HALUMBAAN 20:2 - BIBEL JAMITA NA DENGGAN

² Dung i ditangkup ia ma naga, ulok na tobang i – i ma Sibolis dohot Setan i – jana dirante ia ma i saribu taon honokna.

HALUMBAAN 20:2 ပူးပေါင်းရင်းမြစ်များ

PAMUNGKAAN 3:1

Ulok do binatang na umbisuk sian sude binatang na nitompa ni Tuhan Debata. Disapai ulok i ma tu dadaboru i, “Tutu ma he na so dipatola Debata hamu mangankon batu ni hayu na di bagasan kobun on sude?”

PAMUNGKAAN 3:15

Marsihosoman ma ho dohot dadaboru i. Marsalisi ma torus pomparanna tu pomparanmu. Ropukkonon ni pomparannia ma ulumu jana turbingonmu ma tambihulna.”

JOB 1:7

Disapai Tuhan ma tusia, “Sian dia ho?” Dialusi Sibolis ma, “Na baru madang-adang dope au pahae-pahulu jana hubolusi sude portibi.”

JESAYA 24:22

Rap palaguton ma halahi sude songon tahanan na di bagasan liang. Hurungon ma halahi di bagasan hurungan lopus dapot hatihana niuhuman.

JESAYA 27:1

Pakeon ni Tuhan ma podangNia na togu jana na tajom i laho manguhumi Lewiatan, ulok na margeldok-geldok jana na mangarpe i dohot mamunu naga laut i.

JEHESKIEL 47:5

Sanoli nari disuhat ia ma lima ratus meter nari, jana mabagastu do disi aekna i anggo boluson mardalan pat. Muda giot taripar halak disi angkon marlange noma i.

MATEUS 19:29

Angke sanga ise na maninggalkon bagasna, sanga kahanggina, sanga ibotona, sanga pe inangna dohot amangna, sanga dakdanakna, sanga sabana hara ni Au, saratus lompit ma jagiton ni halahi mangulahi. Nilehen muse dope disia hangoluan na so mantak.

MATEUS 8:29

Jadi marsurak ma halahi na dua ninna halahi ma, “O, Anak Ni Debata, na giot bia do baenonMu hami? Betak na giot siksaonMu ma hami? Na he nada dope dapot hatihana?”

MARKUS 4:15

Huhul mardabuan di topi-topi ni dalan do hata i, tarsongon i ma angka halak na manangihon hata i. Disi dibege halahi manigor jalop ma ro Sibolis i mambuat hata na dung nisabur i di roha ni halahi.

MARKUS 5:7

Gogo ma didokkon ia, “Jesus, Anak Ni Debata Na Gumincat! Na giot mambaen bia do Ho tu au? Mangasahon Debata, mangido au, ulang ma parkanciti au!” (

JOHANNES 12:31

Saonnari ma hatihana uhuman portibi on; taluhonon ma raja ni portibi on saonnari.

JOHANNES 16:11

madung manguhumi Debata, dibaen madung hona uhum parkuaso ni portibi on!

SURAT NI SI PAULUS TU PARLAGUTAN ROM 16:20

Tapi tibu ma diropukkon Debata mual ni hasonangan i, Sibolis i tu toru ni patmunu! Sai didongani asi ni roha ni Tuhanta Jesus Kristus ma hamu. Sai tongtong ma hamu dipasupasu Jesus Kristus Tuhanta i!

IBRANI 2:14

Angke anggo angka halak na nidokNia i dakdanakNia, i ma angka mudar dohot sibuk, gabe sarupa ma Jesus sandiri dohot halahi jana mangolu songon pangalaho ni jolma sarupa dohot halahi. Songon i pe pambaenNia, anso ditaluhon Ia do Sibolis i na maniop kuaso ni hamatean i.

1 PETRUS 5:8

Angkon hobas do hamu jana jonggor! Angke Sibolis do musumunu. Songon singa do i na res pahae res pahulu na mangorong soroanna.

2 PETRUS 2:4

Haru angka surusuruan na mardosa pe nada dipatola Debata malua sian uhuman, tapi ambungkonon do i tu narako. Pamasuhon do halahi tu inganan na golap anso tarhurung disi lopus tu Ari Paruhuman.

JUDAS 1:6

Laing ingot hamu ma angka surusuruan na so mangargahon jabatan ni halahi, na gabe kehe halahi manadingkon ingananna. Dipasung Debata do angka surusuruan i dohot hayu na so ra sego salolot-lolotna, di inganan na golap situtu. Torus ma halahi disi ditahan lopus nidabu uhum tu halahi di Ari na godang i.

HALUMBAAN 12:13

Di na tarboto tu naga i na dung dibuang ia tu tano on, diompot ia ma mangkojar dadaboru na baru manubuhon Dakdanak i.

HALUMBAAN 12:15

Gabe dibursikkon naga i ma aek na bahatan sian pamangannia tu dadaboru i laho mangayupsa.

HALUMBAAN 12:17

Mur gilap ma naga i tu dadaboru i, gabe kehe ma ia mangaroro na asing pinompar ni dadaboru i, i ma sasude halak na marmomosi tona ni Debata dohot angka na maniop hasaksian ni Jesus Kristus.

HALUMBAAN 12:3

Dung i tarida muse ma tanda na asing di langit. Adong ma sada ulok naga na rara na lobi godang, pitu uluna jana sampulu tandukna. Jana pitu tuku di ginjang ni uluna.

HALUMBAAN 12:4

Disarat ia ma dohot lailainia i sapartolu sian angka bintang na di langit i, disampakkon ia ma i tu tano on. Jongjong ma naga i di jolo ni anak boru na giot manubuhon dakdanakNa i anso manigor dipolgak ia Dakdanak i disi sorang.

HALUMBAAN 12:9

Diambungkon ma naga i tu ruar! I ma ulok na tobang i na margoar Sibolis sanga Setan, na paoto-otohon sude portibi on. Diambungkon ma ia tu tano on rap dohot sude surusuruannia i.

HALUMBAAN 13:2

Tarsongon babiat do rupa ni binatang i, patna songon pat ni gompul jana babana i songon baba ni singa. Dung i dilehen naga na huida parjolo i ma tu binatang i gogona sandiri, dohot habangsa dohot kuasonia na godang i.

HALUMBAAN 13:4

Jana disomba halahi ma naga i hara ni na dung nilehennia i kuasonia tu binatang i. Laing dohot muse do binatang i disomba halahi. Didok halahi ma, “Ise dehe na sarupa songon binatang i? Ise dehe na tarbaen mamorangi ia?”

HALUMBAAN 20:10

Dung i didanggurkon ma Sibolis na paoto-otohon halahi i tu bagasan api na marcampur dohot barerang. Disi do inganan ni binatang i dohot panurirang pargabus na nibuang najolo i. Diparkanciti ma halahi disi arian na borngin nada marnamantak ro di salolot-lolotna.

HALUMBAAN 20:7

Dung salpu hatiha sisaribu taon i, paluaon ma Sibolis i sian hurunganna i,

HALUMBAAN 9:11

Adong do rajana na mamarenta halahi, jana rajana i ma na martanggung jawab taringot tu rura hamatean i. Si Abadon ma goarna di hata Ibrani; jana hata Junani didok Apolion (astuanna “Panyego-nyego”).