HOSEA 9:15 - BIBEL JAMITA NA DENGGAN

¹⁵ Didok Tuhan ma, “Di Gilgal do mamungka sude hajahatan ni halahi i. Disi ma mamungka goyak rohangKu mida halahi. Hara ni jahat ni pambaenan ni halahi, paorotonKu noma halahi sian tanongKon. Nada holong be rohangKu tu halahi; madung sude pamimpin ni halahi mangalo tu Au.

HOSEA 9:15 ပူးပေါင်းရင်းမြစ်များ

MASMUR 78:60

Undung-undungNia na di Silo ditadingkon Ia, i ma inganan parmiananNia di tonga-tonganta.

JESAYA 1:23

Angka pamimpinmu halak na sai mangalo do jana kaki tangan ni panangko; sai dihagioti halahi do manjagit silua dohot suap. Nada unjung halahi ra mangondihon na so marama so marina di pangadilan; nada diampirkon halahi angka na mabalu na mangaduhon parkarona.

JEREMIA 11:15

Didok Tuhan ma, “Bangso haholongan ni rohangKu madung patupahon angka pangalaho na jat. Nada adong be hak ni halahi di BagasKu. Diambang halahi do tarolat halahi ma hamamago i marhite na mambaen angka janji dohot na manghaulkon angka binatang. Martua ma he halahi baenon ni karejo na songon i?

JEREMIA 12:8

Songon singa na marngaur di harangan, songon i ma bangsongKu na Hutodo i mangalo Au. I ma dalanna goyak rohangKu tu halahi.

JEREMIA 15:1

Didok Tuhan ma tu au, “Indada ra Au maribo ni roha mida bangso on, haru pe jongjong dison si Musa dohot si Samuel mangido ibo ni roha sian Au tu halahi. Suru ma kehe bangso on; nada jop rohangKu paida-ida halahi.

JEREMIA 3:8

Diligi ia, hara ni na manggampang ia madung Husirangkon Israel, dadaboru na murtad i, jana mangalehen tusia surat sirang: Tapi Juda, ibotonia dadaboru na so setia i nada mabiar, jana ia sandiri pe kehe do manggampang.

JEREMIA 5:5

Dumengganan ma au kehe tu angka halak na godang anso mangkatai dohot halahi. Anggo halahi pasti diboto halahi sanga aha hagiot ni Tuhan Debata ni halahi.” Hape halahi sude pe nada ra diparenta Tuhan; nada ra halahi mangoloi Ia.

JEHESKIEL 22:27

Songon sorigala na manyahe-nyahe soroanna do angka na marjabatan di pamarenta ni halahi. Mamunu jolma do halahi hum hara ni na manjalahi untung.

JEHESKIEL 23:18

Dung salpu i, torang noma ia marhamainan jana dipatondurkon ia hailaannia tu halak na bahat. Magigi Au midasa, songon gigi ni rohangKu mida angkangnia i.

HOSEA 1:6

Dung i denggan ma muse pamatang ni dadaboru i jana manubuhon sada dakdanak dadaboru. Didok Tuhan ma tu si Hosea, “Baen ma goar ni borumi si Lo-Ruhama, angke nada holong be rohangKu mida bangso Israel, jana nada ampunanKu be halahi.

HOSEA 1:9

Dung i didok Ia ma, “Baen ma goar ni anakmi si Lo-Ami, angke nada bangsongKu be hamu, jana nada Debatamunu Au.”

HOSEA 12:11

Madung manghobari Au tu angka panurirang, jana Hulehen bahat parnidaan tu halahi. Marhite sian halahi Hulehen do sipaingot tu hamu, bangsongKu

HOSEA 12:2

Sanga aha na nibaen ni halak Israel sian manyogot lalu tu potang, nada adong gunana jana hum na manyegohon do i songon alogo Habincaran. Mur manjadi-jadi do hageduhan dohot hakejamon di tonga-tonga ni halahi. Dipambaeni halahi angka parjanjian dohot Asur jana marboniaga halahi dohot Mesir.”

HOSEA 3:4

Songon i muse ma pangalaho ni bangso Israel; lolot halahi mangolu tapi nada adong rajana, nada marpamimpin nada adong haul, nada adong gana-ganaan, jana nada adong efod dohot terafim.

HOSEA 4:15

Ale hamu halak Israel, haru pe nada unduk hamu tu Au, sai ulang ma nian dohot Juda mambaen hasalaan na nibaenmunu i! Ulang maribadat di Gilgal sanga di Bet-Awen. Ulang baen hamu janji disi mangasahon goar ni Tuhan na mangolu i.

HOSEA 4:9

Jadi gabe markancit noma hamu laing songon rayat i! UhumanKu ma hamu hombar tu angka pambaenanmunu.

HOSEA 7:2

Na so unjung do mamolus di pikiran ni halahi, sai paingot-ingotonKu do sude hajahatan ni halahi i. Humaliang halahi do angka dosa ni halahi gabe tangkas do Huida sudena.”

HOSEA 9:17

Tulakkonon ni Debata na huoloi ma bangsoNa i, hara ni na so ra halahi manangihon Ia. Madang-adang noma halahi ditonga-tonga ni angka bangso.

HOSEA 9:3

Hamu ale halak Israel, nada tongtong hamu tinggal di tano na nilehen ni Tuhan tu hamu. Angkon mulak hamu tu Mesir jana angkon panganonmunu sipanganon na haram di Asur.

HAMALIMON 26:30

RoncohononKu ma inganan parsombaanmunu, angka na di tor, Hurumpakkon angka langgatan inganan panutungan ni hamonyan jana Hupardanggurkon angka bangkemunu tu angka gana-ganaan na marumpak i. Hara ni pangkilalaan na magigi.

AMOS 4:4

“Ro ma tu Betel jana karejohon ma angka na jat, tu Gilgal jana mur pahebat ma karejo na jat i! Pupu hamu ma manghaulkon haul i ganop ari, jana oban ma haul parsampuluanmu ganop di ari patoluhon!

AMOS 5:27

muda Hubuang hamu tu sada luat na dumao sian Damaskus, ninna Tuhan na margoar Debata Na Markuaso.”

AMOS 5:5

Ulang hamu kehe tu Berseba laho marsomba. Ulang jalahi hamu Au di Betel, angke na laho mago do Betel. Ulang kehe muse hamu tu Gilgal, angke na giot obanon do halak kota i tu habuangan.”

MIKA 3:11

Anso dapotan hepeng sogok do umbaen na mamarenta angka parkuaso ni kota, angka malim mangajarkon Uhum Ni Tuhan anso dapotan gaji, marjamita angka panurirang anso dapotan hepeng – dung i diambang halahi ma di pihak ni halahi Tuhan i. Didok halahi ma, “Di tonga-tonganta do Tuhan; nada pola ro parmaraan tu hita.”

MIKA 6:5

“Ale bangsongKu, ingot hamu ma sanga aha na nisangkapan ni si Balak raja ni Moab i tu hamu, jana aha do alus ni si Bileam anak ni si Beor i tusia. Ingot hamu ma sanga aha na tarjadi di pardalanan antara ni parbandaran na di Sitim dohot na di Gilgal. Anggo diingot hamu do sudena i, torang do botoonmunu sanga aha na dung Hupatupa laho paluahon hamu.”

ZEPANYA 3:3

Songon singa na marngaur-ngaur do angka pamimpin ni kota i. Angka hakimna pe songon angka sorigala na malean do; santak do lahap ni halahi, sada holi-holi pe nada adong na tading tu ancogot ni halahi.

ZAKARIA 11:8

Jadi huabiskon ma parmahan na tolu i di bagasan sabulan, harana goyak do rohangku tu angka biri-biri i jana halahi pe goyak do rohana tu au.

BAENON NI ANGKA RASUL 4:27

Tutu do songon i. Angke marlagut do si Herodes dohot si Pontius Pilatus rap dohot halak na so mananda Tuhan bope halak Israel di kota on. Marlagut do halahi laho mangalo Jesus NaposoMu Na Badia i, na NimiahanMi,

BAENON NI ANGKA RASUL 5:21

Dioloi halahi ma hata i. Sogot dope manyogot i kehe ma halahi tu Bagas Ni Debata, mangajari ma halahi disi. Jadi ro ma Malim Godang i dohot angka donganna i, dibaen halahi ma rapot pangurus ni ugamo rap dohot hatobangon ni halak Jahudi. Dung i disuru alap halahi ma rasul i sian hurungan.

JOSUA 10:43

Dung salpu i, mulak ma si Josua dohot tentarania i tu parbandaran na di Gilgal.

1 SAMUEL 7:16

ganop taon sai diliati si Samuel do tu Betel, Gilgal dohot Mispa. Jana dipasidung ia ma disi angka parkaro parsalisian.