on ma binatang i, i ma angka halak na so tarsurat goarna di buku hangoluan ni Anak Ni Biri-biri na dung disambol i, mamungka sian panompaon ni portibi on.

HALUMBAAN 19:20

Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang.

HALUMBAAN 20:12

Jana huida ma angka halak na mate, na menek dohot na magodang rap jongjong di jolo ni habangsa i. Dibuka ma dohot angka buku, dung i dibuka muse ma sada buku na asing, i ma buku hangoluan. Jana di hatiha i ma didabu uhuman tu angka halak na dung mate, satongtang tu pambaenan ni halahi di hatiha na salpu marguru tu na tarsurat di bagasan angka buku i.

HALUMBAAN 20:15

Sanga ise halak na so adong goarna tarsurat di bagasan buku hangoluan i, diambungkon ma tu bagasan laut api i.