HOSEA 9:10 - BIBEL JAMITA NA DENGGAN

¹⁰ Didok Tuhan ma, “Di mulana marsuo Au dohot Israel marjop ni roha do Au songon dia bayo na dapotan batu ni anggur di padang halongonan. Di na parjolo situtu Huida angka ompumunu, sonang noma rohangKu songon halak na marnida patumonaan ni batu ni ara. Tapi di na kehe halahi tu Dolok Peor, mamungka ma halahi marsomba Baal, jadi gabe hodar ma halahi songon debata na nihaholongan ni halahi i.

HOSEA 9:10 ပူးပေါင်းရင်းမြစ်များ

1 RAJA-RAJA 16:31

Nada tuk dope disia ngolu pardosaon songon Raja Jerobeam i, dibuat ia dope si Isebel boru ni Raja Etbaal na sian Sidon, gabe marsomba tu Baal ia.

2 RAJA-RAJA 17:11

Ditutung halahi muse do hamonyan di sude langgatan ni debata songon hasomalan ni angka bangso na dung diusir ni Tuhan sian Luat Kanaan. Marsomba gana-ganaan do halahi, haru pe na dung dilarang ni Tuhan. Sude na jahat na dibaen halahi paro muruk ni Tuhan.

MASMUR 115:8

Sai songon i ma nian bagian ni na paturehonsa, maradu sude angka halak na manghaporsayaisa.

MASMUR 81:12

Gabe Hupadiar noma halahi papir rohana, jana marsibaen roha-rohana.

ENDE NA GODANG 3:6

Ise dehe i na ro sian padang-padang an, tarsongon timus na suman tu tiang? Huskusna songon mur dohot dupa, dupa na nigadis ni parboniaga.

JESAYA 28:4

Mur mago ma habonggalonna i na dung mamungka mangkohom. Nada adong be tarida partinggalna, songon batu ni ara na parjolo diputik jana manigor dipangankon.

JEREMIA 11:13

Sun do bahatna debata ni halak Juda, sarupa dohot bahat ni kota ni halahi. Madung dipajongjong halak Jerusalem angka langgatan sabahat ni angka dalan di kota Jerusalem, i ma parhaulan ni haul tu Debata Baal sihagigian i.

JEREMIA 24:2

Karanjang na sada marisi batu ni ara na jeges-jeges, songon patumonaan ni batu ni ara, tapi anggo karanjang na sada nari marisi batu ni ara na busuk-busuk do, gabe nada tarpangan.

JEREMIA 3:24

Anggo na manyomba tu Baal, gana-ganaan na pailahon i hum na mambaen hamamago do i tu angka dakdanaknami dohot tu lombu maradu biri-biri, i ma sasudena na dung dikarejohon ni ompunami mamungka sian narobi.

JEREMIA 3:25

Jadi padiar ma maila hami jana padiar ma marlayas hami. Angke madung mardosa hami dohot ompunami maradopkon Tuhan Debatanami, jana nada jungada hami oloi angka parentaNia.”

JEREMIA 31:2

Hupatuduhon holong ni rohangKu di padang halongonan tu halahi na dung malua sian hamatean. Dompak na manjalahi hademahan Israel,

JEREMIA 5:31

Angka panurirang manghatahon gabus jana angka malim mangajarkon hagiotna sambing. Jana i do na diparhagiot ni bangsongKu. Tapi muda ro ari parpudi, aha ma sibaenonmunu?”

JEHESKIEL 20:8

Tapi dialo halahi do Au jana nada ditangihon halahi. Nada ra halahi mangambungkon angka patung sihagigian i jana nada ra halahi mantak marsomba tu gana-ganaan ni Mesir i. Dompak disi dope halahi madung hobas Au palalu murukKu tu halahi.

HOSEA 11:1

Didok Tuhan ma, “Huhaholongi do Israel mamungka sian hamenehannia, Hupio anakKi ruar sian Mesir.

HOSEA 13:5

Di tano na harsang di padang halongonan, Au do na manjagohon hamu.

HOSEA 2:15

PaulahonKu ma tusia angka kobun anggurna, jana Rura Akhor baenonKu ma gabe pintu ni arop ni roha. Sambutonnia ma Au disi songon di haposoonna, tingki baru haruar ia sian Mesir.

HOSEA 4:14

Tapi nada uhumonKu halahi hara ni i, angke hamu sandiri pe kehe do tu angka panggampang na markarejo di angka bagas parsombaan, jana dihaulkon hamu do haul tu debata rap dohot halahi. Tutu situtu ma da na nidok ni pandohan on, ‘Jana bangso na so marpangastuion angkon maronco.’

HOSEA 4:18

Dung mabuk halahi hara ni na mabahattu minum anggur, sonang ma roha ni halahi manggampang. Jumop noma roha ni halahi marlayas ulang dipasangap.

AMOS 4:5

Datdati hamu ma na manghaulkon roti mandok tarimakasi tu Au, jana toruskon hamu ma mamburas paboa na dung dioban hamu tamba-tamba ni haulmunu! Nada he songon i do diparhagiot rohamunu ale halak Israel?” Songon i ma didok Tuhan Debata.

MIKA 7:1

Marjaya ma au! Harana parngoluonku songon dompak papunguhon batu ni anggur di ari logo, songon dompak painte masa parbatu ni anggur, nada adong anggur na giot sipanganon, dohot parbatu ni ara na huhajopkon.

BILANGAN 15:39

Hasaya ni rambu-rambu i gabe parningotan ma i. Ganop diida hamu i ingotonmunu ma sude parentangKu jana angkon patulusonmunu. Jadi hara ni i nada hudukkononmunu be Au giot patuluskon lungun ni rohamunu dohot hagiotmunu sandiri.

BILANGAN 18:13

Sudena i gabe bagianmu. Sude halak di bagas i na dung ias mangihutkon ugamo, tola dohot mangankonsa.

SURAT NI SI PAULUS TU PARLAGUTAN ROM 6:21

Antong, parbatu aha ma na dapot hamu sian i? Sudena i mambaen hamu maila saonnari, angke hamatean do ujung ni i.

PANGARATAION 32:10

Dapot Ia halahi hatiha diparedang-edangan, di na lungun boti na harsang di halongonan. Dipahan Ia halahi antong jana diondihon Ia, songon na manjagohon di diriNa.

PANGARATAION 32:17

Marhaul halahi tu angka sombaon angka debata na so ditanda, sanga na so dihabiari angka ompuna.

PANGARATAION 4:3

Diida hamu sandiri do sanga aha na nibaen ni Tuhan di Dolok Peor. Sandok halahi na marsomba Baal di inganan i, dipusa Ia do,

HAKIM-HAKIM 6:32

Hara ni na nidok ni si Joas, “Padiar ma Baal sandiri mangalo si Gideon, dibaen madung dirorak ia langgatanna,” jadi sian hatiha i digoari halak ma si Gideon “Jerubaal”.