HOSEA 10:8 - BIBEL JAMITA NA DENGGAN

⁸ Angka bagas pamelean na di angka tor Awen inganan pamelean ni halak Israel, roncohonon noma i. Martubuan ma duhut dohot duri di langgatan ni halahi i. Dung i marsurak ma halahi pio-pio tu angka dolok, “Ondingi ma hami!” dohot tu angka tor, “Dondoni ma hami!”

HOSEA 10:8 ပူးပေါင်းရင်းမြစ်များ

PAMUNGKAAN 3:8

Marayak potang ari dibege halahi ma Tuhan Debata mardalan di kobun i, gabe martabuni ma halahi di holang-holang ni angka hayu i anso ulang diida Tuhan Debata halahi.

1 RAJA-RAJA 13:2

Diparentahon Tuhan ma anso marsurak panurirang i tu langgatan i, “O langgatan, o langgatan! Songon on ma didok Tuhan, ‘Sorang ma sada anak na margoar si Josia di tonga-tonga ni horong ni si Daud. Bunuonnia ma di ginjangmon angka malim na pature langgatan ni angka debata na asing dohot na manghaulkon haul di ginjangmu. Jana laing di ginjangmon ma tutungonnia angka holi-holi ni halahi.’ ”

1 RAJA-RAJA 13:34

Pambaenannia na jat i ma mambaen mago tu angka pomparannia lopus abis halahi sude.

1 RAJA-RAJA 14:16

Tadingkonon ni Tuhan noma Israel hara ni na dung mardosa si Jerobeam jana patundania gabe mardosai muse halak Israel.”

2 RAJA-RAJA 23:15

Ditutung ma patung ni debata boru-boru Asera jana inganan pamelean na di Betel disegohon. Raja Jerobeam anak ni si Nebat do na pajongjong pamelean i – i ma raja na mambaen halak Israel mardosa.

2 JUJUR TAON 31:1

Dung sidung pesta i, kehe ma sude rayat i tu ganop kota na di Juda, lalu diropuk halahi ma angka tugu ni gana-ganaan, diparumpakkon halahi ma angka patung na dipajongjong di Debata Asera jana diabiskon ma angka langgatan maradu angka inganan pamelean tu gana-ganaan. Laing dibaen halahi ma songon i di angka kota na asing di Juda dohot di Luat Benyamin, Efraim dohot Manase. Dung i marmulahan ma halahi sude tu ingananna be.

JESAYA 2:19

Di haroro ni Tuhan laho manghutur tano on, marmasuhan ma halak tu bagasan angka liang di angka dolok batu sanga manghuar lubang di bagasan tano anso malua sian hamumuruk ni Tuhan dohot sian kuasoNia na marmulia i. Anggo dung dapot do ari i, tadingkononkon ma songon i sajo angka gana-ganaan perak dohot sere na nibaen ni halahi baen turpuk ni monci dohot arip-arip.

JESAYA 32:13

jana di tano ni bangsongku madung martubuan angka sihupi. Tangisi hamu ma angka bagasmunu inganan ni halak marsonang-sonang dohot kota na rumibur i.

JESAYA 34:13

Angka bagas godang bope angka hutana na martembok, gabe hatubuan ni ramba na marsuga noma i jana diingani anjing harangan dohot sipauk.

HOSEA 10:2

Angka jolma parroha na geduk i, angkon taononna ma saonnari panginona i ni dosana i. Roncohonon ni Debata ma langgatan ni halahi i, jana rumpakkonon ma angka tugu ni gana-ganaan ni halahi.

HOSEA 10:5

Mabiar ma halak Samaria; marsak jana tangis ma halahi dohot angka malim na mangkobasi lombu sere na di Bet-Awen i hara ni parmago ni hajagaron ni gana-ganaan ni halahi.

HOSEA 10:9

Didok Tuhan ma, “Mamungka sian na masa di Gibea, laing na so mantak dope halak Israel mambaen dosa mangalo Au. Jadi di Gibea pe lingkupon ni porang ma halahi.

HOSEA 2:6

Harani i, giot tutuponKu ma dalanna dohot angka suga, jana pajongjongon tembok giot mangurung ia, jadi nada diboto ia be dalanna.

HOSEA 4:13

Di angka inganan parsombaan ni gana-ganaan di puncu ni angka tor dihaulkon hamu do haul jana ditutung hamu dupa di toru ni angka hayu na godang jana na rumbun disi hara ni na laung inganan i. Tapi aha do akibatna? Gabe panggampang do angka borumunu jana parumaenmunu gabe dadaboru parhamainan!

HOSEA 4:15

Ale hamu halak Israel, haru pe nada unduk hamu tu Au, sai ulang ma nian dohot Juda mambaen hasalaan na nibaenmunu i! Ulang maribadat di Gilgal sanga di Bet-Awen. Ulang baen hamu janji disi mangasahon goar ni Tuhan na mangolu i.

HOSEA 5:8

Palu ma sarune di Gibea! Baen ma tanda ni pio-pio marporang di Rama! Surakkon ma surak-surak parporangan di Betel! Maju ma marporang, hamu halak Benyamin!

HOSEA 8:5

Goyak rohangKu paida-ida lombu sere na nipasomba-somba ni halak kota Samaria. Marpiar do murukKu tu halahi. Sadia honok nari sai sombaon ni halahi torus gana-ganaan i?

HOSEA 9:6

Madung donok hamamago jana masarsar ma hamu. Jadi palagut-laguton ni halak Mesir ma hamu anso dikubur di Memphis! Tubu ma duhut dohot duri, jana tutupanna ma parbagasonmunu humani dohot angka barang perakmunu sigodang arga i.

AMOS 1:5

SegohononKu angka pintu horbangan ni Damaskus jana paorotonKu halak na tinggal di Rura Awen sian inganan ni halahi. PaijuronKu sian habangsana parkuaso na di Bet-Eden, jana halak Siria tabanon lalu dioban tu Luat Kir.”

AMOS 3:14

Di ari i di na manguhum Au tu halak Israel hara ni dosana, sarsarkononKu ma angka langgatan na adong di Betel. Ponggolkonon ma sude ujung ni angka langgatan i, anso dabu sude tu tano.

AMOS 7:9

Sarsarkonon noma angka inganan na nipake ni pomparan ni si Ishak laho marsomba angka debata. Rumpakkonon ma angka inganan paribadatan ni halak Israel. AbiskononKu ma pomparan ni si Jerobeam.”

AMOS 8:14

Angka jolma na marsumpa mangasahon gana-ganaan ni Samaria na mandok, ‘Mangasahon goar ni debata ni bangso Dan’, sanga, ‘Mangasahon debata ni Berseba’ – tinggang noma i jana nada tarsunggul-tarsunggul be.”

MIKA 1:13

Hamu halak na maringanan di Lakis, pasang hamu hian ma kudo ni kareta porang! Ditiru-tiru hamu do dosa na masa di Israel mambaen gabe dohot boru Sion mardosa.

MIKA 1:5

Tarjadi pe sudena i hara ni na mardosa jana mangalo do halak Israel tu Debata. Ise dehe na sala umbaen jabat Israel mardosa? Nada he Samaria kota sabunganna sandiri do? Ise dehe na sala umbaen jabat Jerusalem marsomba gana-ganaan? Nada he Jerusalem sambing do?

NAHUM 3:11

Ho pe, ale Ninive, lenong ma ho hara ni na mabuk. Laing usahahononmu ma anso malua ho sian angka musumu.

LUKAS 23:30

Dokkonon ni halak ma di hatiha i tu angka dolok, ‘Tinggangi ma hami!’ Jana tu angka partoran, ‘Lingkupkon ma hami!’

PANGARATAION 9:21

Antong patung na nibaenmunu i – lombu sere – huambungkon noma tu api. Huropuk ma i jana hududa lopus lamot songon abuan, lalu huambungkon ma abuna i tu bagasan anak ni batang aek na mardalan sian dolok i.

HALUMBAAN 6:16

Marsurak ma halahi tu angka dolok i dohot tu angka batu i, “Dondoni ma hami! Linggomi ma hami anso ulang hami ida bohi ni na juguk di habangsa i jana ulang hona muruk hami dibaen Anak Ni Biri-biri i!

HALUMBAAN 9:6

Anggo na lima bulan i maradu mate ma nian giot ni jolma i, hape nada tarbaen halahi mate; por roha ni halahi nian anso mate, hape dao do hamatean i sian halahi.