HAMALIMON 4:25 - BIBEL JAMITA NA DENGGAN

²⁵ Angkon disornopkon malim i ma jari-jarina tu bagasan mudar ni pahan-pahanan i jana diapuskon tu angka tanduk na di suhi-suhi ni langgatan i. Lobi ni mudar i diusehon ma tu ojahan ni langgatan.

HAMALIMON 4:25 ပူးပေါင်းရင်းမြစ်များ

HARURUAR 29:12

Buat ma saotik mudar ni lombu i jana daiskon ma dohot jari-jarimu tu angka tanduk ni langgatan i.

JESAYA 40:21

Patut ma he nada diboto ho? Nada he dipaboa tu ho sian najolo? Nada he diastui ho sian mulana, sanga na bia tano on ditompa?

HAMALIMON 16:18

haruar ma si Harun kehe tu langgatan ni haul situtungon laho pabadiahon langgatan i. Angkon buatonnia saotik sian mudar ni lombu dohot hambeng i, anso diusehon tu ginjang ni angka tanduk na di suhi-suhi ni langgatan i.

HAMALIMON 17:11

Hosa ni ganop na mangolu, di bagasan mudarna do. Hara ni i ma dibaen diparentahon Tuhan anso sude mudar diduruskon di ginjang ni langgatan anso sesa sude dosa. Sarupa dohot hosa do mudar i manyesa dosa.

HAMALIMON 4:18

Saotik sian mudar i angkon diapuskon tu angka tanduk na di suhi-suhi ni langgatan hamonyan di Bandar Parmianan. Lobina i diduruskon tu ojahan ni langgatan inganan ni haul situtungon na di ruar ni Bandar Parmianan di jolo ni pintuna i.

HAMALIMON 4:30

Sornopkonon ni malim i ma jari-jarina tu bagasan mudar ni pahan-pahanan i lalu didaiskon ia tu angka tanduk na di suhi-suhi ni langgatan i, lalu diusehon ia mudar na lobi i tu ojahan ni langgatan i.

HAMALIMON 4:34

Sornopkonon ni malim i ma jari-jarina tu bagasan ni mudar i lalu didaiskon tu angka tanduk na di suhi-suhi ni langgatan i, jana mudar na lobi i disaburkon ma i tu ojahan ni langgatan i.

HAMALIMON 4:7

Angkon niapuskon muse ma saotik sian mudar i tu angka tanduk na di suhi-suhi ni langgatan i mardongan hamonyan na huskus na di bagasan Bandar Parmianan. Lobi ni mudar i angkon niusehon tu ojahan ni langgatan ni haul situtungon di balian ni Bandar Parmianan di jolo ni pintuna i.

HAMALIMON 5:9

Mudar ni unggas i angkon dipispiskon tu topi ni langgatan, dung i lobina i diusehon tu ojahan ni langgatan i. I ma haul na gabe hasesaan ni dosa.

HAMALIMON 8:10

Dibuat si Musa ma miak upacara i, jana didaiskon ia ma tu Bandar Parmianan Ni Tuhan dohot tu sude parkokas na adong di bagasan Bandar Parmianan. Songon i ma dibaen ia pasahatkon sudena i tu Tuhan.

HAMALIMON 8:15

Disambol si Musa ma lombu i, dibuat ia deba mudarna, didaiskon ia ma mudar ni lombu i dohot jari-jari ni tangannia tu angka tanduk na di suhi-suhi ni langgatan i, anso gabe Debata nampuna langgatan i. Disaburkon ia ma mudar na lobi i tu ojahan ni langgatan i. Songon i ma pangalahona paias langgatan i mangihutkon ugamo sipasahaton tu Tuhan.

HAMALIMON 9:9

Dung i dioban anak ni si Harun ma mudar sihaulkonon i tu si Harun, lalu disornopkon ia ma jari-jarinia tu mudar i, dung i didaiskon ia tu na opat suhi ni langgatan i, dung i disiramkon ia mudar na lobi i tu pat ni langgatan i.

SURAT NI SI PAULUS TU PARLAGUTAN ROM 10:4

Dibaen Kristus do hasidungan ni Tona i, jadi dapotan hatigoran ma sude halak na porsaya.

IBRANI 2:10

Madung sapatutna nian baenon ni Debata na manompa jana na pangolu sasudena – Jesus gabe sanggam hara ni parkancitanNa i. Jadi hara ni i tarpiohon Jesus do bahat halak anso dohot nipasangap rap dohot Ia. Angke Ia do na mambaen dalan di halahi anso tola dohot nipalua.

IBRANI 9:22

Tutu nian, anggo mangihutkon Tona ni ugamo Jahudi bolas nidok, sasudena sanga aha pe angkon nipaias dohot mudar do; jadi nada tarsesa dosa anggo so adong mudar na niduruskon.