HALUMBAAN 12:1 - BIBEL JAMITA NA DENGGAN

¹ Jadi tarida ma di langit hahomangan godang jana na luar biasa. Adong ma sahalak dadaboru na mamake mataniari songon pakeanna, dohot bulan di toru ni patnia. Adong ma di ulunia i sada tuku na nibaen sian dua bolas bintang.

HALUMBAAN 12:1 ပူးပေါင်းရင်းမြစ်များ

2 JUJUR TAON 32:31

Jana dompak diparro ni angka utusan na sian Babel i laho manyapai tusia taringot tu hamamalumnia na pahomang roha i, dipadiar Tuhan ma si Hiskia mambaen lomo ni rohana sandiri laho manguji rohania.

MASMUR 104:2

maruloskon sinondang na torang do Ho. Dipahembang Ho do langit songon undung-undung,

MASMUR 84:11

Angke pangondian na gogo do Tuhan Debata, na mangalehen sangap dohot basa-basa di hita. Sai marpupu do dilehen Ia hadenggananNia tu halak na patuluskon hagiotNia.

ENDE NA GODANG 6:10

Ise dehe na ro i songon parbincar ni mataniari, uli songon bulan tula dohot manyirlak songon las ni ari; jagar songon tentara na maroban angka mandera?

JESAYA 61:10

“Jop ma rohangku hara ni Tuhan, hara ni Debata, tondingku marhamogaan. Songon pangoli di ari parbagasonna mamake pakean na sumurung jegesna, madung dipapakehon Tuhan tu au baju haluaan dohot hamonanganku.

JESAYA 62:3

Songon tuku na jeges sun do ho di Tuhan, tuku harajaan di tangan ni Debatamu.

ZAKARIA 9:16

Muda dung dapot ari i, paluaon ni Tuhan ma bangsoNa, songon parmahan na paluahon biri-biriNa sian mara. Marsinondang be ma halahi di tano ni Tuhan, songon parnyala-nyala ni tuku na marbatu intan.

MALEAKI 4:2

Tapi anggo tu hamu angka na mangkabiari Au, songon mataniari bincar do kuasongKu na paluahon dohot padumpangkon hamamalum di hamu. Malua do hamu jana marjop ni roha songon anak ni lombu na baru dipalua sian barana.

MATEUS 12:38

Dung i marroan ma angka Siboto Surat dohot halak Parise mandok tuSia, “O Guru, por do rohanami marnida anso dibaen Guru i jolo hahomangan.”

MATEUS 24:30

Dung i pe anso tarida tanda ni Anak Ni Jolma i di langit. Anggo disi tangis ma sude bangso na satano on, marsak. Diida halahi ma Anak Ni Jolma i ro di bagasan ombun mardongan kuaso dohot hasangapan godang.

MARKUS 13:25

Mardabuan ma angka bintang sian langit i, gabe sursar ma sude angka pangalaho ni parlangitan.

LUKAS 21:11

Sanga di dia pe masa ma angka lalo na gogo. Masa ma haleon dohot nyae bala. Masa muse ma angka pangalaho na jorbut dohot angka hahomangan sian langit.

LUKAS 21:25

“Saulahon adong ma angka tanda tarida di mataniari, di bulan dohot di angka bintang i. Di tano on pe hempot be ma angka bangso jana mabiar be hara ni husasak dohot ombak ni laut.

JOHANNES 3:29

Bayo pangoli do nampuna boru na niolina. Anggo dongan ni bayo pangoli i hum jongjong sajo do ia mandongani jana manangihon pangoli i jana jop ma rohania umbege sora ni pangoli i. Songon i ma au, saonnari marjop ni roha situtu do au.

BAENON NI ANGKA RASUL 2:19

BaenonKu ma angka hahomangan di ginjang, di langit, dohot angka tanda di toru, di tano on; adong ma mudar dohot api, uas dohot timus.

SURAT NI SI PAULUS TU PARLAGUTAN ROM 13:14

Padiar hamu ma Tuhan Jesus Kristus manontuhon sanga aha sibaenonmunu. Jana ulang be dioloi hamu bakomunu na mardosa i laho papuaskon hagiot ni sibuk.

SURAT NI SI PAULUS TU PARLAGUTAN ROM 3:22

i ma hatigoran ni Debata markite-hite haporsayaan di Jesus Kristus, tu sude halak na porsaya. Harana nada adong imbarna:

2 KORINTUS 11:2

Malungun do au di hamu, songon dihalungunkon Debata sandiri hamu. Tarsongon bujing-bujing na ias dope hamu, na hupatunangkon tu sada bayo, i ma Kristus.

GALATIA 3:27

Angke, sude hamu na dung nipandidihon di bagasan Jesus madung diparabit hamu Kristus i.

GALATIA 4:26

Tapi anggo Jerusalem na di banua ginjang i, i ma boru na mardeka, jana i ma ina di hita.

GALATIA 6:14

Tapi anggo au sanga na bia pe nada ra au mamuji-muji sanga aha, asing sian silang ni Tuhanta Jesus Kristus i. Angke hara ni silangNa i madung mate au maradopkon portibi on, jana portibi on pe, madung mate di au.

EPESUS 5:32

Bagas do na nidok ni hata i. Tapi domu tu parsambungan ni Kristus dohot parlagutan i do na hudok disi.

HALUMBAAN 1:20

On ma arti ni rahasia ni bintang na pitu na niidamu di tangan siamunKon dohot astuan ni parlampuan na pitu na nibaen sian sere i. Bintang na pitu i, i ma angka surusuruan ni parlagutan na pitu i, jana parlampuan na pitu i, i ma parlagutan na pitu i.”

HALUMBAAN 11:19

Gabe marbuka ma Bagas Na Badia ni Debata di banua ginjang jana tarida ma poti inganan ni surat parjanjian na di bagasan Bagas Na Badia i. Manigor ro ma hilap na sumiksak dohot sora ni ronggur na mangkutur jana na matuoror. Ro ma lalo jana madabu ma ambolas na lobi por.

HALUMBAAN 12:3

Dung i tarida muse ma tanda na asing di langit. Adong ma sada ulok naga na rara na lobi godang, pitu uluna jana sampulu tandukna. Jana pitu tuku di ginjang ni uluna.

HALUMBAAN 15:1

Dung i huida ma di langit sada tanda hahomangan jana na godang situtu. Adong ma pitu surusuruan dohot pitu mara, bala na parpudi. On ma na parpudi situtu dipalalu Debata haririmasNia.

HALUMBAAN 21:14

Di ginjang ni dua bolas batu ojahan do dipajongjong tembok ni kota i. Tarsurat do angka goar ni rasul ni Anak Ni Biri-biri i, i ma sidua bolas halak i di angka batu ojahan i.

HALUMBAAN 21:23

Nada pola porlu sondangan ni mataniari sanga bulan kota i, angke sinondang ni Debata do manyondangisa jana Anak Ni Biri-biri i ma lampuna.