HARURUAR 22:29 - BIBEL JAMITA NA DENGGAN

²⁹ Haulkon ma tu Au deba sian suha ni ememu, sian aek ni anggurmu, sian miak ni zetunmu muda mandapot hasil hamu. Pasahat ma tu Au angka dakdanakmunu siangkaan.

HARURUAR 22:29 ပူးပေါင်းရင်းမြစ်များ

2 RAJA-RAJA 4:42

Dung salpu i, ro ma sahalak sian Baal-Salisa. Diboan ia ma tu si Elisa dua pulu roti na dipature sian gandum patumona ni na nikarejohon, dohot saotik gandum na baru disabi di bagasan hadangan. Dung i didok si Elisa ma, “Lehen ma i tu halak na bahat on, anso mangan halahi.”

2 JUJUR TAON 31:5

Dibaen ma boa-boa ni parenta i, jadi dioban halak Israel ma tu angka malim i silehen-lehen na sian suha ni tano ni halahi na parjolo: Jaung, anggur, miak zetun, aer ni loba dohot suha na asing-asing. Di halak Levi dioban halahi ma saparsampulu bagian sian sinadongan ni halahi.

HARURUAR 13:12

angkon pasahatonmunu do sude anak siangkaan tu Tuhan. Sandok pahan-pahanan jantan na parjolo sorang, Tuhan do nampunasa.

HARURUAR 13:2

“Haulkon ma tu Au sude anak halaklahi siangkaan. Ganop anak halaklahi siangkaan di halak Israel dohot sandok pahan-pahanan jantan na parjolo sorang, Au do nampunasa.”

HARURUAR 23:15

Di bulan Abib, angkon baenonmunu do Pesta Roti Na So Marragi songon na dung Huparentahon tu hamu, angke di bulan i ma hamu manadingkon tano Mesir. Ulang pangan hamu roti na nibaen marcampur ragi salolot pesta sipitu ari i. Ulang hamu ro maribadat tu Au anggo so maroban haul.

HARURUAR 23:16

Pestahon hamu ma Pesta Gotilon di na mamungka mambuat patumonaan ni suha ni suan-suananmunu hamu. Pestahon hamu ma dohot Pesta Bandar Bulung-bulung ganop ujung ni taon di na mamutik suha ni kobun anggur sanga kobun suan-suanan na marbatu hamu.

HARURUAR 23:19

Ganop taon angkon obanonmunu do tu Bagas Ni Tuhan Debatamunu eme patumonaan ni suha ni sabamunu. Ulang lompa hamu anak ni biri-biri sanga hambeng di bagasan susu ni indukna.”

HARURUAR 34:19

Sandok anak halaklahi na parjolo sorang, Au do nampunasa, bope sandok jantan sian pahan-pahananmu, anak ni lombu sanga biri-biri na parjolo sorang.

HARURUAR 34:20

Tapi anggo anak ni halode na parjolo sorang, angkon tobusonmunu do dohot sada biri-biri songon gontina. Muda nada ra hamu manobusna angkon ponggolkononmu do rungkungna i. Ganop anak siangkaanmunu angkon tobusonmunu do i. Ulang ma adong sahalak na tarida ro tu jolongKu na so marsilua.

JEHESKIEL 20:40

Angke di tano Israel, di puncu ni dolokKu na badia i, hamu sude bangso Israel, disi ma sombaonmunu Au. Disi ma sonang rohangKu mida hamu jana Hupangido hamu maroban tu Au angka haulmunu na dumenggan dohot angka silehen-lehenmunu na gabe hapunjunganKu.

MIKA 7:1

Marjaya ma au! Harana parngoluonku songon dompak papunguhon batu ni anggur di ari logo, songon dompak painte masa parbatu ni anggur, nada adong anggur na giot sipanganon, dohot parbatu ni ara na huhajopkon.

BILANGAN 18:13

Sudena i gabe bagianmu. Sude halak di bagas i na dung ias mangihutkon ugamo, tola dohot mangankonsa.

MATEUS 6:33

Sai jumolo ma jalahi hamu Harajaan Ni Debata dohot hatigoranNa, jadi lehenonNia ma di hamu sasude na songon i.

SURAT NI SI PAULUS TU PARLAGUTAN ROM 8:23

Tapi nada hum i sajo, dohot do hita manjagit patumonaan ni Tondi i, humolos muse do hita di bagasan rohanta huhut painte-intehon hadakdanahan i, i ma haluaan ni pamatangta.

PANGARATAION 15:19

Lombu jantan, hambeng jantan, dohot biri-biri jantan na parjolo sorang, haulkon hamu ma i tu Tuhan. Nada tola pakeon lombu i manarik bajak, jana biri-biri i nada tola cukuron.

JAKOBUS 1:18

Hara ni giot ni rohaNia sandiri, dibaen Ia do hita gabe dakdanakNia markite-hite hataNia na tigor i, anso dapotan inganan na dumenggan hita sian sasudena na nitompaNia.