IBRANI 9:15 - BIBEL JAMITA NA DENGGAN

¹⁵ Jadi hara ni i do dibaen Debata sada janji na imbaru markite-hite Kristus, anso maruli pasupasu na so ra mantak angka halak na nipiohon ni Debata, i ma pasupasu na dung nijanjihon ni Debata. Tulus pe sudena i hara ni na dung adong do na mate, i ma Kristus; jana dipalua hamamateNia i ma halak sian angka hasalaan na nibaen ni halahi dompak margogo janji na parjolo i.

IBRANI 9:15 ပူးပေါင်းရင်းမြစ်များ

MASMUR 37:18

Dijagohon Tuhan do ngolu ni halak na daulat, halahi do nampuna pusaka i sapanjangna.

DANIEL 9:26

Di ujung ni hatiha i hona bunu ma pamimpin na nitodo ni Debata i, hape nada adong nian salania. Jadi ro ma tentara ni sada raja na gogo, sego-segoonnia ma kota Jerusalem dohot Bagas Ni Tuhan i. Ro ma hatiha parujungan i songon aek na magodang na maroban porang dohot hasegoan, laing songon na nisangkapkon ni Debata.

MATEUS 19:29

Angke sanga ise na maninggalkon bagasna, sanga kahanggina, sanga ibotona, sanga pe inangna dohot amangna, sanga dakdanakna, sanga sabana hara ni Au, saratus lompit ma jagiton ni halahi mangulahi. Nilehen muse dope disia hangoluan na so mantak.

MATEUS 22:3

Disuruhon raja i ma angka naposona laho mangalap angka halak na niontangnia tu horja i. Hape inda ra ro angka na niontangna i.

MATEUS 25:34

Dung i dohonon ni Raja i ma hata tu angka na di siamunNia i, ‘Ro ma hamu angka na nipasupasu ni Damang. Masuk ma hamu tu bagasan harajaan na dung diparade di hamu mamungka sian na manompa portibi on.

MATEUS 25:36

Di na so marpakean Au, diparabiti hamu do Au. Marnyae Au, diligi hamu do Au, di hatiha na tarhurung Au ro do hamu mangaligi Au.’

MARKUS 10:17

Jadi laho patoruskon pardalananNia Jesus, ro ma sada bayo marlojong-lojong mandapotkon Ia. Marsomba ma bayo i di jolo ni Jesus manyapai, “O Guru na burju, angkon aha do sibaenonku anso dohot au manean ngolu na so mantak i?”

LUKAS 18:18

Ro ma sahalak pamimpin marsapa tu Jesus, “Guru na denggan roha, aha dehe na angkon baenonku anso hutean hangoluan na so mantak i?”

LUKAS 22:20

Laing songon i ma dung sidung mangan, dilehen Ia ma panginuman i, tu halahi jana didok Ia ma, “Anggo anggur on, i ma parjanjian na imbaru sian Debata, na nicap dohot mudarKu, mudar na niduruskon hara ni hamu].”

JOHANNES 10:28

Hulehen do di halahi hangoluan na so ra mantak. Bagi na bia pe nada mate halahi, jana nada tarrampas sanga ise pe halahi sian parmahanionKu.

BAENON NI ANGKA RASUL 20:32

Saonnari hupasahat ma hamu tu Debata, anso laing dipature-ture Ia hamu jana anso laing marsitiopan tu jamita na paboahon asi ni roha ni Debata i hamu. Markuaso do Debata laho patoguhon hamu bope laho mangalehen angka pasupasu na dung dipasingkop Ia tu halakNia sudena.

SURAT NI SI PAULUS TU PARLAGUTAN ROM 5:10

Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia.

SURAT NI SI PAULUS TU PARLAGUTAN ROM 5:6

Dibaen di hatiha hagaleonta, madung mate Kristus humopkop hita angka na durako, di hatiha na dung ditontuhon ni Debata.

SURAT NI SI PAULUS TU PARLAGUTAN ROM 5:8

Hape dipatidahon Debata do holong ni rohaNia mida hita, di na mate i Kristus humopkop hita dompak pardosa dope hita.

SURAT NI SI PAULUS TU PARLAGUTAN ROM 6:23

Angke hamatean do upa ni dosa; tapi silehen-lehen ni Debata i ma ngolu na manongtong di bagasan Kristus Jesus, Tuhanta i.

SURAT NI SI PAULUS TU PARLAGUTAN ROM 8:28

Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia jana na nipiohonNia hombar tu sangkapNia.

SURAT NI SI PAULUS TU PARLAGUTAN ROM 8:30

Jana halahi na nitontuhonNia sian mulana, laing dipio Ia muse ma i. Jana halahi na nipioNia i laing dipatigor Ia muse ma i. Jana na nipatigorNia i, halahi muse ma na nipasangapNia.

SURAT NI SI PAULUS TU PARLAGUTAN ROM 9:24

tarmasuk hita na dung nipioNia, nada hum sian halak Jahudi, tapi dohot do sian angka bangso na asing.

2 KORINTUS 3:6

Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do.

GALATIA 3:20

Angkon adong do dua pihak, anso porlu adong sahalak na gabe songon panonga-nongai. Hape anggo Debata nada porlu adong diSia na songon panonga-nongai harana langsung do Debata sandiri mangkarejohonsa.

EPESUS 1:7

Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia,

2 TESSALONIKA 2:14

Anso tusi ma dibaen hamu na nipiohon ni Debata markite-hite Jamita Na Denggan na hami jamitahon i tu hamu. Dipiohon Debata pe hamu, anso laing dohot do hamu nian marsangap rap dohot Tuhanta Jesus Kristus.

1 TIMOTEUS 2:5

harana hum sada sajo do Debata jana sada muse do panonga-nongai ni Debata dohot jolma, i ma jolma Jesus Kristus.

2 TIMOTEUS 2:10

Hara ni i do umbaen na huhasobarkon mananggung sudena i pasari-sari angka dongan na dung nipili ni Debata. Hutaon pe sudena i bia anso laing dohot halahi maruli haluaan na di bagasan Kristus Jesus, dohot hasangapan salolot-lolotna.

TITUS 1:2

marguru tu arop ni roha di hangoluan na so mantak i. Harana na dung dijanjihon Debata hian do i dompak so dijadihon dope portibi on – jana nada tarbaen Debata margabus.

TITUS 3:7

anso mardenggan hita mangulahi tu Debata hara ni ibo ni roha ni Jesus jana tola ma hita maruli hangoluan na so mantak na sai tapainte-inte i.

IBRANI 10:34

jana dohot do hamu mangkilalahon pardangolan ni angka halak na tarhurung. Jana di na hona rampas sude sinadonganmunu, jop do rohamunu manjagit sasudena i, angke diboto hamu do, laing adong dope di hamu na dao dumenggan na tahan salolot-lolotna.

IBRANI 10:36

Porlu do sobar hamu, jana muda dung dipatulus hamu hagiot ni Debata, jagitonmunu ma janji i.

IBRANI 11:13

Di bagasan haporsayaan i, madung mate halahi sude. Nada dijagit halahi dopena janji i, tapi di tatap halahi do i sian na dao. Jadi pos jana jop do roha ni halahi marnidasa, jana dioku halahi do, bahaso pangaranto dohot paisolat do halahi di tano on.

IBRANI 12:24

Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel.

IBRANI 13:20

Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata.

IBRANI 2:14

Angke anggo angka halak na nidokNia i dakdanakNia, i ma angka mudar dohot sibuk, gabe sarupa ma Jesus sandiri dohot halahi jana mangolu songon pangalaho ni jolma sarupa dohot halahi. Songon i pe pambaenNia, anso ditaluhon Ia do Sibolis i na maniop kuaso ni hamatean i.

IBRANI 3:1

Hara ni i ale angka dongan na badia, na dohot taruli di pio-pio na sian banua ginjang, ligi hamu ma rasul dohot Malim Godang na taoku i, i ma Kristus Jesus.

IBRANI 6:13

Di na marjanji Debata tu si Abraham, marsumpa do Ia tu diriNia sandiri, harana nada adong na gumincat sian Ia.

IBRANI 6:15

Jadi hara ni sobarna si Abraham paintehon, gabe dijagit ia do na nijanjihon ni Debata tusia.

IBRANI 7:22

Jadi dao do dumenggan pamudun ni janji na nibaen ni Jesus i.

IBRANI 8:13

Jadi di na nidokNia sada ihot-ihot ni janji na imbaru, gabe nada hasaya be dibaen Debata ihot-ihot ni janji na parjolo i; jana sanga aha na so hasaya angkon manigor mago ma i.

IBRANI 9:12

Hum sanoli sajo do Kristus masuk tu Bilik Na Sun Badia na di bandar i ro di salolot-lolotna. Anggo di hatiha i nada maroban mudar ni hambeng jantan Ia sanga mudar ni anak ni lombu sihaulkonon; hum mudarNia sandiri do dioban Ia jana i ma dalanna dibaen Ia paluahon hita salolot-lolotna.

IBRANI 9:16

Muda adong surat ni tean-teanan, angkon laing adong do tanda paboa na dung marujung ngolu ni na mambaen surat i.

IBRANI 9:28

Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.

JAKOBUS 1:12

Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata.

1 PETRUS 3:18

Angke sanoli sajo do mate Kristus hara ni dosanta ro di salolot-lolotna – i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi.

1 PETRUS 5:10

Tapi dung ditaon hamu santongkin parkancitan i, Debata sandiri noma mambaen hamu gabe sanggam. PajongjongonNia ma hamu jana patoguonNia dohot parjugukmunu pe pahotonNia muse ma. Angke Debata parroha na sun denggan do Ia, na mamiohon hamu anso dohot mangkilala hasangapanNia na manongtong i markite-hite Kristus.

1 JOHANNES 2:25

Jana on ma na nijanjihon ni Kristus sandiri tu hita, i ma ngolu na manongtong.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.