HOSEA 8:14 - BIBEL JAMITA NA DENGGAN

¹⁴ Dipajongjong halak Israel angka bagas godang hape lupa halahi tu Panompa ni halahi. Dibangun halak Juda angka kota na marbenteng, hape paijuronKu ma api laho manyurbu lopus abis angka bagas godang dohot angka kota ni halahi i.”

HOSEA 8:14 ပူးပေါင်းရင်းမြစ်များ

1 RAJA-RAJA 12:31

Dipambaeni si Jerobeam muse ma angka inganan paribadatan di angka puncut ni dolok, diangkat ia ma angka malim sian tonga-tonga ni marga na so masuk tu Marga Levi.

1 RAJA-RAJA 16:31

Nada tuk dope disia ngolu pardosaon songon Raja Jerobeam i, dibuat ia dope si Isebel boru ni Raja Etbaal na sian Sidon, gabe marsomba tu Baal ia.

2 RAJA-RAJA 18:13

Di taon paopat bolaskon dung mamarenta Raja Hiskia, diporangi si Sanherib raja ni Asur ma angka kota na marbenteng di Juda lopus ditaluhon.

2 JUJUR TAON 26:10

Laing dipajongjong ia muse ma angka palas-palas na marbenteng di luat padang-padang jana dihuar ia bahat sumur hara ni bahatna pahan-pahanannia di angka partoran na hornop bope di tano napa na toruk na di sabola Hasundutan. Dibaen tartarik do rohania tu partanian, dianjurkon ia do tu rayat i anso manyuan anggur di angka luat na mardolok dohot manggarap luat na napu.

2 JUJUR TAON 27:4

Dipajongjong ia ma angka kota di partoran Juda dohot angka benteng maradu palas-palas di harangan.

MASMUR 106:21

Dihalupahon halahi do Debata na paluahon halahi, na dung patupahon angka pangalaho na godang di Mesir,

MASMUR 95:6

Beta ma hita tungkap, jana marsinggang ma hita tu jolo ni Tuhan na manompa hita.

JESAYA 17:10

O Israel, madung dihalupahon ho Debata na paluahon dohot na manjagohon ho songon dolok batu na tohong. Balik do, madung disuani ho angka kobun laho marsomba angka debata.

JESAYA 29:23

Muda diida hamu angka dakdanak na Hulehen tu hamu, gabe okuonmunu ma, Au do Debata Na Badia ni Israel. Pasangaponmunu ma Au, jana mabiar mida Au.

JESAYA 42:13

Ruar do Tuhan marporang songon ulubalang, madung hobas Ia, gogo do rohaNia laho marporang. Digora Ia ma pio-pio di parporangan, patuduhon kuasoNia di paraloan.

JESAYA 42:25

Jadi gabe disombabkon Ia ma rimas ni rohaNia tu hita, jana dipamasa Ia porang na mambaen hita susa. Marsigorgor do murukNia pangabiskon halahi, hape nada i taboto jana nada marsiajar hita sian na tarjadi.

JESAYA 43:21

Madung Hubaen bangso Israel gabe hapunjunganKu, laho mangendehon puji-pujian di Au.”

JESAYA 9:10

“Madung mangkarumpak angka bagas na sian batu bata, tapi baenonnami ma angka bagas na imbaru sian batu. Ma pola nitabaan angka balok sian hayu ara; gontionnami ma i dohot hayu sampinur Libanon na dumenggan i.”

JESAYA 9:9

Padiar ma sude bangso i umbotosa, i ma Efraim dohot rayat Samaria na marhite gakgak dohot ginjang ni rohana mandok,

JEREMIA 17:27

Tarjadi ma sudena i muda dung marpangoloion hamu tu Au jana diparbadia i hamu Ari Sabat i songon ari na mardohonan. Ulang maroban barang bagi aha pe hamu mamolus sian angka horbangan ni Jerusalem anggo di ari i. Muda dilanggar hamu do angka na Huparentahon i, tutungonKu abis angka horbangan ni Jerusalem i dohot angka bagas godang na disi jana nada haintopan api i.’ ”

JEREMIA 2:32

Adong ma he bujing-bujing na manghalupahon barang parhiasanna? Sanga boru na manghalupahon bayo na mambuatsa? Hape anggo Au madung dihalupahon hamu mamungka sian hatiha na so taretong be honokna.

JEREMIA 23:27

na mambaen bangsongKu mangkalupahon Au, marhite nipi na dicaritohon sian na sada tu na asing, songon ompu ni halahi na manghalupahon goarKu hara ni Baal.

JEREMIA 3:21

Tarbege do sora ni na gaor di puncu ni angka dolok; i ma sora ni halak Israel na martangisan jana mangido-ido hara ni na dung mardosa halahi jana lupa tu Tuhan Debata ni halahi.

JEREMIA 5:17

Pangabison ni halahi ma suha ni tano dohot panganonmunu jana bunuonna ma angka dakdanakmunu. Sambolon ni halahi ma angka lombu dohot pahan-pahananmunu, jana segohonon ni halahi ma angka kobun anggur dohot bona ni hayu aramunu. Roncohonon ni halahi ma angka kota na marbenteng na sai dipangasahon hamu.

JEHESKIEL 23:35

Didok Tuhan Debata i ma, “Hara ni na dihalupahonmu Au jana dihudukkon ho, manaon parkancitan noma ho patunda ni gogo ni hagiotmu dohot parhamainonmu.”

HOSEA 13:6

Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

HOSEA 2:13

UhumanKu ma ia hara ni angka ari-ari na nipakenia manutung dupa tu Baal, jana mangias, mamake barang parhiasannia jana mangkojar angka haholongannia. Dihalupahon ia situtu do Au anggo di angka ari i. Au do Tuhan na mandok songon i.

HOSEA 4:6

Hamu angka malim nada parduli hamu di Au, gabe songon i muse ma bangsongKu nada parduli be tu Au, lopus marjaya halahi. Ditulak hamu do angka pangajaranKu. Jadi Au pe tulahonKu noma hamu, jana nada Huokui angka dakdanakmunu gabe malim di Au.

AMOS 1:10

Hara ni i tongosonKu ma api tu angka tembok ni kota Tirus, jana surbuonKu sude angka bentengna i.”

AMOS 1:12

Hara ni i tongosonKu ma api tu kota Teman jana surbuonKu lopus abis angka benteng ni Bosra.”

AMOS 1:14

Hara ni i, tongosonKu ma api tu angka tembok ni kota Raba, jana surbuonKu lopus abis angka bentengna i. Tarbege ma disi hagaoron ni sora ni porang, jana mur jebu ma porang i songon pangalingkup ni ombak.

AMOS 1:4

Hara ni i tongosonKu ma api tu bagas godang ni Raja Hasael, jana surbuanKu sude angka benteng ni Raja Benhadad.

AMOS 2:5

Hara ni i, tongosonKu ma api tu Juda jana surbuonna ma lopus abis angka benteng ni Jerusalem.”

EPESUS 2:10

Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita.

PANGARATAION 32:18

Ditadingkon halahi do Debata Sipalua, Tuhan silehen ngolu dihalupahon.