HARURUAR 15:11 - BIBEL JAMITA NA DENGGAN

¹¹ Tuhan, ise ma sian angka debata sileban na tudos dohot Ho? Di sangap dohot di habadiaan, ise manyalpui Ho? Ise tarbaen patupa angka hahomangan dohot angka karejo na godang songon na binaenMu?

HARURUAR 15:11 ပူးပေါင်းရင်းမြစ်များ

2 SAMUEL 7:22

Na godang situtu do Ho antong, ale Tuhan Debata. Nada adong tudosanMu, jana sian najolo do hami boto, hum sasada Ho do Debata.

1 RAJA-RAJA 8:23

lalu martangiang, “Ale Tuhan Debata ni Israel, di langit dohot di tano on, nada adong debata na songon Ho. Dipatulus Ho do janjiMu jana dipatidahon Ho do holongMu tu sude bangsoMu na sai burju jana mangoloi tu Ho sian nasa rohana.

1 JUJUR TAON 16:25

Sipuji-pujion do hagodangan ni Tuhan. Manyalpui sude debata patut do nisangap Tuhan.

2 JUJUR TAON 2:5

Angkon luar biasa do Bagas Ni Tuhan na giot bangunonki, dibaen gumodang do antong Debatanami i sian sasude sombaon sanga dia pe.

2 JUJUR TAON 6:14

Ning ia ma, “O Tuhan, Debata ni Israel! Di langit dohot di tano, nada adong Debata na songon Ho! Dipatulus Ho do janjiMu jana dipatuduhon Ho do holong ni rohaMu maradopkon bangsoMu na setia jana burju mangoloi sian sasude rohana tu Ho.

MASMUR 113:5

Ise ma na songon Tuhan Debatanta? Di inganan na gincat do Ia marhabangsa.

MASMUR 119:120

Humitir do au hara ni na mabiar mida Ho, panyogiton do au maradopkon haputusanMu.

MASMUR 136:4

Hum Ia do na mambaen angka hahomangan godang, hot do holong ni rohaNia sapanjangna.

MASMUR 145:17

Tigor do Tuhan i di sude tindakanNa, gok holong ni roha do Ia di sude na nibaenNa.

MASMUR 22:23

Hamu angka na daulat marroha, puji hamu ma Ia! Ale pomparan ni si Jakob pasangap ma Ia! Ale pomparan ni Israel, marsomba ma hamu tuSia!

MASMUR 35:10

Sian sandok rohangku hudok hatangku, “Tuhan, nada adong da tudosanMu! Diondihon Ho do na gale sian na gogo na pogos dohot na marhancit sian na manyosaksa.”

MASMUR 60:2

Humutur do dibaen Ho tano on lopus gabe marotak, padoMu ma na mangkahoping i, angke meol-eol tano on.

MASMUR 66:5

Ro ma hamu mangaligi angka pambaenan ni Debata, sumurung do antong homang ni roha di pambaenanNia maradopkon jolma!

MASMUR 77:11

Sai paingot-ingotonku do angka pambaenanMu, ale Tuhan, huingot do angka pambaenanMu na pahomangkon di hatiha na salpu.

MASMUR 77:14

Ho do Debata na patupahon hahomangan, dipatangkas Ho do kuasoMu di tonga-tonga ni angka bangso.

MASMUR 77:19

Mardalan do Ho mamolusi galumbang, didalani Ho lautan, hape andegeMu nada haidaan.

MASMUR 86:10

Dibaen na sangap do Ho, hahomangan do karejoMu, hum Ho do Debata.

MASMUR 86:8

Ale Tuhan, nada adong debata na songon Ho, nada adong pambaenanna na tudos tu Ho.

MASMUR 89:18

Angke madung dipili Ho ale Tuhan pangondiannami, ale na badia ni Israel, madung diangkat Ho rajanami.

MASMUR 90:11

Ise unjung manghilalahon hasogenon ni rimasMu? Ise umboto akibat ni murukMu?

HARURUAR 18:11

Saonnari madung huboto, gumodang do hape Tuhan i sian sandok debata, harana di hatiha di hasombongan ni halak Mesir maradopkon halak Israel do dibaen Tuhan sudena on.”

HARURUAR 20:3

Ulang adong di ho debata na asing di jolongKu.

HARURUAR 3:20

Jadi patidahononKu ma kuasongKu, jana uhumonKu ma halak Mesir i marhite angka bala na jorbut tu halahi. Dung i loasonnia ma hamu kehe.

HARURUAR 8:10

Dialusi raja i ma, “Tangiangkon ma au ancogot.” Ninna si Musa ma, “Baenonku ma songon na nipangido ni raja i anso diboto raja i, nada adong Debata na asing na songon Tuhan, Debatanami i.

HARURUAR 8:6

Dung i dipahortang si Harun ma tungkotnia di ginjang ni sude aek i, gabe marroan ma angka tohuk manggohi luat i.

HARURUAR 9:14

Anggo on, nada hum menterimu dohot rayatmu na giot uhumonKu, tapi ho sandiri pe angkon hona, anso diboto hamu na so adong na dos dohot Au di portibi on.

JESAYA 30:11

Kehe ma ho mandao, jana ulang be ambati hami. Nada ringkot rohanami umbege salaho tu Debata Na Badia ni Israel i.”

JESAYA 40:18

Jadi giot tu aha ma patudosonmu Debata, aha ma didok rohamu na sarupa dohot Ia?

JESAYA 40:25

Dohot ise ma he patudosonmunu Au, ise ma he tudosanKu?

JESAYA 46:9

Ingoti di bagasan rohamu sude na masa na salpu angka pangalaho na tarjadi najolo. Okui ma, na so adong Debata asing sian Au nada adong na sarupa dohot Au.

JESAYA 57:15

Angke songon on do pandok ni Na Gumincat jana Na Marmulia na marhabangsa salolotna jana Na Sun Badia goarNa: “Di inganan na gincat jana badia do habangsangKu, tapi rap muse do dohot halak na magopu jana na toruk rohana, laho pangoluhon arop ni roha ni halak na toruk roha dohot laho pangoluhon roha ni halak na magopu.

JESAYA 6:3

Marsipioan ma halahi: “Na badia, na badia, na badia ma da Tuhan Na Markuaso i. Digohi hamuliaonNia do portibi on.”

JEREMIA 10:16

Nada songon angka gana-ganaan i anggo Debata ni si Jakob; Ia do manompa sandok na adong. Tuhan Na Markuaso do goarNia; ditodo Ia do Israel gabe bangsoNa.

JEREMIA 49:19

Songon singa na muldop sian harangan godang di lambung ni Batang aek Jordan, jana na ro mandapotkon padang panjampalan ni biri-biri, songon i ma Au giot ro jana mambaen marlojongi halak Edom sian tano ni halahi tompu. Dung i todoonKu ma sada halak pamimpin laho mamarenta luat i. Ise ma he na tarpatudos tu Au? Ise he puluk mangalo Au? Adong dehe lakna pamimpin na puluk mangalo Au?

HAMALIMON 19:2

pabolkaskon tu bangso Israel, parenta na songon on, “Angkon badia do hamu, harana Au, Tuhan Debatamunu na badia do.

MIKA 7:18

Nada adong Debata na songon Ho, ale Tuhan, na mangampuni dosa ni bangsoMu na teba i. Nada sapanjangna Ho muruk; balik tehe, sonang do rohaMu patuduhon holong ni rohaMu na so marparsuhatan i.

LUKAS 12:5

Denggan ma Hupatuduhon di hamu, sanga ise do na angkon sihabiaranmunu. Habiari hamu ma Debata! Angke dung mamunu Ia markuaso muse dope Ia mangambungkon tu narako! Denggan ma ingot hamu; angkon habiaranmunu do Ia!

PANGARATAION 1:30

Tuhan Debatamunu do mamimpin hamu dohot marporang humopkop hamu songon na dung niidamunu sandiri di Mesir

PANGARATAION 3:24

‘O Tuhan Na Gumincat, huboto do anggo na nipatuduhonMon tu au hum songon pamungkaan ni angka pambaenanMu na godang jana hahomangan do. Nada adong debata na asing di langit bope di tano on na margogo mambaen angka pangalaho na godang songon Ho.

PANGARATAION 33:26

“O, Israel, boto hamu ma, sumurung do Debata sian sasude debata. Dibolus Ia do langit di bagasan hamuliaan mamintas di ombun mangalehen di hamu tolongan.

PANGARATAION 4:34

Jungada ma he adong sada debata na puluk mambuat sada bangso sian bangso na asing lalu mambaen halahi bangsonia sandiri, songon na nibaen ni Tuhan Debatamunu di hamu di Mesir? Diida hamu sandiri do sanga songon dia godang ni hagogoon ni Debata parohon parmaraan dohot porang, mambaen angka hahomangan dohot patuluskon angka pangalaho na jorbut.

HALUMBAAN 13:4

Jana disomba halahi ma naga i hara ni na dung nilehennia i kuasonia tu binatang i. Laing dohot muse do binatang i disomba halahi. Didok halahi ma, “Ise dehe na sarupa songon binatang i? Ise dehe na tarbaen mamorangi ia?”

HALUMBAAN 15:4

Ise dope he na so mabiar mida Ho, Tuhan, jana ise dope he na so ra pasangapkon goarMu? Hum Ho sajo do na badia. Marroan ma angka bangso sudena manyomba Ho dibaen madung diida sasude halak angka panguhumanMu na tigor i.”

HALUMBAAN 4:8

Mahluk na opat i, onom be habongna jana sap sudena dohot mata. Nada mantak mahluk na opat i marende arian na borngin, “Na badia, na badia, na badia do Tuhan Debata Parkuaso Na Sumurung i; na adong, na dung adong, jana na giot ro!”

1 SAMUEL 2:2

Nada adong na badia songon Tuhan, nada adong na gogo songon Ia, nada adong na songon Ia na bisa gabe parondingan.