HOSEA 4:7 - BIBEL JAMITA NA DENGGAN

⁷ Mur martamba bahatmunu, mur mardosa muse do hamu tu Au, ale angka malim! Harana angkon paubaonKu do na masa tu hamu. Nada pasangapon be hamu tapi palayason noma.

HOSEA 4:7 ပူးပေါင်းရင်းမြစ်များ

ESRA 9:7

Mamungka sian zaman ni angka ompunami lopus saonnari, sai mardosa do hami bangsoMon tu Ho. Patunda ni i ma umbaen na talu hami, angka rajanami dohot angka malimnami dibaen angka raja na asing i. Hona bunu hami, disamun dohot dihaldung gabe taban. Madung dipalayas hami marabis-abis, songon pangalaho na masa di ari sadari on.

HOSEA 10:1

Tudos tu bona ni anggur na ramos marbatu do Israel. Mur martamba-tamba sinadonganna, mur bahat angka langgatan na nibaenna. Mur tamba denggan tano i, mur jeges muse dibaensa angka tugu ni gana-ganaan na nisombana i.

HOSEA 10:6

Obanon ma gana-ganaan i tu Asur anso dilehen gabe silua di raja godang i. Maila ma Israel jana marlayas hara ni na dohot mangihutkon gana-ganaan i.

HOSEA 13:14

Giot paluaonKu dehe bangso on sian kuaso ni inganan ni jolma na mate? Jo hamatean, sarsarkon ma balamu! Padalan ma karejomu na manyegohon i! Nada be ibo rohangKu mida bangso on.

HOSEA 13:6

Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

HOSEA 4:10

Panganonmunu do nian sian angka haul na nihaulkon i, hape tongtong malean. Sombaonmunu ma angka debata hagabean, tapi laing nada maruntungan hamu, angke madung ditadingkon hamu Au laho marsomba hamu tu angka debata.”

HOSEA 5:1

Didok Tuhan ma, “Tangihon hamu ma ale angka malim! Parrohahon ma ale halak Israel! Bege ma, ale hamu angka jolma pomparan ni raja! Madung didabu uhum tu hamu. Angke, sapatutna nian angkon tigor do hamu manguhumi, hape balikna i do gabe tudos tu jorgong do hamu di Mispa, songon jorat di Dolok Tabor,

HOSEA 6:9

Songon punguan ni panyamun na mangambat halak pamolus do angka malim na di kota i. Salang di dalan laho tu inganan na badia di Sikem pe puluk do halahi mamunu jolma! Disangajo halahi do mambaen hajahatan i sude.

HOSEA 9:11

Habang noma hagodangan ni Israel mago songon unggas; nada adong be na mardenggan pamatang jana nada adong be dakdanak na sorang.

HABAKUK 2:16

Saonnari geleranmu noma pailaon, jana nada na giot dipasangap. Muba ma hasangapanmu gabe habilean. Paksaon ni Tuhan noma ho minum sian panginuman na marisi uhuman. Minum ma ho lopus mabuk jana lenong-lenong.

MALEAKI 2:9

Jadi Au sian pihakKu, baenonKu ma halak Israel marlayas ni roha tu hamu hara ni na so dioloi hamu hagiotKu, dohot hara ni na marnida bohi hamu dompak mangajari bangsongKu.”

PANGARATAION 32:15

Gabe maradong bangso ni Tuhan, tapi sai tagi mangalo, ditulak halahi do Sipalua na gumogo. Mamokmohi halahi, butongan sipanganon. Ditadingkon halahi do Debata Na Manjadihon.

PILIPPI 3:19

Anggo ujungna angkon gabe sego do ngolu ni halak sisongon i, angke na martuhankon hagiot ni pamatangna sandiri do halahi. Angka pangalaho sihailahononkon, hape gabe i do na niargahon ni halahi; angke hum angka na mardomu tu tano on sajo do na nisarihonna.

1 SAMUEL 2:30

Au Tuhan Debata ni Israel, na dung Hujanjihon do najolo, horongmu dohot margamu do na giot parkobas di Au gabe malim sapanjangna. Tapi saonnari Au mandok, nada Huhagioti be na songon i! Angka na pasangapkon Au do na giot pasangaponKu tapi anggo na palayas Au, palayasonKu do.