HOSEA 3:1 - BIBEL JAMITA NA DENGGAN

¹ Didok Tuhan ma tu au, “Kehe ma ho mangulahi jana haholongi ma sada nari dadaboru panggampang. Haholongi ma i laing songon pangkaholongingKu di halak Israel haru pe ditadingkon halahi Au jana marsomba halahi tu angka debata boti sai dihaulkon halahi roti kismis tu gana-ganaan.”

HOSEA 3:1 ပူးပေါင်းရင်းမြစ်များ

2 SAMUEL 6:19

lalu dibagi-bagihon ia ma panganon tu halahi sude. Sandok halaklahi dohot dadaboru na adong disi dilehen ma sada be roti, santanggo be juhut na ditutung dohot kue na hiang saotik be. Dung sidung i, marmulahan ma halahi sude tu bagasna be.

2 RAJA-RAJA 13:23

Tapi nada unjung dihalupahon Tuhan bangsoNia i. Ibo jana denggan do rohaNia tu halahi. Nada dipadiar Ia halahi dipasude tapi ditolong Ia do halahi, hara ni parjanjianNia dohot si Abraham, si Ishak dohot si Jakob.

1 JUJUR TAON 16:3

lalu dibagi-bagihon ia ma panganon tu halak sude. Sude halak na adong disi maruli roti, juhut panggang dohot kue kismis.

NEHEMIA 9:31

Tapi hara ni holong ni rohaMu na so marparsuhatan, nada halahi ditadingkon Ho sanga dironcohon. Tutu ma da antong, Ho do Debata na so marpartudosan; na godang holong ni rohaMu, gok paribo ni rohaan!

MASMUR 123:2

Songon sada naposo na marguru di roha ni tuanna jana songon sada naposo dadaboru tu morana. Songon i ma hami marsigantung tu Ho, ale Tuhan Debatanami, lopus ibo rohaMu mida hami.

HARURUAR 32:6

Jana ancogotna i sogot dope dipelehon halahi ma haul situtungon dohot haul pardamean; jadi juguk ma bangso i mangan dohot minum, dung i jongjong ma halahi manortori.

ENDE NA GODANG 2:5

Sai ra ma ho margogoihon au, marhite manisan ni batu ni anggur. Patogar ma au dohot angka parbatu, angke marnyae lungun jana gale do au.

JESAYA 45:22

O hamu sude na mangingani portibi; sasada Au do da Debata. Saonnari marbalik ma hamu tu Au, anso dipalua hamu.

JEREMIA 3:20

Hape songon ripe na so setia, ho pe na so setia do tu Au. Au Tuhan, madung mandok songon i.”

JEREMIA 31:20

O Israel, ho do anak hasianKu, anak haholongan, tampuk ni pusu-pusungKu. Ganop Huondam ho sai lungun do rohangKu marningot ho. Gok ibo ni roha do giot baenonKu tu ho.

HOSEA 11:8

Didok Tuhan ma, “Ale Israel nada padiaronKu ho sanga tadingkononKu. Tarbaen Au ma he tu ho songon parabis ni Adma? Sanga Hubaen ho songon Zeboim? Nada torus rohangKu mambaen songon i, hara ni godang ni holong ni rohangKu tu ho!

HOSEA 2:5

Harana madung gabe parhamainan ina ni halahi; ia na marorot halahi madung marparange na so denggan. Harana didok ia do, “Giot ihutkononku do angka haholongan ni rohangku, na mangalehen roti dohot aek inumon, imbulu ni biri-biri dohot abit linen, miak dohot inumonku.”

HOSEA 4:11

Parbatu ni anggur dohot aek ni anggur mangagohon hagogoan laho marpikir.

HOSEA 7:5

Di ari pesta ni raja i dibaen halahi do marsahit angka pamimpin marhite anggur na pamilaskon, mardomu do ia dohot angka panghianat.

AMOS 2:8

Di sude inganan paribadatan, marmodoman jolma disi mamake baju na nibuat ni halahi gabe jaminan ni utang ni halak na pogos. Di Bagas Ni Debata, diinum halahi do anggur na nibuat ni halahi sian halak na marutang tu halahi.

AMOS 6:6

Minum anggur ma hamu sian bokor, jana dipake hamu ma miak na humuskus, hape nada adong arsak ni rohamunu mida hasesego ni Israel.

MIKA 7:7

Tapi anggo au marpos ni roha tu Tuhan do; mardongan pos ni roha na godang hupainte Debatangku. Ditangihon Ia tangiangku jana dipalua Ia do au.

ZAKARIA 1:16

Hara ni i songon on do hata ni Tuhan, “Madung marpangulahi rohangKu tu Jerusalem; angkon paulion muse BagasKu di tonga ni kota i, ninna Tuhan Na Markuaso, jana tarikon ma hotang pangukur humaliang Jerusalem.”

MATEUS 26:50

Dialusi Jesus ma, “Ale dongan, hara ni i dehe ho ro tuson?” Dung i ro ma tu jolo halak na bahat i, ditangkup halahi ma Jesus.

1 KORINTUS 10:21

Nada tola hamu minum sian anggur ni Tuhan, diinum hamu muse sian panginuman anggur ni tondi na jahat i. Nada tola hamu mangan di meja ni Tuhan dohot muse di meja ni tondi na jahat.

1 KORINTUS 10:7

Boti muse anso ulang tasomba gana-ganaan songon na nibaen ni deba sian halahi, songon na tarsurat, “Jadi juguk ma bangso i mangan dohot minum, dung i jongjong ma halahi jana manortori.”

1 PETRUS 4:3

Tuk ma hatiha na salpu i di na nibaenmunu sanga aha por ni roha ni angka jolma na so mananda Debata. Nada denggan ngolumunu i. Giot-giot ni sibuk do na niihutkonmunu, na mabuk, na marpesta-pesta, na minum-minum dohot na marsomba gana-ganaan, i ma sada parange na niantahan ni Debata.

HAKIM-HAKIM 10:16

Dung i diparambungkoni halahi ma sude patung sombaon, lalu marsomba halahi tu Debata. Jadi gabe ibo ma roha ni Debata paida-ida halahi na di hasompitan i.

HAKIM-HAKIM 9:27

Kehe ma halahi mamutik anggur di angka kobun anggur, lalu mambaen anggur siinumon jana mambaen pesta. Mangan minum ma halahi di inganan pamelean ni debata ni halahi lalu disumpai halahi ma si Abimelek.