IBRANI 9:14 - BIBEL JAMITA NA DENGGAN

¹⁴ mur ma mudar ni Kristus! Markite-hite Tondi na manongtong, dihaulkon Kristus do diriNia sandiri tu Debata gabe haul na sanggam. Dipaias mudarNia i do taroktokta sian angka karejo na so marguna, anso tarbaen hita dohot mangoloi karejo na so marguna, anso tarbaen hita dohot mangoloi Debata na mangolu i.

IBRANI 9:14 ပူးပေါင်းရင်းမြစ်များ

2 SAMUEL 4:11

Umboratan dope uhuman na giot dabuhononku tu parjahat na mamunu halak na so marsala na topet modom di bagasna sandiri. Saonnari au manuntut pamaloson sian hamu hara ni pamunuon i, jana agohononku ma hamu sian sisik ni tano on!”

2 RAJA-RAJA 19:16

O ale Tuhan, sugari diparrohahon Ho ma jolo na masa saonnari di hami. Tangihon ma sude hata ni si Sanherib na pabilehon Ho Debata na mangolu!

JOB 15:16

Mur jolma na rorang dohot na jurngit ma hape, na mandorguk hajahatan songon aek.

MASMUR 51:2

Basu ma sude hajahatanku paias ma au sian sude dosangku.

HARURUAR 12:5

Tola do pilionmunu sian biri-biri sanga hambeng, tapi angkon jantan do na marumur sataon jana na so martihas.

JESAYA 42:1

“Ligi, indu do naposongKu na Hutiop, naposo todoan ni rohangKu, lomo do rohangKu disia. Madung Hulehen kuasongKu tusia, laho maroban hatigoran tu angka bangso sudena.

JESAYA 53:9

Dikubur do ia rap dohot halak na jahat, jana ditanom di tonga-tonga ni halak na maradong, harupe na so jungada ia mangasahon gogo, jana nada adong sipaoto-oto di angka hatania.”

JESAYA 57:15

Angke songon on do pandok ni Na Gumincat jana Na Marmulia na marhabangsa salolotna jana Na Sun Badia goarNa: “Di inganan na gincat jana badia do habangsangKu, tapi rap muse do dohot halak na magopu jana na toruk rohana, laho pangoluhon arop ni roha ni halak na toruk roha dohot laho pangoluhon roha ni halak na magopu.

JESAYA 61:1

Dirajai Tondi Ni Tuhan Debata i ma au; dipili jana disuru Ia au, laho maroban jamita na denggan tu halak na pogos dohot na lebak, jana pamalumkon halak na magopu rohana; laho pabotohon tu halak tahanan paboa na tibu noma halahi dapotan haluaan, dohot tu angka jolma na di hurungan bahaso halahi na dung mardeka.

JEREMIA 10:10

Hape Ho do ale Tuhan, Debata na tutu, Raja na Hot, Debata Silehen ngolu. Muda jabat muruk Ho, gumalusak do tano, muda tarrimas Ho nada manahan angka bangso. (

JEHESKIEL 45:18

Didok Tuhan Debata i ma tu bangsoNia i, “Di tanggal sada bulan sada, angkon paiasonmunu do BagasKu marhite na manghaulkon sada lombu jantan na so martihas.

DANIEL 6:26

Dung i ditongos Raja Darius ma surat tu angka jolma sian sandok bangso, marga ni bangso dohot hata na marragam-ragam na di tano on sudena. Ninna ma, “Sai martamba ma di hamu rasoki!

HAMALIMON 22:20

Muda dilehen hamu pahan-pahanan na martihas, nada dijagit Tuhan i.

BILANGAN 28:11

“Ganop bona ni bulan angkon haulkonon tu Tuhan haul situtungon, i ma: dua lombu jantan na poso, sada biri-biri jantan, pitu anak ni biri-biri jantan na marumur sataon, sudena i na so martihas.

BILANGAN 28:3

“Angka on ma haul sipanganon na angkon sihaulkononmunu tu Tuhan. Na gabe haul ganop ari, dua anak ni biri-biri jantan na marumur sataon na so martihas.

BILANGAN 28:9

“Di Ari Sabat angkon haulkononkon dua anak ni biri-biri marumur sataon na so martihas, dua kilogram topung na nicampur dohot miak zetun na gabe haul gandum dohot haul aek ni anggur.

MATEUS 12:28

Tondi Ni Debata do na mangalehen kuaso anggo di Au laho mangusir setan. I ma tandana madung ro Harajaan Ni Debata tu hamu.

MATEUS 16:16

Mangalusi ma si Simon Petrus, “Ho ma ibana Kristus, Anak Ni Debata Na Mangolu i.”

MATEUS 20:28

Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak.”

MATEUS 7:11

Haru songon i pe jahatmunu, laing diboto hamu do mangalehen na denggan tu dakdanakmunu, mur Amangmunu na di banua ginjang i ma. Tontu lehenonNia do angka na denggan i di halak na mangido tuSia!

LUKAS 12:24

Parrohahon hamu ma jolo unggas si gawak i! Nada manyabur same halahi, nada manyabi, nada adong muse gudang sanga talobat ni halahi. Hape dijagohon Debata do halahi! Ummargaan dope hamu sian angka unggas!

LUKAS 12:28

Jadi, muda diabiti Debata do angka duhut na di padang i, na jeges sadari on tapi ancogot diambungkon tu api, tarlumobi ma hamu, ale angka na hurang porsaya!

LUKAS 4:18

“Tondi Ni Tuhan do na adong di Au, angke madung dimiahi Ia do Au laho mamaritahon Jamita Na Denggan na sian Debata tu halak na pogos, jana disuru Ia do Au paboahon haluaan tu angka na tartangkup dohot parnidaan tu angka na mapitung; laho paluahon halak na marhancit,

JOHANNES 3:34

Sanga ise na nisuru ni Debata, barita sian Debata do dioban Ia, harana madung dilehen Debata TondiNia i, nada hasuhatan bahatna.

BAENON NI ANGKA RASUL 1:2

lopus tu ari hananaekNia tu banua ginjang. Dompak so manaek Ia tu banua ginjang, madung dilehen Ia hian markite-hite kuaso ni Tondi Parbadia angka tona tu angka rasul na nipiliNia i.

BAENON NI ANGKA RASUL 10:38

Diboto hamu do, na dung dipili Debata do Jesus halak Nasaret i, jana dilehen tuSia Tondi Parbadia dohot kuaso. Laing diboto hamu do, na dung mardalani Jesus i tudia-tudia mambaen na denggan; dipamalum Ia sudena halak na nitaluhon ni Sibolis, angke didongani Debata do Ia.

BAENON NI ANGKA RASUL 14:15

“Biasi baenonmunu songon i, hamu ale angka dongan? Laing jolma do hami songon hamu! Na giot manjamitahon Jamita Na Denggan i do hami dison tu hamu angka dongan, anso ditadingkon hamu sudena pangalaho na so marguna on boti anso ro hamu mandapotkon Debata na mangolu i, i ma sitompa langit dohot tano on dohot laut dohot sude na adong di bagasanna.

BAENON NI ANGKA RASUL 15:9

Nada mardia imbar hita sian halahi dibaen Debata. Dipaias Ia do roha ni halahi, hara ni na porsaya halahi.

SURAT NI SI PAULUS TU PARLAGUTAN ROM 1:20

Mamungka sian na manjadihon tano on Debata, anggo angka pangalaho ni Debata na so tarida i, i ma bako Hadebataan dohot hagogoanNia na manongtong i, anggo i tangkas do tarastui jolma markite-hite sude na nitompa i. Jadi nada tarbaen jolma i be marsidalian hara ni na so marbinoto.

SURAT NI SI PAULUS TU PARLAGUTAN ROM 1:4

tapi mangihutkon hadebataon tangkas do ia Anak Ni Debata na gok hagogoan. Tanda sajo do i botoon markite-hite hangongotNia sian na mate i.

SURAT NI SI PAULUS TU PARLAGUTAN ROM 11:12

Angke muda pangalaosion ni halahi gabe hamoraon di portibi on, jana hahurangan ni halahi gabe hamoraon di angka bangso na asing, mur noma di hamamasuk ni halahi sudena.

SURAT NI SI PAULUS TU PARLAGUTAN ROM 11:24

Hamu na so halak Jahudi sarupa do hamu tu dangka ni zetun harangan i. Antong, salang hamu tarlohotkon do tu batang ni zetun na polin i na so sarupa hian dohot batangmunu sandiri, mur ma halak Jahudi na nipartudoskon tu angka dangka ni zetun na polin i, tontu ummura dope baenon ni Debata laho mangalohotkon halahi mangulahi tu bona ni zetun ni halahi sandiri.

SURAT NI SI PAULUS TU PARLAGUTAN ROM 6:13

Sada muse, ulang be pasahat hamu goar-goaran ni pamatangmunu tu kuaso ni dosa gabe parkokas laho mambaen angka na jahat. Tapi tu Debata ma pasahat hamu dirimunu songon halak na dung nipapinda sian hamatean tu hangoluan. Jana pasahat hamu ma sude goar-goaran ni pamatangmunu i tu Debata gabe parkokas laho mambaen angka na tigor.

SURAT NI SI PAULUS TU PARLAGUTAN ROM 6:22

Tapi anggo saonnari, dung dipalua hamu sian dosa jana madung gabe naposo ni Debata hamu, dapotan parbatu anso gabe badia ma hamu, jana ngolu na manongtong do ujungna i.

1 KORINTUS 15:45

Tarsurat do i songon on, “Si Adam, jolma na parjolo i gabe halak na mangolu,” tapi si Adam na parpudi i do gabe Tondi na mangalehen ngolu.

2 KORINTUS 5:21

Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.

2 KORINTUS 6:16

Aha ma he pardomuan ni Bagas Ni Debata dohot bagas ni gana-ganaan? Bagas Ni Debata na mangolu i do hita on, Debata sandiri pe didok Ia do, “Maringanan ma Au di tonga-tonga ni halahi, jana mangolu rap dohot halahi. Au ma gabe Debata ni halahi, jana gabe bangsongKu ma halahi.

GALATIA 2:19

Tapi anggo taringot tu Tona, na mate do au – dimatehon Tona i sandiri – anso tarbaen mangolu au di Debata. Madung diparsilangkon au rap dohot Kristus.

EPESUS 2:5

Jadi hatiha mate hita di partondionta, hara ni pangalaosionta dipangolu Ia hita mangulahi rap dohot Kristus. Jadi hum hara ni asi ni roha do umbaen na dipalua hamu.

EPESUS 5:2

Angkon mardai holong ni roha ma nian ngolumunu, laing songon pangkaholongi ni Kristus di hita. Dihaulkon Ia do diriNia hara ni hita, gabe songon silehen-lehen dohot haul na huskus na pasonangkon roha ni Debata.

PANGARATAION 15:21

Muda martihas do binatang i, tengka umpamana sanga mapitung sanga martihas na borat na asing, nada tola haulkononkon binatang i tu Tuhan Debatamunu.

PANGARATAION 17:1

Lombu sanga biri-biri na martihas, ulang haulkon hamu tu Tuhan, angke magigi do Tuhan Debatamunu tusi.

PANGARATAION 31:27

Huboto do sanga na bia jogal ni roha ni bangso i jana na sai tagi-tagi mangalo. Na dung mangalo do halahi tu Tuhan salolot mangolu au, jana mur mangalo dope i muse dung marujung ngolungku.

PANGARATAION 33:27

Sai tongtong do Debata na gabe pambelamunu; tanganNa na so ra mantak i panungkolmunu. Dipaorot Ia musu sian jolomunu, disuru Ia ho mangaropuk sude alomu.

PANGARATAION 5:26

Adong ma he jungada halak na laing mangolu songon hami dung dibegesa Debata na mangolu i mangkuling sian api?

1 TESSALONIKA 1:9

Halahi sandiri do mamaritahon sanga na bia panjagitmunu di hami dompak na ro i hami manopot hamu. Dicaritohon halahi do sanga na bia panadingkonmunu di angka gana-ganaanmunu dohot haroromunu mandapotkon Debata na mangolu jana na tutu i laho marsomba tuSia.

1 TIMOTEUS 1:17

Debata do Raja ni sude hatiha, patut nipasangap jana pujion tongtong, angke Ia do na manongtong, na so tarida jana sasadaSa! Amen.

1 TIMOTEUS 3:15

betak sai tarlambat au anso diboto ho hian sanga na bia sapatutna hita mangolu songon halak na sabagas dohot Debata, i ma parlagutan ni Debata na mangolu. Parlagutan i ma na songon tiang partunggul ni hasintongan ni Debata.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 1:3

Ia do sinondang hasangapan ni Debata, jana Ia do gambaran ni Debata sandiri dohot na mangasahon sasude markite-hite hataNia na gok kuaso. Dung sidung dipaias Ia jolma sian angka dosa ni halahi, juguk ma Ia di siamun ni Na Sun Margogo i di banua ginjang.

IBRANI 10:10

Madung dipatulus Jesus Kristus sanga aha na nidok ni Debata baenonNia. Hara ni i ma umbaen na nipaias hita sudena sian dosa markite-hite haul i, i ma Jesus sandiri – na nihaulkon sanoli sajo ro di salolot-lolotna.

IBRANI 10:12

Tapi anggo Ia, dung dihaulkon Ia haul na sada i, hara ni dosa, juguk ma Ia salolot-lolotna di siamun ni Debata.

IBRANI 10:2

Sugari na dung tutu situtu ias sian dosa angka halak na marsomba i tu Debata, nada adong be di halahi pangkilalaan na mardosa jana mantak noma halak manghaulkon haul.

IBRANI 10:22

Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

IBRANI 11:21

Hara ni na porsaya, di na giot mate si Jakob – disandehon ia ma tu pangkal ni tungkotnia i jana disomba ia Debata – dilehen ia ma pasupasu tu dakdanak ni si Josep.

IBRANI 13:12

Hara ni i ma umbaen na di ruar ni horbangan ni kota Jesus mate laho paiaskon bangsoNa sian dosa markite-hite mudarNia i sandiri.

IBRANI 3:12

Hamu angka dongan, manat ma hamu anso ulang jabat adong sian hamu sahalak pe na songon i jahatna jana na so porsaya tu Jesus, gabe marbalik mangkudukkon Debata na mangolu i!

IBRANI 6:1

Hara ni i, tapadiar ma jolo ojahan na parjolo sian ajaran taringot tu Kristus, jana taparayak ma hasanggapan i. Ulang be taulahi mambaen ojahan taringot tu hamubaan ni roha sian pambaenan na so hasaya, jana ojahan haporsayaan tu Debata,

IBRANI 7:16

Na dipajongjong gabe Malim so pola marojahan tu angka aturan na nibaen ni jolma, tapi na marojahan tu ngolu na manongtong.

IBRANI 7:27

Nada songon angka Malim Godang na asing i Ia, angkon jolo manghaulkon haul hara ni angka dosana sandiri, dung i hara ni angka dosa ni bangso i. Holan sanoli sajo do Jesus manghaulkon haul, i ma di na nihaulkonNia diriNia sandiri gabe haul.

IBRANI 9:12

Hum sanoli sajo do Kristus masuk tu Bilik Na Sun Badia na di bandar i ro di salolot-lolotna. Anggo di hatiha i nada maroban mudar ni hambeng jantan Ia sanga mudar ni anak ni lombu sihaulkonon; hum mudarNia sandiri do dioban Ia jana i ma dalanna dibaen Ia paluahon hita salolot-lolotna.

IBRANI 9:26

Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri.

IBRANI 9:7

Anggo na masuk tu bilik parbagasan ni bandar i hum Malim Godang i sajo do. I pe, hum sanoli sataon do i tola. I pe angkon mamboan mudar do ia patuluskon i, i ma sisombahononkon tu Debata hara ni ia sandiri dohot hara ni angka dosa na nibaen ni bangsonia i sian na so pamotoanna.

IBRANI 9:9

Hatiha sisaonnari on ma na nigambarkon ni i; astuanna, anggo angka haul sanga haul pahan-pahanan na nihaulkon i tu Debata, nada tarbaen i paias roha ni halak na manghaulkon i gabe sanggam.

1 PETRUS 1:19

tapi na lobi arga do dibaen; i ma diri ni Kristus sandiri, na gabe songon biri-biri na nihaulkon tu Debata na so martihas sanga marhahurangan.

1 PETRUS 2:22

Nada jungada Ia mambaen dosa jana sahalak pe nada adong jungada umbege Ia margabus.

1 PETRUS 2:24

Kristus sandiri do mamorsan angka dosanta i di pamatangNia sandiri di ginjang ni hayu parsilang i, anso tola hita malua sian kuaso ni dosa jana tola hita mangihutkon hagiot ni Debata. Angke bugang ni Kristus i do na paluahon hamu.

1 PETRUS 3:18

Angke sanoli sajo do mate Kristus hara ni dosanta ro di salolot-lolotna – i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi.

1 PETRUS 4:2

Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu.

1 JOHANNES 1:7

Tapi muda mangolu di na torang hita laing songon Debata na maringanan di na torang i, gabe mangolu ma hita di bagasan pardomuan na solkot na sada tu na asing, jana hara ni mudar ni Jesus AnakNa i gabe ias ma hita sian sasude dosanta.

1 JOHANNES 3:5

Diboto hamu do sanga hara ni aha umbaen na ro Kristus, i ma na laho manyesa angka dosa ni jolma jana nada adong dosa di bagasan Ia.

HALUMBAAN 1:5

dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta.

1 SAMUEL 17:26

Dung i marsapa ma ia tu angka halak na jongjong donok tusia, “Aha ma he upa sijagiton ni halak na mamunu halak Pilistin i dohot na manyesa habilean sian Israel?” Ise do lakna halak Pilistin si pelebegu on na barani mangalapi tentara ni Debata na mangolu i.