HALUMBAAN 7:17 - BIBEL JAMITA NA DENGGAN

¹⁷ angke Anak Ni Biri-biri na di tonga-tonga ni habangsa i noma na marmahani halahi. ToguonNia ma halahi tu mual ni aek haroroan ni hangoluan. Jana apusan ni Debata ma sude ilu-ilu sian mata ni halahi.”

HALUMBAAN 7:17 ပူးပေါင်းရင်းမြစ်များ

MASMUR 22:26

Marmanganan ma halak na pogos lopus butongan, halak na manjalahi Tuhan, pujionna ma Ia. Sai anggiat ma halahi tongtong sonang ro di salolot-lolotna.

MASMUR 23:5

Dipasingkop Ho do pesta di au, laing dipaida-ida angka musungku. Dijaluangi Ho do au songon tamu na sangap. Disurduhon Ho dope tu au inumon na tabo maradu marlobian.

MASMUR 28:9

Palua ma Tuhan, bangsoMi pasupasu ma sanga ise halak na gabe nampunaMi. Ho ma na gabe songon parmahan di halahi, jana jagohon ma halahi salolot-lolotna.

JESAYA 12:3

Jadi marjop ni roha ma hamu manimba aek sian mual haluaan.”

JESAYA 25:6

Di Dolok Sion, dihobasi Tuhan Na Markuaso i ma pesta di sude bangso na di tano on. Rade ma dibaen angka sipanganon na tumabo dohot anggur pilian.

JESAYA 25:8

AbiskononNia ma hamatean ro di salolot-lolotna! Apusan ni Tuhan Debata ma ilu-ilu sian ganop mata, jana padaoonNa habilean na nitanggung ni halakNia di sude portibi on. Madung didok Tuhan i songon i, angkon tulus do i tarjadi.

JESAYA 30:19

Ale hamu na maringanan di Jerusalem, nada sai mangandungi be hamu. Ibo roha ni Tuhan jana alusanNia ma hamu muda pio-pio hamu tuSia mangido tolong.

JESAYA 30:25

Di ari dompak na manghobuk angka benteng ni musumu jana dibunui angka halakna i, mamincar ma angka anak ni batang aek sian ganop dolok dohot tor.

JESAYA 35:10

Lalu halahi tu Jerusalem marjop ni roha, manortor lalu marsurak marmoga-moga. Martua ma halahi salolot-lolotna, malua sian habot ni roha dohot susa.

JESAYA 40:11

Songon parmahan, disarihon Ia do na niparmahanNia, jana dipalagut Ia angka anak ni biri-biriNia; diabing Ia do halahi di tanganNia, lambok do ditogu Ia induk ni biri-biriNia.

JESAYA 49:9

Halak na tarkurung Hulehen haluaan, na di hagolapan obanonKu tu na torang. Salang di dolok na limus pe nada halahi marhahurangan, sapanjang dalan rade do sipanganon.

JESAYA 51:11

Angka na nipaluaMu ale Tuhan, mulak tu Sion marsonang-sonang. Marendei halahi jana marmoga-moga, malua sian parhancitan dohot arsak ni roha; salolot-lolotna ma halahi martua. Lungun dohot arsak ni roha madung mandao.

JESAYA 60:20

Adong ma di ho mataniari na so ra lusut, marujung ma hatiha hamarsahanmu, angke Au noma gabe panorangimu na hot manyalpui bulan dohot mataniari.

JESAYA 65:19

Au sandiri pe marsurak-surak hara ni Jerusalem, jana marjop ni roha hara ni bangsongKu; di kota i nada adong be habegean sora ni na tangis dohot na mangangguk.

JEREMIA 2:13

Harana madung dua noli bangsongKu mambaen na jat: Ditadingkon halahi do Au, aek hangoluan, jana dihuar halahi tobat na lilis na so bisa manahan aek.”

JEREMIA 31:9

Mardongan ilu-ilu mardalan halahi, Huapoi jana Huiring-iring halahi. Huoban halahi mamolus sian inganan na bahat aek, mamolus dalan na hornop na so tartuktuk patna be. Anggo di Israel songon ama do Au; Efraim ma anak panggoaran di Au.”

JEHESKIEL 34:23

AngkatonKu ma parmahan laho marmahani halahi, i ma naposongKu si Daud, jana parmahanonnia ma halahi.

MIKA 5:4

jana ia do hadameon i. Muda ro tentara ni Asur mamorangi tanonta on dohot mangarumpakkon partahananta, pabangkitonta ma pitu halak parmahan mangalaho halahi, bope sanga salapan halak pamimpin ni jolma.

MIKA 7:14

Ale Tuhan, parmahani ma bangsoMi, bangso na nitodoMi. Pinjil do halahi maringanan di harangan, ditonga-tonga ni tano na napu. Padiar ma halahi manjampal di padang-padang ni Basan dohot di Gilead songon na jolo i.

MATEUS 2:6

‘Anggo ho ale Betlehem na di Luat Juda, inda bagi na ummenek ho sian angka kota na tarbonggal di Juda. Angke sian ho do ro sahalak Uluan, na manguluhon bangsongKu Israel.’ ”

MATEUS 5:4

Martua ma halak na marsak roha; angke na giot apoan do roha ni halahi.

JOHANNES 10:11

“Au do parmahan na denggan. Rade do mate anggo parmahan na denggan manghopkop biri-birina.

JOHANNES 10:14

Au do parmahan na denggan. Hutanda do angka biri-biringKu jana ditanda halahi do Au,

JOHANNES 4:10

Dialusi Jesus ma, “Sugari ma diboto ho silehen-lehen ni Debata jana ditanda ho na mangido minum sian ho, gabe ho sandiri noma mangido sian Ia, jana lehenonNia ma di ho aek na mangolu.”

JOHANNES 4:11

Didok anak boru i ma, “Tapi so adong timba di Tuhan i, hape sai bagas sumur on. Sian dia ma dapot Tuhan i aek na mangolu i?

JOHANNES 4:14

tapi anggo halak na manginum aek na giot lehenonKi disia, nada manguas be ia salolot-lolotna. Angke anggo aek na giot lehenonKi angkon gabe sada mata mual na marbuldak-buldak do i di dirinia jana mangalehen hangoluan na so mantak.”

BAENON NI ANGKA RASUL 20:28

Antong jagohon hamu ma dirimunu dohot sude habanan i, harana madung dipabangkit Tondi Parbadia hamu gabe parmahan. Parmahani hamu ma parlagutan ni Tuhan i, na nibaen gabe nampunaNia markite-hite mudarNia sandiri.

1 PETRUS 5:2

anso parmahani hamu punguan ni biri-biri ni Debata na nipasahat tu hamu. Sonang ma rohamunu marmahani halahi songon na nihagiotan ni Debata, ulang ma borat rohamunu. Jana ulang ma hum hara ni na giot manjalahi labo baen hamu, tapi hara ni situtu ni rohamunu ma mangoloi.

HALUMBAAN 14:4

Angka halak na manjagohon dirina do halahi, jana nada dipahodar halahi diri ni halahi markite-hite dadaboru; ias do halahi songon bujing-bujing. Dipaihut-ihut halahi do Anak Ni Biri-biri i sanga na tudia Ia kehe. Sian sudena jolma manusia, halahi ma na dung nipalua anso haulkononkon songon patumonaan ni haul tu Debata dohot tu Anak Ni Biri-biri i.

HALUMBAAN 21:22

Nada huida Bagas Na Badia di bagasan kota i, angke Tuhan Debata Parkuaso Na Sumurung i sandiri do Bagas Na Badia, songon i muse Anak Ni Biri-biri i.

HALUMBAAN 21:23

Nada pola porlu sondangan ni mataniari sanga bulan kota i, angke sinondang ni Debata do manyondangisa jana Anak Ni Biri-biri i ma lampuna.

HALUMBAAN 21:4

ApusanNia ma sasude ilu sian mata ni halahi. Nada adong be anggo hamatean; hamarsahan, partangisan sanga parkancitan pe nada adong be. Madung salpu angka pangalaho na honok i.”

HALUMBAAN 21:6

Dung i didok Ia ma tu au, “Sasudena i madung tarjadi, Au do Na Parjolo dohot Na Parpudi, Bonana dohot Ujungna. Halak na manguas Hulehen do minum sian mual hangoluan i.

HALUMBAAN 22:1

Dipatidahon surusuruan i muse dope tu au batang aek na lan sajo songon kristal jana mangalehen ngolu do aekna i. Sian habangsa ni Debata do mardalan batang aek i dohot sian Anak Ni Biri-biri i,

HALUMBAAN 4:11

“Ale Tuhan, jana Debatanami, na tama do Ho manjagit puji-pujian, hasangapan, dohot kuaso, angke ditompa Ho do sandok jana markite-hite rohaMu do adong sudena i jana nitompa.”

HALUMBAAN 5:6

Dung i huida ma sada Anak Ni Biri-biri jongjong di tonga-tonga ni habangsa i, dihaliangi mahluk na mangolu siopat-opat i dohot sude angka pangituai i. Songon na dung hona sambol do idaon Anak Ni Biri-biri i. Pitu tandukna jana pitu dohot matana: i ma tondi na pitu na sian Debata na nisuruNa tu sude portibi on.