HOSEA 3:4 - BIBEL JAMITA NA DENGGAN

⁴ Songon i muse ma pangalaho ni bangso Israel; lolot halahi mangolu tapi nada adong rajana, nada marpamimpin nada adong haul, nada adong gana-ganaan, jana nada adong efod dohot terafim.

HOSEA 3:4 ပူးပေါင်းရင်းမြစ်များ

PAMUNGKAAN 31:19

Topet do hatiha kehe si Laban manggusting angka biri-birina, jana disi ma ditangko si Rahel dewa parsaripeon nampuna ni amangnia i.

PAMUNGKAAN 31:34

Jadi di hatiha i ma dipaimbar si Rahel dewa i dipamasuk ia tu bagasan palano ni unto, hape dijuguhi ia muse do palano i. Sude ma dipareso ia bandar ni si Rahel i, hape na so dapotnia do dewa i.

PAMUNGKAAN 49:10

Tiopon ni si Juda ma tungkot harajaon. Mamarenta ma pomparanna sapanjangna. Marroan ma angka bangso pasahat somba-sombana. Jana manungkap tanda tunduk di jolona.

2 SAMUEL 6:14

Dung i marsitutu ma si Daud manortori laho pasangapkon Tuhan. Pakeannia di hatiha i, i ma baju efod na sian abit linen.

2 RAJA-RAJA 23:24

Laho patuluskon angka tona na tarsurat di buku na dapot ni Malim Godang Hilkia di Bagas Ni Debata i, dipaorot Raja Josia ma sian Jerusalem dohot sude Juda sanga ise na marpio sumangot dohot partondung, jana diambungkon sude debata ni rumahtangga, gana-ganaan dohot barang-barang na nipake laho mamele angka debata.

2 JUJUR TAON 15:2

jadi gabe kehe ma ia mandapotkon Raja Asa, jana didok ia ma, “Ale Raja Asa, dohot sude halak na maringanan di Juda dohot Benyamin! Tangihon ma! Donok do Tuhan tu hamu muda donok hamu tuSia. Muda mangido panogu-noguon hamu tuSia, lehenonNia ma i. Tapi muda nada parduli hamu diSia, Ia pe nada parduli di hamu.

HARURUAR 28:4

Dok ma anso dibaen angka tukang i panutup ni andora, sada baju efod, sada mantel, sada baju na nisulam, sada saroben dohot bobat. Angkon baenon ni halahi do pakean malim on di si Harun angkangmi dohot di angka dakdanaknia, anso taroloi halahi Au songon pangoloi ni malim.

HARURUAR 28:6

Dok ma dibaen angka tukangna i baju efod sian wol na rata langit, na bunga torung dohot na rara, bonang sere dohot linen na halus, na ni pajeges dohot sulam-sulaman.

ANDUNG 2:9

Ditutup tano angka horbanganna, marponggolan dohot angka goruk-gorukna; di habuangan noma raja dohot na umboto mamarenta. Uhum Ni Tuhan nada be diajarkon; panurirang pe nada be manjagit boa-boa sian Tuhan.

JEHESKIEL 19:14

Jana rarat ma api sian bulung ni hayu anggur i laho manganhon parbatuna, gabe nada adong be dangka na togos jana nada adong be tungkot harajaan. Ende andung-andung do on jana pakeon gabe ende andung-andung tu joloanon.

JEHESKIEL 20:32

Giotmunu nian tudos ma hamu dohot angka bangso na asing i dohot tu halak na maringanan di tano sileban na manyomba hayu dohot batu. Tapi nada lalu anggo giot ni rohamunu.’ ”

JEHESKIEL 21:21

Jongjong ma raja ni Babel di lambung papan tudu-tudu ni dalan i. Laho manontuhon sanga dalan dia na giot bolusonnia, sapaannia do i gana-ganaannia, hursuhonnia pana jana paresoonnia ate-ate ni binatang na baru dipelehon.

JEHESKIEL 21:31

PalaluonKu ma tu ginjangmunu muruk ni rohangKu na gara-gara i. Jana pasahatonKu ma hamu tu angka jolma na jingar na dung somal mamatehon.

DANIEL 11:31

Ramun ma inganan na badia i baenon ni piga-piga halak sian tentarania i. Soadahonon ni halahi ma haul siganop ari jana pajongjongon ni halahi ma Hajahatan Na Mangagohon.

DANIEL 12:11

Mamungka sian na diantak haul siganup ari i jana dipajongjong Hajahatan Na Manyegohon i, 1.290 ari ma honokna.

DANIEL 9:27

Baenon ni raja i ma parjanjian na togu dohot bahat jolma pitu taon honokna. Di Parsitongaan ni hatiha i antahonnia ma na mambaen pelean dohot haul. Dung i Hajahatan Na Manyegohon baenonna ma maringanan di Bagas Ni Tuhan jana sai tongtong ma i disi lopus didondoni hamamago na mambaen ia tusi, i ma hamamago na nitontuhon ni Debata disia.”

HOSEA 13:10

Di dia ulaning rajamu, anso dipalua ia ho, dohot sude pamimpinmu anso dilehen ia hatigoran tu ho, ale ho na mandok, “Lehen ma tu au sahalak raja dohot angka pamimpin.

HOSEA 13:11

Hara ni muruk, Hulehen raja di hamu, jana mardongan rimas Hutarik mangulahi.”

HOSEA 2:11

AntahonKu sude angka pestana i, pesta siganop taon dohot pesta siganop bulan dohot angka Ari Sabat, pendekna sude ari pesta ni ugamonia.

HAMALIMON 8:7

Dung i dipapakehon ia ma tu si Harun kameja dohot juba dohot bobat. Dung i dipapakehon ia muse efod jana dirahutkon ia bobat ni baju efod na nitonun halus tu gonting ni si Harun.

ZAKARIA 10:2

Mangido angka panogu-noguon do halak tu angka gana-ganaan dohot angka datu, hape anggo alus na dapot ni halahi hum gabus do dohot hata na rumar sajo. Adong ma i na patorangkon nipi, hape na palilu-liluhon hamu sajo do hatorangan ni halahi, jana apo-apo na nilehen ni halahi pe nada adong artina. Patunda ni i gabe marserak ma jolma i songon biri-biri na lilu. Targogot do halahi hara ni na so adong pamimpinna.

ZAKARIA 13:2

Di ari i, sesaonKu ma angka gana-ganaan i sian tano on, lopus nada adong be umpe sahalak marningotsa. SoadahononKu ma hagiot laho marsomba gana-ganaan. Sude jolma na mangoKu dirina panurirang, paorotonKu.

LUKAS 21:24

Adong ma na dibunu dohot podang, adong muse ma i na dioban gabe taban tu angka luat ni halak; jana dege-degeon ni halak ma Jerusalem lopus abis hatiha na dung nitontuhon ni Tuhan i tu halahi.”

JOHANNES 19:15

Marsurak-surak ma halahi, ninna halahi, “Bunu ma i! Bunu ma! Parsilangkon i!” Dung i ninna si Latus ma mandok tu halahi, “Parsilangkononku ma he Rajamunu?” Dialusi angka kapala ni malim i ma, “Hum sasada Kesar i do rajanami!”

IBRANI 10:26

Harana anggo dung dipasahat do tu hita jamita na sian Debata, hape laing tapupu do tasangajo mambaen dosa, gabe nada adong sada haul pe na tarbaen manyesa dosanta.

HAKIM-HAKIM 17:5

Si Mika sandiri pe na dung adong do sada inganan parsombaannia jana dibaen ia angka patung ni gana-ganaan dohot sada efod. Madung diangkat ia muse do sahalak anaknia gabe malim.

HAKIM-HAKIM 18:14

Didok mata-mata silima halak na salpu i ma tu angka donganna i, “Diboto hamu dehe na adong di sada sian bagas on patung na marlampis perak? Adong muse dope angka patung na asing dohot Efod. Pikiri hamu ma jolo sanga na aha do sibaenonta.”

HAKIM-HAKIM 8:27

Dipauli si Gideon ma sian sere i sada patung ni gana-ganaan, dibaen ia ma i di hutania, i ma di Ofra. Kehe ma tusi sude halak Israel laho marsomba gana-ganaan i, jabat nada diparrohahon halahi be Debata. Jana pangalaho i ma na gabe songon jorgong di si Gideon dohot di keluargania.

1 SAMUEL 14:3

Malim na maroban efod si Ahiya do, anak ni si Ahitub; i ma anggi ni si Ikabod. Si Ikabod anak ni si Pinehas, jana si Pinehas anak ni si Eli, malim ni Tuhan na di Silo.) Rayat i pe nada adong na umboto na kehe si Jonatan sian i.

1 SAMUEL 15:23

Angke na mangalo tu Tuhan tudos tu na padalan aji do jahat ni i jana hatangkangon sarupa do jahat ni i tu na manyomba debata. Dibaen madung ditulakkon raja i parenta ni Tuhan, jadi Tuhan i pe madung manulakkon raja i songon sada raja.”

1 SAMUEL 2:18

Anggo si Samuel anak ni si Hanna i, dipupu ia do mangoloi Tuhan. Mamake baju efod do ia na dibaen sian abit linen, songon baju parkobas ni angka malim.

1 SAMUEL 21:9

Dung i dialusi si Ahimelek ma, “Husimpan do podang ni si Goliat na nibunumi di Rura Harangan; di pudi ni efod i do podang i, dibungkus dohot abit. Muda giot ho, buat ma, angke hum i do sinjata na adong dison.” Didok si Daud ma, “Nada adong be podang na jumeges di sandok luat on, lehen ma i tu au!”

1 SAMUEL 22:18

Jadi gabe didok si Saul ma tu si Doeg, “Aha dope, ho sajo ma mamunu halahi!” Jadi ro ma si Doeg lalu dibunu ia ma angka malim i. Di na sadari i dimatehon ia ma salapan pulu lima halak malim na marhak maroban Efod.

1 SAMUEL 23:6

Di na kehe si Abyatar anak ni si Ahimelek maporus mandapotkon si Daud lalu didongani ia ma si Daud tu Kehila, dioban ia muse do Efod.

1 SAMUEL 23:9

Hape na dung tarboto do tu si Daud na martahi na jahat si Saul tusia. Jadi gabe didok ia ma tu Malim Abyatar, “Oban ma efod i tuson.”

1 SAMUEL 30:7

Dung i didok si Daud ma tu Malim Abyatar anak ni si Ahimelek i, “Oban ma jolo tuson efod i!” Jadi dioban si Abyatar ma efod i tusia.