HARURUAR 13:17 - BIBEL JAMITA NA DENGGAN

¹⁷ Di na nipaloas ni raja Mesir kehe bangso Israel, nada dioban Debata halahi manopi-nopi laut laho tu Luat Pilistin, haru pe nian dalan i do na dumonok. Didok roha ni Debata, “Nada por rohangKu muda manyolsoli halahi gabe mulak tu Mesir dung diida halahi na angkon marporang halahi.”

HARURUAR 13:17 ပူးပေါင်းရင်းမြစ်များ

1 RAJA-RAJA 8:47

“Muda di luat i halahi, sian ias dohot sian situtu ni roha ni halahi maninggalkon angka dosa ni halahi, dioku halahi dosa dohot hajahatan ni halahi, martangiang halahi tu Ho adop luat on na dung nilehenMu tu ompungnami adop kota na nipiliMu dohot adop bagas parsombaan on na dung hupajongjong di Ho,

NEHEMIA 9:17

Nada ra patu halahi, sude hadenggananMu dihalupahon do, jana sude pambaenanMu hahomangan i sian parningotanna abis do. Sian ginjang ni rohana, dipili halahi ma sahalak ketua. Sai giot tu Mesir do halahi, mangulahi gabe hatoban. Hape Debata na sai mangampuni do Ho, silapang andora, na basa jana na sun paribo. Na sun do antong hasurungan ni holongMi: Nada Ho manadingkon halahi.

HARURUAR 14:10

Dung diida halak Israel mur donok raja Mesir dohot tentarania i, sun ma biar ni halahi, jana pio-pio ma halahi tu Tuhan mangido pangurupion.

BAENON NI ANGKA RASUL 15:38

hape nada tumbuk be tu roha ni si Paulus padohot si Markus, hara ni na so ra ia rap markarejo dohot halahi di na nitadingkonnia halahi di Pamfilia, na salpu i.

BAENON NI ANGKA RASUL 7:39

Hape haru songon i pe, laing nada ra angka ompunta i mangoloi ia. Ditulak halahi do ia jana giot mulak halahi tu Mesir mangulahi.

PANGARATAION 17:16

Muda raja, nada tola bahat kudona baen di tentarana. Nada tola suruonnia halak tu Mesir laho manobusi kudo, dibaen madung didok Tuhan do na so tola be mulak bangsoNia i tu luat i.

PANGARATAION 20:8

Angkon dokkonon ni angka komandan muse dope tu angka jolma i songon on, ‘Adong dehe dison na gugup dohot na mabiar? Muda adong do, angkon mulak do ia. Muda nada mulak ia, mambaen sego do i tu semangat ni donganna na asing.’

PANGARATAION 28:68

Tongoskonon ni Tuhan ma ho mangulahi markapal tu Mesir, haru pe na dung Hudok na so mulak be ho sanga na andigan tusi. Pagadis-gadisonmunu ma dirimunu disi gabe hatoban halaklahi dohot hatoban dadaboru tu musumunu, hape sahalak pe nada adong na manobusi.”

IBRANI 11:27

Hara ni haporsayaanna, gabe ditadingkon si Musa do tano Mesir so pola mabiar ia mida raja i na topet muruk marsitutu. Torus ditustus ia do dalannia songon na dung niidania Debata na so tarida i.

HAKIM-HAKIM 7:3

Antong, pabotohon ma tu anak buami, ‘Ise na mabiar, angkon tadingkononna do Dolok Gilead on jana mulak tu bagasna.’ ” Gabe mulak ma dua pulu dua ribu halak; hum sampulu ribu noma na tinggal.