IBRANI 12:16 - BIBEL JAMITA NA DENGGAN

¹⁶ Jagohon hamu ma anso ulang adong na gabe siparkamainan sanga na so mangargahon angka pangalaho na badia songon na nibaen ni si Esau. Digadis ia haknia songon anak siangkaan, hum hara ni samangkuk sipanganon.

IBRANI 12:16 ပူးပေါင်းရင်းမြစ်များ

PAMUNGKAAN 27:36

Didok si Esau ma, “Padua noli on ma dipaoto-oto ia au. Patut do antong si Jakob goarnia. Ma dibuat ia hakku siangkaan jana saonnari dibuat ia muse dope pasupasu na aturan di au. Na so adong be he pasupasu na asing di amang silehenonmu di au?”

MARKUS 7:21

Angke sian bagasan ni sada-sada halak, i ma na sian rohania, marroan angka pikiran na jahat na mambaen ia gabe mambaen na rogon, manangko, mamunu,

BAENON NI ANGKA RASUL 15:20

Tapi angkon laing tatongos ma surat tu halahi paingotkon halahi anso ulang dipangan halahi angka sipanganon na hodar na nihaulkon tu gana-ganaan, sanga markarosuan, sanga pe na mangankon pahan-pahanan na nisongkik sanga mangan mudar. Boti anso laing dipadao halahi dirina sian angka pangalaho na jorngang.

BAENON NI ANGKA RASUL 15:29

Ulang ma pangan hamu sipanganon na nihaulkon tu gana-ganaan, ulang pangan hamu mudar, ulang pangan hamu binatang na nisongkik, jana ulang ma adong sian hamu angka pangalaho na markarosuan. Muda dipadao hamu dirimunu sian angka pangalaho na songon i, na denggan noma baenonmunu. Horas ma di hamu, botima!”

1 KORINTUS 10:8

Nada tola hita marpangalaho na so ture songon na nibaen ni deba sian halahi. Angke hara ni na mambaen songon i, gabe mate dua pulu tolu ribu halak di bagasan sadari.

2 KORINTUS 12:21

Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.

EPESUS 5:3

Bangso ni Debata do hamu! Jadi anggo angka na rorang dohot angka parange na so tupa bope na ahut tu diri, nada tama be adong di tonga-tongamunu – hum tarbortik pe indangkon adong.

EPESUS 5:5

Ingot hamu ma on tangkas: Sanga ise na rorang pangalahona, sanga na so ture, sanga na sai ahut tu diri (sarupa tu na marsomba gana-ganaan do pangalaho na songon i), nada tarbaen halak na songon i gabe anggota ni bangso ni Kristus dohot Debata.

KOLOSSE 3:5

Hara ni i, matehon hamu ma angka hagiot ni portibi on na manyego-nyego dirimunu, i ma angka na mambaen na so ture, pangalaho na hodar, hisap ni sibuk, parhagiot na jahat, na songkal (halak na songkal sarupa do i dohot na marsomba gana-ganaan).

1 TIMOTEUS 1:9

Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma,

IBRANI 13:4

Dipatuduhon ganop halak ma sangap di parsaripeonna, hara ni i angkon burju do na mardongan saripe tu donganna saripe i. Halak na markamainan dohot na mambaen na so ture adilan ni Debata do i.

HALUMBAAN 21:8

Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i.”

HALUMBAAN 22:15

Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i.