IBRANI 12:24 - BIBEL JAMITA NA DENGGAN

²⁴ Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel.

IBRANI 12:24 ပူးပေါင်းရင်းမြစ်များ

PAMUNGKAAN 4:10

Jadi didok Tuhan ma, “Biasi angkon baenonmu pangalaho na jorbut i? Pio-pio do mudar ni anggimi sian tano i, songon sora na mangangguk mangido pamalosan.

HARURUAR 24:8

Jadi dibuat si Musa muse ma mudar na di mangkuk-mangkuk i jana dipispiskon ia ma i tu rayat i. Ning ia ma, “Mudar on ma tanda ni parjanjian ni Tuhan dohot hamu di na nilehenNia angka parentaNia on.”

JESAYA 55:3

Tangihon ma ale bangsongKu, ro ma hamu tu Au, tangihon ma, anso mangolu hamu. Hara ni holong ni rohangKu na togu tu si Daud, naposongKi, Hupudun janji na hot dohot hamu.

HAMALIMON 1:5

Dung i angkon di pintu ni Bandar Parmianan i do disambol lombu i. Mudar ni lombu i, pasahaton ni angka malim sian pomparan ni si Harun ma i tu Tuhan, lalu dipispiskon tu opat-opat topi ni langgatan na donok tu pintu ni Bandar Parmianan i.

MATEUS 23:35

Ujungna madabu ma tu hamu uhuman hara ni na nibunumunu sude angka na so marsala i mamungka sian pamunuon na tu si Abel na so marsala i lalu tu pamunuon na tu si Zakaria anak ni si Berekia na giot bunuonmunu di holang-kolang ni bilik na badia dohot inganan ni haul na di Bagas Ni Debata i.

MATEUS 26:28

Angke on ma mudarKu na gabe jaminan ni parjanjian ni Debata. Niduruskon do mudarKon hara ni bahat halak, gabe hasesaan ni dosa.

MARKUS 14:24

Dung i didok Jesus ma tu halahi, “On ma mudarKu, na niduruskon di halak na bahat, i ma mudar na mambaen tulus parjanjian ni Debata.

LUKAS 11:51

Mamungka sian hamamate ni si Abel lopus tu hamamate ni si Zakaria, na nibunu di holang-kolang ni langgatan dohot Inganan Na Badia. Olo tutu, ‘Hudok ma tu hamu angkon tuntuton ma i tu halak sisaonnari on.

LUKAS 22:20

Laing songon i ma dung sidung mangan, dilehen Ia ma panginuman i, tu halahi jana didok Ia ma, “Anggo anggur on, i ma parjanjian na imbaru sian Debata, na nicap dohot mudarKu, mudar na niduruskon hara ni hamu].”

GALATIA 3:20

Angkon adong do dua pihak, anso porlu adong sahalak na gabe songon panonga-nongai. Hape anggo Debata nada porlu adong diSia na songon panonga-nongai harana langsung do Debata sandiri mangkarejohonsa.

1 TIMOTEUS 2:5

harana hum sada sajo do Debata jana sada muse do panonga-nongai ni Debata dohot jolma, i ma jolma Jesus Kristus.

IBRANI 10:22

Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan.

IBRANI 11:28

Hara ni haporsayaannia, dipatupa si Musa do Paskah jana dibaen ia parenta, angkon pispiskonon ni halak Israel mudar di pintu ni bagas ni halahi anso ulang dimatehon angka anak siangkaan ni halahi.

IBRANI 11:4

Hara ni na porsaya, gabe dihaulkon si Abel do tu Debata haul na dumenggan ulang pado haul na nihaulkon ni si Kain. Hara ni haporsayaannia i, dijagit Debata do si Abel gabe songon halak na dumenggan; angke tangkas do i tarida di na nijagit ni Debata na nihaulkonnia i. Madung mate nian si Abel, tapi hara ni haporsayaannia i, gabe mangkobari dope ia lopus tu sadari on.

IBRANI 13:20

Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata.

IBRANI 7:22

Jadi dao do dumenggan pamudun ni janji na nibaen ni Jesus i.

IBRANI 8:13

Jadi di na nidokNia sada ihot-ihot ni janji na imbaru, gabe nada hasaya be dibaen Debata ihot-ihot ni janji na parjolo i; jana sanga aha na so hasaya angkon manigor mago ma i.

IBRANI 8:6

Tapi saonnari madung dijagit Jesus karejo na dao sumurung. Angke dumenggan dope pamudun ni janji na nibaen antara ni Debata dohot jolma markite-hite Jesus na songon Pandomuina, angke na marojahan tu janji na dumenggan dope i.

IBRANI 8:8

Hape madung tardapot Debata hasalaan i di bangsoNa i, gabe didok Debata ma, “Ingot hamu ma, na ro ma hatihana, baenonKu ma janji na imbaru dohot bangsongKu Israel, dohot tu Marga Juda.

IBRANI 9:15

Jadi hara ni i do dibaen Debata sada janji na imbaru markite-hite Kristus, anso maruli pasupasu na so ra mantak angka halak na nipiohon ni Debata, i ma pasupasu na dung nijanjihon ni Debata. Tulus pe sudena i hara ni na dung adong do na mate, i ma Kristus; jana dipalua hamamateNia i ma halak sian angka hasalaan na nibaen ni halahi dompak margogo janji na parjolo i.

IBRANI 9:19

Jolo dipaboa si Musa do sude angka Tona na sian Debata tu bangso Israel sude. Baru ma dibuat ia mudar ni anak ni lombu dohot mudar ni hambeng jantan i, dicampur ia ma i dohot aek, dung i dipispiskon ia ma tu Buku Tona na sian Debata dohot tu sude bangso Israel. Ruput hisop dohot imbulu ni biri-biri na rara tobang do dibaen ia pamispisna.

IBRANI 9:21

Dung i dipispiskon ia muse ma laing songon nangkin mudar i tu bandar i dohot tu angka panjamaan na nipake marsomba tu Debata.

1 PETRUS 1:2

mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu.