HALUMBAAN 6:8 - BIBEL JAMITA NA DENGGAN

⁸ Hupamanat ma, gabe haidaan ma sada kudo na langan tompana, Hamatean do goar ni na manengget i. Dipaihut-ihut Harajaan Hamatean ma ia donok sian pudi. Dipasahat ma saparopat ni tano on tu kuaso ni halahi, anso tarbaen halahi mamunu markite-hite porang, hamamasa ni haleon, markite-hite nyae dohot markite-hite angka binatang panyoro na di tano on.

HALUMBAAN 6:8 ပူးပေါင်းရင်းမြစ်များ

PODA 5:5

Manuat ma ho saratonnia tu inganan ni halak na mate; na giot tu hamatean do dalan na nibolusna.

JESAYA 25:8

AbiskononNia ma hamatean ro di salolot-lolotna! Apusan ni Tuhan Debata ma ilu-ilu sian ganop mata, jana padaoonNa habilean na nitanggung ni halakNia di sude portibi on. Madung didok Tuhan i songon i, angkon tulus do i tarjadi.

JEREMIA 14:12

Haru pe puaso halahi, nangkon na ra Au manerge pio-pio ni halahi mangido tolong; jana haru pe dihaulkon halahi tu Au haul situtungon dohot haul gandum, nangkon na sonang rohangKu mida halahi. Tapi marhite porang, haleon dohot hamamasa ni nyae giot pangabisonKu halahi.”

JEREMIA 16:16

Didok Tuhan ma, “Giot piohononKu bahat halak parihan laho manangkupi angka jolma on. Dung i piohononKu ma bahat halak parburu laho marburu halahi di sandok dolok dohot partoran, dohot di angka liang ni dolok batu.

JEREMIA 16:4

Marmatean do halahi hona nyae na mambaen mate, jana marmatean ma halahi di parporangan sanga mate tangkuraparon. Sahalak pe nada adong na manangisi halahi sanga na manguburkonsa. Marampar do bangke ni halahi songon rompak-rompak di tano i, jana dipapangani unggas ma i dohot angka binatang.

JEREMIA 24:10

ParoonKu tu halahi parporangan, tangkuraparon, dohot nyae masa lopus marmatean halahi sude jana umpe sada na tading di luat na dung Hulehen on tu halahi dohot ompu ni halahi.”

JEREMIA 29:17

Didok Tuhan Na Markuaso i do, ‘ParoonKu ma parporangan, tangkuraparon dohot nyae masa tu halahi; giot baenonKu halahi songon batu ni ara na santak busuk na so tarpangan.

JEREMIA 43:11

Giot ro ma si Nebukadnesar jana taluhononnia Mesir. Jana marmatean ma baenon ni nyae masa angka halak na dung ditontuhon mate. Halak na ditontuhon obanon gabe taban, angkatonna ma i gabe taban jana halak na ditontuhon mate di parporangan, mate ma i panganon ni porang.

JEHESKIEL 29:5

Dung i Hudanggurkon ma ho dohot ihan i sude tu parhorsihan. Ompas ma pamatangmi tu tano jana gampalang ma ho disi. Sahalak pe nada adong na manguburkon ho. LehenonKu ma pamatangmi di angka unggas dohot binatang na asing anso dipapangani.

JEHESKIEL 5:12

Sapartolu sian jolma na mangingani ho, mate ma i hara ni nyae masa dohot baenon ni haleon potir na masa di kota i. Sapartolu hona sambol baenon ni podang humaliangmu, jana sapartolu nari sarsarkononKu sun tu dia jana paihut-ihuton ni podang sian pudi baenonKu.

HOSEA 13:14

Giot paluaonKu dehe bangso on sian kuaso ni inganan ni jolma na mate? Jo hamatean, sarsarkon ma balamu! Padalan ma karejomu na manyegohon i! Nada be ibo rohangKu mida bangso on.

HABAKUK 2:5

Matua dipaoto-oto hakayoan i do jolma. Jolma na songkal, bulbul do i jana sai humasusa. Songon hamatean do i, na so habutongan; luat tu luat sai rampasonna.

ZAKARIA 6:3

na patoluhon kudo na bontar jana na paopatkon kudo sibolang.

MATEUS 11:23

Dohot ho, kota Kapernaum! Giot pagincaton ma ho lakna lalu tu banua ginjang? Nada! Tu narako do ho ambungkononkon! Sugari sura di kota Sodom dibaen angka tanda hahomangan na nibaen ditonga-tongami, laing adong dope kota i lopus sadari on!

MATEUS 24:7

Marporang ma bangso na sada maralohon bangso na asing. Sanga di dia pe, masa ma haleon potir dohot lalo.

1 KORINTUS 15:55

“Jo, hamatean, di dia do hamonanganmi? Jo, hamatean, di dia he corotmi?”

HALUMBAAN 1:18

Au do Na Mangolu i! Madung mate hian Au, tapi ligi ma, na mangolu do Au salolot-lolotna. Guru di Au do hamatean dohot inganan ni angka jolma na dung mate.

HALUMBAAN 12:4

Disarat ia ma dohot lailainia i sapartolu sian angka bintang na di langit i, disampakkon ia ma i tu tano on. Jongjong ma naga i di jolo ni anak boru na giot manubuhon dakdanakNa i anso manigor dipolgak ia Dakdanak i disi sorang.

HALUMBAAN 9:15

Dipalua ma surusuruan na opat i. Madung dihobasi hian halahi laho mamunu sapartolu sian sude jolma manusia di jom, ari, bulan dohot taon na dung ditontuhon i hian.

HALUMBAAN 9:18

Hona bunu ma sapartolu sian jolma dibaen parmaraan na tolu i; i ma api, timus dohot barerang na ruar sian pamangan ni angka kudo i.