HARURUAR 19:17 - BIBEL JAMITA NA DENGGAN

¹⁷ Dioban si Musa ma halahi ruar sian bandar i anso marsuo dohot Debata; jadi marjongjongan ma halahi di pat ni dolokna i.

HARURUAR 19:17 ပူးပေါင်းရင်းမြစ်များ

HARURUAR 19:13

Angkon nidangguran do halakna i dohot batu sanga nisior, sahalak pe nada tola manjamasa. Tu jolma dohot tu pahan-pahanan do na nidok on, angkon nimatehon sude. Dung dipalu sarune, baru pe anso tola bangso i manangkok tu dolok.”

HARURUAR 19:16

Di ari patoluhon, ro ma ronggur dohot hilap. Tarida ma ombun na hapal di ginjang ni dolok i jana habegean ma sora ni sarune na lobi gogo. Humitir ma sude halak na di bandar hara ni biarna.

HARURUAR 19:18

Ditutupi timus ma sudena Dolok Sinai i, angke madung mijur Tuhan tu ginjangna i songon api tompana. Martimbual ma timus idaon songon timus sian tataring, jana humutur ma dolok i gogo sajo.

HAMALIMON 9:5

Sude na nitonahon ni si Musa i, dioban halahi ma tu jolo ni Bandar Parmianan, lalu marlagut ma sude na bahat i disi laho manyomba Tuhan.

BAENON NI ANGKA RASUL 7:38

Laing si Musa do na gabe panonga-nongai sian bangso Israel di parkorsihan i, maradopkon surusuruan na mangkatai tusia di Dolok Sinai bope tu ompunta i. Ia do na manjagit hata hangoluan sian Debata sipabolkason tu hita.

PANGARATAION 4:10

taringot tu ari i di na jongjong hamu di adopan ni haroan ni Tuhan Debatamunu di Dolok Sinai. Didok Ia do di hatiha i tu au, ‘Palagut ma bangso i. GiotKu anso ditangihon hamu sanga aha na giot sidokkononKu, anso marsiajar halahi marpangoloion tu Au sapanjang mangolu halahi jana anso diajari halahi angka dakdanak ni halahi marpangoloion tu Au.’

PANGARATAION 4:11

Baritahon hamu ma tu angka dakdanakmunu sanga songon dia parromunu lalu jongjong di pangkal ni dolok i na nitutupan ni timus na manggolap songon ombun na manyorop dohot api na gara-gara lalu tu langit.

PANGARATAION 5:5

Jongjong do au di hatiha i di antaramunu dohot Tuhan laho palaluhon tu hamu sanga aha na nidok ni Tuhan, angke mabiar do hamu tu api i jana nada ra hamu manganangkohi dolok i.