HAMALIMON 16:29 - BIBEL JAMITA NA DENGGAN

^29-31 “Angka aturan on pe angkon patuluson tu zaman na giot ro sapanjangna. Di ari sampulu bulan pitu, sude halak Israel dohot angka halak na leban na rap dohot halahi, angkon marpuaso do jana nada tola mangkarejohon sanga aha pe, angke ari na sun badia do ari i. Di ari i angkon baenon do pesta paiaskon bangso Israel sian sude dosa ni halahi, anso ias halahi mangihutkon aturan ni ugamo.

HAMALIMON 16:29 ပူးပေါင်းရင်းမြစ်များ

1 RAJA-RAJA 8:2

Jadi di hatiha Ari Pesta Undung-undung Bulung Rata di bulan Etanim marlagut ma halahi sude.

ESRA 3:1

Di bulan pitu, madung hot angka halak Israel i maringanan di angka kotana be. Di tanggal sada laing di bulan i, marlagut ma halahi di Jerusalem,

ESRA 8:21

Hupabotohon ma di topi ni Batang aek Ahawa i, bahaso angkon puaso sude jana patorukkon roha di adopan ni Debata. Hami tangiangkon do anso dipimpin Debata hami di pardalanan i, jana dijagohon Ia hami, angka dakdanaknami dohot sude sinadongannami.

MASMUR 35:13

Dompak marnyae halahi, marsak do au jana nada mangan, martangiang au lalu paunduk simanjujung,

MASMUR 69:10

Huparkanciti do diringku marhite na puaso, hape habilean do na hujagit.

HARURUAR 12:16

Di ari parjolo dohot di ari papituhon, angkon marlagut ma hamu maribadat. Di ari i nada tola adong markarejo hum saotik pe. Hum pasingkop panganon do tola si karejohononmunu.

HARURUAR 20:10

tapi ari papituhon, i ma Ari Sabat ni Tuhan, Debatamu. Nada jadi mangkarejohon nasa karejo di na sadari i, bope ho, bope anakmu, bope borumu, bope naposomu halaklahi, bope naposomu dadaboru, bope pahan-pahananmu, bope halak na mardagang di hutamu.

HARURUAR 30:10

Sanoli sataon angkon baenon ni si Harun upacara pabadiahon langgatan i; dipispis ia ma tandukna na opat i dohot mudar ni binatang na dihaulkon i baen panyesa ni dosa. Angkon baenon do songon i ganop taon sapanjangna. Angkon badia do langgatan on sudena, dihaulkon tu Au Tuhan.”

HARURUAR 31:14

Angkon pasangapanmunu do Ari Sabat, angke ari na badia do i di hamu; sanga ise mangalanggar habadiaan ni Ari Sabat i, simatehonon noma i; angke sanga ise na mambaen karejo di ari i, siagohononkon do i sian tonga-tonga ni bangsomunu.

HARURUAR 31:15

Onom ari lolotna tola markarejo, tapi anggo ari papituhon angkon marari Sabat do, i ma Ari Paradianan na gok, ari na badia di Tuhan: Sanga ise na mambaen karejona di Ari Sabat, nimatehon do uhuman ni i.

JESAYA 58:13

“Muda nada didege-dege hamu aturan ni Sabat jana nada dikarejohon hamu siurusonmunu di aringKu na badia i, muda didok hamu Ari Sabat i ari na marhasonangan, jana ari na badia ni Tuhan i ari na marmulia; muda dipasangap hamu ari i marhite na so mangkarejohon karejomunu dohot na so mambaen urusanmu sanga na marhata na rumar,

JESAYA 58:3

Disapai bangso i do, “Aha gunana puaso hita anggo na so niida ni Debata! Aha gunana tapaserep rohanta, anggo na so diparrohahon Ia do?” Ninna Tuhan, “Satutuna muda hatiha puaso hamu, na marsijalahi untungna be do hamu jana mamoro sian angka halak na niupaanmunu.

JESAYA 58:5

Muda marpuaso hamu, diparkanciti hamu dirimunu; dipaunduk hamu ulumunu maradu puhung songon bulung ni duhut. Dipahembang hamu abit goni dohot abuan anso modom hamu di ginjangna i. Songon i ma didok hamu lakna na puaso? Diambang hamu jop ma lakna roha ni Tuhan mida pangalaho na songon i?

DANIEL 10:12

Jadi didok ia ma tu au, “Daniel, ulang ho mabiar. Madung ditangihon Debata tangiangmi mamungka sian ari parjolo disi diputuskon ho patoruk rohamu anso gabe marbisuk. Madung ro au gabe songon alus ni tangiangmi.

DANIEL 10:3

Nada hupangan panganon na tabo, juhut dohot anggur nada masuk tu pamanganku jana nada marsuri au lopus gok tolu minggu honokna.

HAMALIMON 23:21

Di ari i nada tola karejohononmunu sanga aha pe, angkon marlagut do hamu pasangap Au. Angkon patuluson ni pomparanmu do paraturan on sapanjangna sanga di dia pe hamu maringanan.

HAMALIMON 23:3

Sanga di dia sajo pe hamu maringanan angkon sumurung Ari Sabat i baenonmunu di Au. Onom ari honokna hamu markarejo tapi ingot ma, ari papituhon, Ari Sabat ari paradianan do i. Nada tola markarejo di ari i, hum marpungu do laho pasangap Au.

HAMALIMON 25:9

jadi di tanggal sampulu bulan pitu i ma ari hasesaan ni dosa. Dokkon ma sahalak kehe tu angka inganan mamalu sarune di sude luat on.

HAMALIMON 3:17

Sahalak pe sian halak Israel nada tola mangankon tabo-tabo dohot mudar. Hot do aturan on ro di salolotna angkon sioloan ni ganop halak Israel sanga di dia pe halahi maringanan.

BILANGAN 29:7

“Di tanggal sampulu bulan pitu, angkon marlagut do hamu laho maribadat. Di ari i marpuaso ma hamu jana nada tola mangkarejohon barang aha pe.

BAENON NI ANGKA RASUL 27:9

Jadi hatiha i, ma salpu Ari Pesta Pardamean Ni Halak Jahudi. Satutuna madung salpu hatiha na denggan di hami, nada tarbaen sonang be na marlayar on. Jadi gabe dipaingot si Paulus ma halahi,

1 KORINTUS 11:31

Tapi muda jolo tapareso dirinta, nada pola uhumon ni Debata hita.

IBRANI 4:10

Angke sanga ise halak na dung masuk tu inganan na gabe paradiananNia, maradian muse ma ia sian karejonia, songon Debata na maradian muse sian karejoNa.

1 SAMUEL 7:6

Jadi marlagut ma halahi sude di Mispa. Ditimbai halahi ma aek jana diparduruskon halahi ma i gabe songon haul tu Tuhan, jana dipaudut halahi tu na marpuaso tangging sadari i. Didok halahi ma, “Madung mardosa hami tu Tuhan.” (Di Mispa ma dipungka si Samuel pasidungkon angka parkaro parsalisian ni halak Israel.)