HOSEA 8:5 - BIBEL JAMITA NA DENGGAN

⁵ Goyak rohangKu paida-ida lombu sere na nipasomba-somba ni halak kota Samaria. Marpiar do murukKu tu halahi. Sadia honok nari sai sombaon ni halahi torus gana-ganaan i?

HOSEA 8:5 ပူးပေါင်းရင်းမြစ်များ

2 JUJUR TAON 13:8

Saonnari diambang ho ma lakna tarbaen mangalo kuaso na nilehen ni Tuhan tu pomparan ni si Daud, hara ni godang ni pasukanmu dohot hara ni na adong angka lombu seremunu na nibaen ni si Jerobeam gabe debatamunu.

MASMUR 19:13

Padao ma au sian dosa na nisangajo, ulang padiar au dikuasoi. Jadi gabe jolma na sun denggan ma iba, jana malua sian hajahatan ni dosa.

PODA 1:22

Ninna do, “Ale hamu angka jolma na oto! Intap ni andigan do giotmunu sai tongtong maoto? Andigan pe ra hamu mantak palayaskon parbinotoan dohot na manulakkon pangajaran?

JESAYA 45:20

“Ro ma hamu jana marlagut, hamu sude na malua sian tonga-tonga ni angka bangso. Angka halak na mangudur-udurkon patung hayu-hayu, na so marbinoto boti na oto; na martangiang tu angka debata na so bisa mambaen malua.

JEREMIA 13:27

Madung Huida hamu patupahon angka pangalaho na Huhagigihon. Huida do hamu markarosuan jana manggampang di angka dolok dohot di angka ladang. Marjaya ma hamu halak Jerusalem! Andigan pe hamu giot malua sian sandok hajahatan?”

JEREMIA 4:14

O Jerusalem, ambungkon ma hajahatan sian bagasan rohamu anso dipalua ho. Sadia honok nari angka pikiran na jahat i sai simpan-simpanonmu di bagasan rohamu?

JEREMIA 48:13

Tarhirim ma Moab maradopkon Kamos debata ni halahi i, tudos songon Israel na tarhirim i maradopkon Betel na nipangasahon ni halahi i.

HOSEA 10:5

Mabiar ma halak Samaria; marsak jana tangis ma halahi dohot angka malim na mangkobasi lombu sere na di Bet-Awen i hara ni parmago ni hajagaron ni gana-ganaan ni halahi.

HOSEA 10:8

Angka bagas pamelean na di angka tor Awen inganan pamelean ni halak Israel, roncohonon noma i. Martubuan ma duhut dohot duri di langgatan ni halahi i. Dung i marsurak ma halahi pio-pio tu angka dolok, “Ondingi ma hami!” dohot tu angka tor, “Dondoni ma hami!”

HOSEA 13:2

Lopus saonnari laing torus dope mardosa angka halak Efraim i; dipambaeni halahi do angka patung sian perak na nirangrangan ni akal ni jolma jana na nigana ni tangan ni jolma lalu disomba ma i. Didok halahi, “Pelehon ma haul tu angka patung on!” Padiar ma diummai jolma i angka anak ni lombu i!

HOSEA 8:6

Lombu sere na di Samaria i karejo ni tangan ni angka na pande do i di Israel! Nada Debata na nisomba ni halahi i, jadi angkon taporhonon do i!

AMOS 8:14

Angka jolma na marsumpa mangasahon gana-ganaan ni Samaria na mandok, ‘Mangasahon goar ni debata ni bangso Dan’, sanga, ‘Mangasahon debata ni Berseba’ – tinggang noma i jana nada tarsunggul-tarsunggul be.”

MIKA 1:7

Angka patungna sigodang arga i diropuk, sude na dilehen tu angka dadaboru na markarejo di bagas pamelean i hona tutung, jana sude gana-ganaanna i disegohon. Dijagit Samaria do sudena i gabe sipakeonna di bagasan ibadatna tu debata hagabean. Saonnari obanon ni angka musuna noma sudena i gabe ibadat di inganan na asing.”

BAENON NI ANGKA RASUL 7:41

Jadi dibaen halahi ma hatiha i sada patung ni anak ni lombu, dung i dipelehon halahi ma haul tu patung i jana marpesta ma halahi pasangapkon barang na nibaen ni tangan ni halahi sandiri.

PANGARATAION 32:22

Mamulatak ma murukKu songon api na mangabiskon sasude na di portibi. Api na rarat lalu tu taruma ni tano i manutung dolok lalu tu angka uratna i.