2 Dipajongjong do sada bandar, bagian parjolona i nigoaran do i Inganan Na Badia. Adong ma disi parlampuan, jana adong muse ma meja dohot roti na nihaulkon tu Debata.
“Baen ma sada parlampuan sian sere. Jongjonganna dohot sitiopanna i angkon sian sere tompoan do baenonmunu; bunga-bunga parhiasanna, masuk ma disi lampusungna dohot bulung ni bungana i angkon laing sada dohot jongjonganna i dohot sitiopanna i.
“Angkon baenonmu do Bandar ParmiananKi sian abit linen na halus. Angkon baenonmu do sampulu tenda di Bandar Parmianan i sian abit linen na halus, na ditonun sian wol na rata langit, na bunga torung dohot na rara. Sulamkon ma tusi gambar ni angka kerub.
Baen ma tire i di toru ni sangkotan na marbaris di tarup ni Bandar Parmianan. Pamasuk ma tu balik ni tire i Poti Parjanjian inganan ni batu na dua i. Tire i ma manyirang Inganan Na Badia sian Bilik Na Sun Badia situtu.
Anggo meja parsombaan i angkon di ruar ni Bilik Na Sun Badia situtu do i baenon, i ma sabola Utara; jana parlampuan i angkon sabola Selatan do i baenon di bagasan Bandar Na Badia i.
“Songon on ma carana baenon pabadiahon si Harun dohot angka dakdanaknia anso tarbaen halahi mangoloi Au songon malim. Buat ma sada lombu jantan na poso dohot dua biri-biri jantan na so martihas.
Masuk do ia tu Bagas Ni Debata. Dipambuati ia dohot dongannia i roti na nihaulkon tu Debata. Na so tola hian do ia bope dongannia mangankon i. Hum malim do na tola mangankon i.
Nada adong halak na manutung lampu, dung i ditutupi ia dohot belek. Tu inganan ni lampu do i dibaen halak, anso torang sude idaon ni halak na di bagas i.
Ganop taon do Malim Godang ni halak Jahudi masuk tu Bilik Na Sun Badia na di Bagas Ni Debata, maroban mudar ni sada pahan-pahanan. Tapi anggo Kristus nada marpupu Ia manghaulkon diriNia.