HARURUAR 19:18 - BIBEL JAMITA NA DENGGAN

¹⁸ Ditutupi timus ma sudena Dolok Sinai i, angke madung mijur Tuhan tu ginjangna i songon api tompana. Martimbual ma timus idaon songon timus sian tataring, jana humutur ma dolok i gogo sajo.

HARURUAR 19:18 ပူးပေါင်းရင်းမြစ်များ

PAMUNGKAAN 11:5

Jadi mijur ma Tuhan laho mangaligi kota dohot tugu na nipajongjong ni jolma i.

PAMUNGKAAN 15:17

Dung borngin tompu ma tarida sada dalihan na martimus dohot obor na gara, na mamolus di antara ni bola-bolaan ni juhut i.

PAMUNGKAAN 19:28

Manatap ma ia sabola Sodom dohot Gomora dohot tu rura i sude, jana diida ia ma timus marbual-bual sian tano i, songon timus ni pamurunan na godang.

NEHEMIA 9:13

Mijur Ho sian langit di Dolok Sinai na badia, lalu mangkobari Ho dohot bangsoMu sandiri. Dilehen Ho uhum, aturan dohot sipaingot na tigor, na denggan dohot na bonar boti marguna.

MASMUR 104:32

Ditatap Ia tu tano on jana humitir ma i dibaen Ia, digoit Ia angka dolok gabe ruar ma timusna.

MASMUR 114:4

Mangambur-ambur angka dolok songon hambeng randuk, jana angka tor pe mangalumpat-lumpat songon anak ni biri-biri.

MASMUR 114:7

Ale portibi, humutur ma di adopan ni Tuhan di adopan ni Debata ni si Jakob.

MASMUR 144:5

Ale Tuhan, buka ma langitMi jana mijur ma Ho, goit ma angka dolok i anso martimus.

MASMUR 18:9

Dibola Ia langit dung i mijur ma Ia, dohot ombun na golap di toru ni patNa.

MASMUR 68:9

Marlobian dipaijur Ho udan, tanoMi na harsang i dibaen Ho sumuang.

MASMUR 77:18

Hilap pe margurasai, ronggur pe mardotur tano pe mangalalo jana humutur.

MASMUR 77:19

Mardalan do Ho mamolusi galumbang, didalani Ho lautan, hape andegeMu nada haidaan.

HARURUAR 19:13

Angkon nidangguran do halakna i dohot batu sanga nisior, sahalak pe nada tola manjamasa. Tu jolma dohot tu pahan-pahanan do na nidok on, angkon nimatehon sude. Dung dipalu sarune, baru pe anso tola bangso i manangkok tu dolok.”

HARURUAR 19:17

Dioban si Musa ma halahi ruar sian bandar i anso marsuo dohot Debata; jadi marjongjongan ma halahi di pat ni dolokna i.

HARURUAR 20:18

Disi dibege angka jolma i ronggur dohot sora ni sarune i jana diida halahi dohot hilap bope dolok na martimus i, humitir ma halahi mabiar jana mandao ma halahi jongjong.

HARURUAR 3:2

Ro ma surusuruan ni Tuhan tusia di bagasan jilam ni api na ruar sian ramba i. Diida si Musa do ramba i marjilam, hape nada mosok.

HARURUAR 34:2

Markobas ma ho marayak manyogot jana manangkok ma ho manyogot i tu Dolok Sinai; jongjong ma ho disi adop Au di ambubu ni dolok i.

JESAYA 6:4

Humutur ma ojahan ni pintu dibaen sora ni halahi i, jana bagas i pe gok ma dohot timus.

JESAYA 64:1

Sibakkon ma langit, jana mijur ma Ho ale Tuhan, baen ma angka dolok humutur hara ni biarna,

JEREMIA 4:24

Hutailihon angka dolok na gincat munggal-unggal maradu gogo.

HABAKUK 3:6

Muda jongjong Ho, humutur ma tano; muda manatap Ho, humitir ma angka bangso. Mangkahoping ma angka dolok sian najolo; angka tor sian narobi gabe marondo, di angka tanggurung ni tor i ma mardalani Ho di hatiha na robi.

ZAKARIA 14:5

Marlojongi ma hamu mamolus sian lombang na mambagi dolok i gabe marbola dua. Marlojongi ma hamu songon angka ompu na umpompar hamu di hamamasa ni lalo taran mamarenta si Usia raja ni Juda. Jadi ro ma antong Tuhan Debatangku, diudurkon Surusuruan sudena.

MATEUS 24:7

Marporang ma bangso na sada maralohon bangso na asing. Sanga di dia pe, masa ma haleon potir dohot lalo.

PANGARATAION 33:2

“Ro do Tuhan sian Dolok Sinai bincar di ginjang ni Edom songon mataniari. Sian Dolok Paran murgap Ia laho manyondangi bangsoNa, diudurkon sampulu ribu surusuruan api na marjilam di tanganna songon hilap.

PANGARATAION 4:36

Sian langit, dipatubegehon Ia do soraNia tu hamu laho mangajari hamu; di tano on, madung dipatidahon Ia tu hamu apiNia na badia, jana sian api i pe mangkobari do Ia tu hamu.

PANGARATAION 5:22

I ma angka parenta na nilehen ni Tuhan tu bangso na marlagut di dolok i. Di na mangkuling Ia mardongan sora na mangaronggur sian api dohot ombun dohot hagolapan i, disi ma Dilehen Ia angka parenta on, jana nada adong na asing Dilehen Ia. Lalu disuratkon Ia muse ma i di batu siduangkoping jana Dilehen Ia ma i tu au.”

PANGARATAION 5:4

Mangkobari do Tuhan di ginjang ni dolok i sian api paadop-adop dohot hamu.

2 TESSALONIKA 1:7

Jana tu hamu angka na manjagit sitaonon saonnari – laing songon i muse tu hami – lehenon ni Debata ma halumbangan muda dung tarida Tuhan Jesus mijur sian banua ginjang rap dohot angka surusuruanNia na markuaso i

2 TESSALONIKA 1:8

bope dohot api na marnyala-nyala. Laho manguhumi halak na so mananda Debata, dohot angka na so mangoloi Jamita Na Denggan taringot tu Jesus Tuhanta i do umbaen na mijur Ia.

IBRANI 12:18

Nada pola diadopi hamu songon na masa tu halak Israel najolo. Anggo halahi diadopi halahi do na bolas nijama, i ma Dolok Sinai dohot api na marnyala-nyala i; diadopi halahi do hagolapan, haholomon bope halingsungsung;

IBRANI 12:26

Mangaronggur do ditano on soraNia hatiha i. Tapi saonnari madung marjanji Ia, “Mangaronggur dope baenonKu sanoli nari, nada hum tano on, tapi dohot do langit.”

2 PETRUS 3:10

Tapi anggo Ari haroro ni Tuhan na padua nolihon i, songon haroro ni panangko do i. Anggo di Ari i mago ma langit mardongan sora na gogo, jana mosok ma sude angka na adong di langit jana mago muse ma tano on dohot sude isina.

HALUMBAAN 15:8

Jadi gok ma antong Bagas Na Badia i dohot timus sian hasangapan dohot sian hara ni kuasoNia. Jana salolot so sidung dope mara na pitu i dibaen surusuruan na pitu i, sahalak pe nada dipatola masuk tu bagasan Bagas Na Badia i.

HALUMBAAN 9:2

Gabe diungkap bintang i ma rura ni hamatean i, gabe ruar ma sian bagasan songon timus ni purunan na godang. Gabe manggolap ma awang-awang i dohot mataniari dibaen timus na sian rura i.

HAKIM-HAKIM 5:5

Di jolo ni Tuhan, Sinai, angka dolok mabiar di adopan ni Debata ni Israel, halahi pe mabiar.