JAKOBUS 5:6 - BIBEL JAMITA NA DENGGAN

⁶ Diuhum jana dibunu hamu do angka halak na so marsala, hape nada mangalo halahi tu hamu.

JAKOBUS 5:6 ပူးပေါင်းရင်းမြစ်များ

JESAYA 5:23

Marjaya ma hakim na patigorhon parjahat hara ni hepeng suap, jana na so patuduhon hasintongan tu halak na tigor.

JESAYA 53:7

Kejam do dibaen tusia, tapi sip sajo do ia manaonsa, songon anak ni biri-biri na nioban tu panyambolan, jana songon induk ni biri-biri na maoto hohom maradopkon halak na manggusting imbuluna.

MATEUS 21:38

Tapi dung diida angka na mamola kobun i anak ni partano na bidang i martahi ma halahi, ‘Ah! Ma ro anak ni partano na bidang i. Aha dope, tabunu ma i anso di hita sude tean-teananna i!’

MATEUS 27:20

Tapi torus ma dijajang-jajang angka Sintua Ni Malim dohot angka hatobangon ni halak Jahudi i halak na bahat mangido tu si Latus anso si Barabbas dipalua. Tapi anggo Jesus nibunu ma.

MATEUS 5:39

Tapi saonnari Au mandok di hamu: Ulang ma alo hamu halak na mambaen na so denggan tu hamu. Tapi sabalikna do! Muda ditampeleng halak hurummu siamun, laing tarehon ma ditampeleng ia hurummu siambirang i.

BAENON NI ANGKA RASUL 22:14

Dung i didok ia ma tu au, ‘Madung dipili Debata ni angka ompunta i ho anso diboto ho hagiotNia boti anso diida ho na tigor i huhut manangihon soraNia sandiri.

BAENON NI ANGKA RASUL 7:52

Adong dehe panurirang na so diparkanciti ni angka ompungmunu i? Dibunu halahi do angka suruan ni Debata na mambaen boa-boa narobi, paboa na angkon ro ma Partigor i. Jana saonnari dihianati jana dibunu hamu do Naposo Ni Debata i.

BAENON NI ANGKA RASUL 8:32

On ma ayat na nisisenia i, “Songon biri-biri na niiring tu panyambolan do Ia, songon anak ni biri-biri na hohom di na nigusting imbuluna, songon i ma Ia umpe sangkababa hata didok Ia.

IBRANI 10:38

Jana halakKu na tigor roha i, mangolu do hara ni haporsayaanna, tapi muda adong sian halahi na sumurut, nada jop be rohangKu mida i.”

JAKOBUS 2:6

Hape anggo hamu, mur dipabile hamu do halak na pogos haru pe nian angka halak na mora i do mamisat hamu dohot na manyarat hamu tu paruhuman!

JAKOBUS 4:2

Por do rohamunu, hape nada dapot hamunu, gabe ra ma hamu mamunu! Mangiburu do hamu, hape umpe dapot hamu na nijalahanmunu i gabe martangkangi ma hamu lopus marbada. Umpe bagi aha dapot hamu, angke nada tu Debata hamu mangido.

1 PETRUS 4:18

Tarsurat do di Buku Na Badia i songon on, “Jadi muda maol do angka halak na denggan i paluaon, bia muse noma ulaning na masa tu angka halak pardosa na so mananda Tuhan i!”