HOSEA 8:1 - BIBEL JAMITA NA DENGGAN

¹ Didok Tuhan ma, “Palu ma sarune, paboa na ro parmaraan! Tudos tu halihi na manangkup soroanna do musu ro mamorangi tanongKi! Dilaosi bangsongKi do parjanjianKu dohot halahi jana dialo angka pangajaranKu.

HOSEA 8:1 ပူးပေါင်းရင်းမြစ်များ

2 RAJA-RAJA 18:27

Dialusi parpangkat i ma, “Ulang diambang hamu diutus raja Asur au laho palaluhon sudena on tu hamu dohot tu rajamunu i sajo. Laing dohot do tu rayat na di tembok i hami mandok hata, na rap mangankon kotoranna dohot hamu sandiri dohot na minum aek na menekna sandiri.”

JESAYA 18:3

Hamu sude angka na maringanan di tano on! Parrohahon hamu ma muda dung dipanaek mandera di puncut ni angka dolok! Tangihon hamu ma muda dipalu sarune!

JESAYA 24:5

Hodar ma tano on patunda ni na nilaosan ni pangisina angka parenta, na manguba aturan jana manggagai janji.

JESAYA 58:1

Marsurak ma sagogomu, ulang ma tahan-tahan. Marsurak ma sagogomu songon sarune. Paboa ma tu bangsongKu taringot tu hasalaan ni halahi dohot tu pomparan ni si Jakob taringot tu dosa ni halahi!

JEREMIA 31:32

Tapi nada sarupa parjanjian i dohot parjanjian na Hubaen tu ompu ni halahi di na Hutogu halahi haruar sian Mesir. Haru pe Au songon halaklahi ni halahi, tapi digagai halahi do parjanjianKu dohot halahi.

JEREMIA 34:18

Madung mambaen parjanjian tu Au angka pangituai ni Juda dohot Jerusalem rap dohot angka pagawe ni bagas godang, angka malim dohot sandok pamimpinna. Disambol do lombu laho mangarasmihon parjanjian i, diponggol dua ma lombu i jana mamolus ma sian antara ni ponggolanna na dua i. Hape dilaosi halahi muse do parjanjian i jana nada digohi halahi angka saratna. Hara ni i baenonKu ma tu halahi songon na nibaen ni halahi tu lombu i.

JEREMIA 4:13

Ligi da, marmuldopan musu i songon ombun. Angka kareta porangna i songon halingsungsung, angka kudona i humipas sian unggas rajawali. Marjaya ma hita on! Mago ma hita!

JEREMIA 4:5

Palu hamu ma sarune di sude luat on! Tangkas ma marsurak jana marsora na gogo. Suru hamu ma halak Juda dohot Jerusalem marlojong tu angka kota na marbenteng.

JEREMIA 48:40

Didok Tuhan ma, “Songon halihi na habang, tudos tusi ma sada bangso giot ro manyoro Moab.

JEREMIA 49:22

Songon halihi na habang, songon i ma panyoro ni musu i tu Bosra. Di ari i, mangae ma tentara ni Edom songon dadaboru na giot hipas.”

JEREMIA 51:27

“O ale raja na sian Utara! Lehen ma tanda laho manyerang! Palu ma sarune anso dibege angka bangso! Arahon ma angka bangso laho marporang mangalo Babel! Suruhon ma harajaan Ararat, Mini dohot Askenas manyerang. Angkat ma sada halak ulubalang laho manguluhon porang i. Oban ma kudona sabahat ni siapor.

JEREMIA 6:1

Kehe ma hamu mangungsi, hamu halak Benyamin! Tadingkon hamu ma Jerusalem! Palu hamu ma sarune di Tekoa, jana pagara hamu ma api mangalehen tanda di Bet-Kerem! Ro ma parmaraan dohot hamamago sian Utara.

JEHESKIEL 11:4

Hara ni i palalu ma tonangKu adop halahi, palalu ma tonangKu, ‘Ale anak ni jolma!’ ”

JEHESKIEL 16:59

Didok Tuhan Debata i ma, “BaenonKu ma tu ho hombar tu karejomu, dibaen madung disoadahon ho sumpamu boti dilaosi ho parjanjianKu dohot ho.

JEHESKIEL 17:3

Anso diboto halahi na hudok: Adong ma sada unggas rajawali na godang, na jeges imbuluna, jana habongna i ginjang boti gogo. Habang ma ia tu Dolok Libanon, jana ditipulkon ia ma sada pusuk ni sada sampinur,

JEHESKIEL 7:14

Mangkuling ma sarune, dung i markobas ma sude halak. Tapi sahalak pe nada adong na kehe tu galanggang ni parporangan, angke sude jolma do didondoni rimas ni Debata.

HOSEA 4:6

Hamu angka malim nada parduli hamu di Au, gabe songon i muse ma bangsongKu nada parduli be tu Au, lopus marjaya halahi. Ditulak hamu do angka pangajaranKu. Jadi Au pe tulahonKu noma hamu, jana nada Huokui angka dakdanakmunu gabe malim di Au.

HOSEA 5:8

Palu ma sarune di Gibea! Baen ma tanda ni pio-pio marporang di Rama! Surakkon ma surak-surak parporangan di Betel! Maju ma marporang, hamu halak Benyamin!

HOSEA 6:7

Tapi songon si Adam, digagai hamu do janjimunu dohot Au.

HOSEA 9:15

Didok Tuhan ma, “Di Gilgal do mamungka sude hajahatan ni halahi i. Disi ma mamungka goyak rohangKu mida halahi. Hara ni jahat ni pambaenan ni halahi, paorotonKu noma halahi sian tanongKon. Nada holong be rohangKu tu halahi; madung sude pamimpin ni halahi mangalo tu Au.

JOEL 2:1

Palu ma sarune di Sion jana marsurak ma di dolok ni Debata na badia i. Humitir ma sude pangisi ni luat angke dapot ne ma ari ni Tuhan, angke madung donok ari i.

JOEL 2:15

Ombus ma sarune di Sion, di dolok ni Debata, parentahon rayatmi anso marpuaso; patupa muse sada ari na godang parpunguanna.

AMOS 3:6

Nada he humitir halak muda tarbege sora ni sarune tanda ni gore ni porang? Hona parmaraan dehe sada kota, anggo so Tuhan manongoskonsa?

AMOS 8:3

Gabe partangisan noma angka ende-ende na di bagas godang anggo di ari i. Marragean angka bangke sap ro di dia, angka na diambungkon sip-sip.”

AMOS 9:1

Huida ma Tuhan jongjong di lambung ni sada langgatan. Dilehen Ia ma parenta songon on, “Toko ma gogo-gogo angka ulu ni tiang i anso humutur sude emperna i. Rumpakkon angka tiang i tu ginjang ni ulu ni angka jolma i. Angka na so mate disi, Hubunu marhite podang. Sahalak pe nada tarbaen paluahon dirina; sahalak pe nada adong na malua.

HABAKUK 1:8

Humipas do kudo ni halahi sian babiat jana gumanas do sian sorigala na malean borngin-borngin. Marroan do angka paranganna na markudo sian angka luat na dao; marroan halahi songon halihi na manyoro soroanna.

ZEPANYA 1:16

Tarbege ma sadari i sora ni sarune dohot surak-surak ni porang sian angka parporang na mangaroro tu angka kota na marbenteng dohot angka palas-palas na gincat.

ZAKARIA 11:1

O ale Libanon ungkap ma angka pintumi! Anso dipangan api angka bona ni arami

ZAKARIA 9:14

Pataridahonon ni Tuhan ma diriNa tu bangsoNa, songon hipas ni hilap ditembakkon angka anak ni siorNa. Ombuson ni Tuhan Debata ma sarune lalu mardalan maju di bagasan angin na gogo na sian Selatan.

MATEUS 24:28

“Sanga di dia adong bangke, marrongom do disi angka unggas sipangan bangke.”

1 KORINTUS 15:52

Di bagasan sangkidop mata do i sudena tarjadi, di na nipalu sarune na parpudi situtu. Angke dung tarbege sora ni sarune i, pangoluon ma mangulahi angka jolma na mate i marpamatang na manongtong jana paubaon ma hita sudena.

PANGARATAION 28:49

Paroon ni Tuhan ma sada bangso na so mangarti ho hatana, sian ujung ni tano on laho mangalo ho. Songon rajawali do halahi manyoro ho.