HAMALIMON 26:44 - BIBEL JAMITA NA DENGGAN

⁴⁴ Tapi haru pe laing di luat ni musu halahi tinggal, nada tinggalkononKu sanga roncohononKu halahi. Angke muda Huroncohon halahi, na manggotapkon parjanjian do Au tu halahi, hape Au do Tuhan Debata ni halahi.

HAMALIMON 26:44 ပူးပေါင်းရင်းမြစ်များ

PAMUNGKAAN 17:7

Paingot-ingotonKu do janjingKu na tu ho dohot tu pomparanmu marsundut-sundut jana hot do janjingKu salolot-lolotna. Au ma gabe Debatamu jana Debata ni pomparanmu.

2 RAJA-RAJA 13:23

Tapi nada unjung dihalupahon Tuhan bangsoNia i. Ibo jana denggan do rohaNia tu halahi. Nada dipadiar Ia halahi dipasude tapi ditolong Ia do halahi, hara ni parjanjianNia dohot si Abraham, si Ishak dohot si Jakob.

NEHEMIA 9:17

Nada ra patu halahi, sude hadenggananMu dihalupahon do, jana sude pambaenanMu hahomangan i sian parningotanna abis do. Sian ginjang ni rohana, dipili halahi ma sahalak ketua. Sai giot tu Mesir do halahi, mangulahi gabe hatoban. Hape Debata na sai mangampuni do Ho, silapang andora, na basa jana na sun paribo. Na sun do antong hasurungan ni holongMi: Nada Ho manadingkon halahi.

NEHEMIA 9:31

Tapi hara ni holong ni rohaMu na so marparsuhatan, nada halahi ditadingkon Ho sanga dironcohon. Tutu ma da antong, Ho do Debata na so marpartudosan; na godang holong ni rohaMu, gok paribo ni rohaan!

MASMUR 103:13

Songon asi ni roha ni ama-ama mida angka anakna do, asi ni roha ni Tuhan di angka na manghabiari Ia.

MASMUR 89:33

Tapi anggo si Daud hot do holong ni rohangKu tusi, janjingKu na tusia sai na patulusonKu do i.

MASMUR 94:14

Angke nada ra Tuhan i mangambungkon bangsoNa, jana nada tadingkononNia nampunaNia sandiri.

JEREMIA 14:21

Ulang ma tulakkon hami hara ni goarMu jana ulang ma pabile habangsa hamuliaonMu Ingot ma janjiMu tu hami, ulang ma nian sundati i.

JEREMIA 24:5

“Angka halak na dung dioban i tu Babel Huetong do i songon batu ni ara na jeges-jeges on; jadi hara ni i, Au Tuhan, Debata ni Israel, giot denggan do baenonKu tu halahi.

JEREMIA 30:11

Angke dongananKu do ho ninna Tuhan, anso Hupalua ho: PangabisonKu ma angka bangso inganan parserahanmunui, tapi anggo ho nada pangabisonKu. AjaranKu ma ho di bagasan uhum; jana nada dohononKu ho na so marsala.”

JEREMIA 31:20

O Israel, ho do anak hasianKu, anak haholongan, tampuk ni pusu-pusungKu. Ganop Huondam ho sai lungun do rohangKu marningot ho. Gok ibo ni roha do giot baenonKu tu ho.

JEREMIA 33:26

laing songon i ma tongtong tioponKu parjanjianKu dohot pomparan ni si Jakob dohot naposongKu si Daud. TodoonKu ma sahalak sian pomparan ni si Daud laho mangarajai pomparan ni si Abraham, si Ishak dohot si Jakob. Maribo ni roha ma Au tu bangsongKu jana sonang halahi baenonKu.”

JEHESKIEL 16:60

Tapi ingotonKu do parjanjian na dung Hubaen dohot ho taran di haposoonmu dohot na mambaen parjanjian na hot dohot ho salolot-lolotna.

HAMALIMON 26:11

Rap do Au dohot hamu di bagasan Bandar Na Badia, jana nada unjung Hutinggalkon hamu.

SURAT NI SI PAULUS TU PARLAGUTAN ROM 11:2

Nada! Nada diambungkon Debata bangso na nipiliNia i sian mulana. Diboto hamu do ale angka dongan na tarsurat di Buku Na Badia i taringot tu si Elia, di na niaduhonNia pangalaho ni halak Israel tu Debata. Didok si Elia,

SURAT NI SI PAULUS TU PARLAGUTAN ROM 11:26

Jana i do gabe dalan, anso malua sandok bangso Israel, hombar tu na tarsurat i, “Ro ma sian Sion Sipalua i, sesaonNia ma hajahatan sian pomparan ni si Jakob.

HAKIM-HAKIM 2:1

Kehe ma Surusuruan Ni Tuhan sian Gilgal tu Bokim jana didok ma tu angka halak Israel, “Madung Huparuar hamu sian Mesir jana Huoban hamu tu tano na dung Hujanjihon tu ompungmunu. Madung Hudok muse, ‘Nada gotapkononKu pudun-pudun ni janji antara Au dohot hamu.