HAMALIMON 8:15 - BIBEL JAMITA NA DENGGAN

¹⁵ Disambol si Musa ma lombu i, dibuat ia deba mudarna, didaiskon ia ma mudar ni lombu i dohot jari-jari ni tangannia tu angka tanduk na di suhi-suhi ni langgatan i, anso gabe Debata nampuna langgatan i. Disaburkon ia ma mudar na lobi i tu ojahan ni langgatan i. Songon i ma pangalahona paias langgatan i mangihutkon ugamo sipasahaton tu Tuhan.

HAMALIMON 8:15 ပူးပေါင်းရင်းမြစ်များ

2 JUJUR TAON 29:24

Dung salpu i disambol ma angka hambeng i jana mudarna i diduruskon ma di langgatan i gabe haul pangampuni ni dosa ni sude rayat i. Dibaen halahi ma songon i hara ni na niparentahon ni raja i anso baenon haul situtungon dohot haul pangampuni ni dosa di sude rayat ni Israel.

JEHESKIEL 45:20

Laing songon i muse ma baenon di tanggal pitu bulan i, di sude halak na dung mambaen dosa sian na so diuntil sanga hara ni na so dibotosa. Songon i ma baenonmunu laho manjago habadiaan ni BagasKu.

DANIEL 9:24

Pitu noli pitu pulu taon, i ma hatiha na ditontuhon ni Debata laho paluahon bangsomu dohot kotamu na badia i sian dosa dohot hajahatan. Ampunan noma sude jana pahoton hatigoran na manongtong, lopus gabe tulus tarjadi parnidaan i, jana Bagas Ni Tuhan na badia i pasahaton ma mangulahi tu Tuhan i.

HAMALIMON 1:11

Sambolon ni halahi ma pahan-pahanan i di topi ni langgatan sabola sian Utara, dung i pispiskonon ni malim ma mudar ni pahan-pahanan i tu na opat topi ni langgatan i.

HAMALIMON 1:5

Dung i angkon di pintu ni Bandar Parmianan i do disambol lombu i. Mudar ni lombu i, pasahaton ni angka malim sian pomparan ni si Harun ma i tu Tuhan, lalu dipispiskon tu opat-opat topi ni langgatan na donok tu pintu ni Bandar Parmianan i.

HAMALIMON 16:20

“Dung salose si Harun patulus karejo habadiaan ni Bilik Na Sun Badia dohot angka bagian na asing sian Bandar Parmianan Ni Tuhan bope langgatan, angkon pasahatonnia ma tu Tuhan hambeng na mangolu na dung dipili tu si Asasel.

HAMALIMON 3:2

Halak na maroban haul, angkon dipayakkon do tanganna tu ginjang ni ulu ni lombu i lalu disambol di pintu ni Bandar Parmianan Ni Tuhan. Dung i dipispiskon angka malim pomparan ni si Harun ma mudar ni lombu i tu na opat topi ni langgatan i.

HAMALIMON 3:8

Jana angkon payakkononna ma tanganna tu ginjang ulu ni biri-biri i lalu disambol ia ma i di jolo ni Bandar Parmianan. Lalu diduruskon malim i ma mudarna i tu na opat topi ni langgatan i.

HAMALIMON 4:25

Angkon disornopkon malim i ma jari-jarina tu bagasan mudar ni pahan-pahanan i jana diapuskon tu angka tanduk na di suhi-suhi ni langgatan i. Lobi ni mudar i diusehon ma tu ojahan ni langgatan.

HAMALIMON 4:30

Sornopkonon ni malim i ma jari-jarina tu bagasan mudar ni pahan-pahanan i lalu didaiskon ia tu angka tanduk na di suhi-suhi ni langgatan i, lalu diusehon ia mudar na lobi i tu ojahan ni langgatan i.

HAMALIMON 4:7

Angkon niapuskon muse ma saotik sian mudar i tu angka tanduk na di suhi-suhi ni langgatan i mardongan hamonyan na huskus na di bagasan Bandar Parmianan. Lobi ni mudar i angkon niusehon tu ojahan ni langgatan ni haul situtungon di balian ni Bandar Parmianan di jolo ni pintuna i.

HAMALIMON 6:30

Pahan-pahanan nampuna mudar na dioban tu bagasan Bandar Parmianan, na nipake i laho mangido hasesaan ni dosa, angkon tutungon do sude, nada tola i panganon.

BILANGAN 8:12

Dung songon i payakkonon ni halak Levi i ma tangan ni halahi tu ginjang ulu ni lombu jantan na dua i, na sada haulkonon ma i gabe haul hasesaan ni dosa, na asing i gabe haul situtungon. Dohot pangalaho na songon i ma malua halak Levi i sian dosa ni halahi.

SURAT NI SI PAULUS TU PARLAGUTAN ROM 5:10

Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia.

EPESUS 2:16

Hara ni hamamateNia di parsilang i dipasada Kristus ma bangso na dua i jana dipadame Ia ma halahi tu Debata. Gabe mago ma parbadaan i.

IBRANI 2:17

Jadi astuanna, angkon sarupa do Ia dohot halahi di sude pangalaho. Jadi dung songon i tarbaen Ia ma diriNia gabe Malim Godang ni halahi, na burju jana na maribo ni roha di na nioloanNia Debata laho manyesa angka dosa ni halahi.