HALUMBAAN 1:1 - BIBEL JAMITA NA DENGGAN

¹ On ma halumbaan ni Jesus Kristus, na nilehen ni Debata diSia anso dipatidahon Ia i tu angka naposoNia taringot tu angka na giot masa. Jana madung dipatangkas jana ditongos Ia i markite-hite surusuruanNia tu naposoNia si Johannes.

HALUMBAAN 1:1 ပူးပေါင်းရင်းမြစ်များ

MASMUR 25:14

Ale-ale ni Tuhan do halak na mabiar tuSia jana dipaboa Ia do janjiNa tu halahi.

DANIEL 8:16

Hubege ma sora na pio-pio sian bariba ni Batang aek Ulai, mandok, “Gabriel, patorang ma tusia parnidaan i.”

DANIEL 9:21

Taran na martangiang i au, habang ma adop au Gabriel na dung huida di bagasan parnidaanku na salpu i. Hatihana ma dompak i di halak manghaulkon haul potang ari.

DANIEL 9:23

Di na mamungka ho mangido tu Debata, dilehen Ia do alusna. Dihaholongi Ia do ho, hara ni i ma umbaen na ro au laho paboahon alusna tu ho. Antong, tangihon ma anso hupatorang tu ho astuan ni parnidaan i.

AMOS 3:7

Nada dibaen Tuhan Debata i sanga na aha painte so dipabotohon Ia sangkap na nibaenNia tu angka panurirang, naposoNia.

JOHANNES 12:49

Jana songon i do tutu! Harana Au pe nada jungada Au mandok hata sian roha-rohangKu sandiri; Damang na marsuru Au, Ia do na mamarentahon tu Au sanga aha na angkon dokkononKu jana sanga aha sipabotohononKu.

JOHANNES 15:15

Anggo hamu nada Hugoari be naposo, harana anggo naposo nada diboto ia sanga aha na nikarejohon ni morana. Dongan do hamu Hugoari, harana sude na Hubege sian Damang madung Hupaboa tu hamu.

JOHANNES 17:8

Madung Hupalalu tu halahi barita na nilehen ni Damang i tu Au; jana madung dijagit halahi i. Madung tangkas sajo di halahi, Damang do na marsuru Au.

JOHANNES 3:32

Angka na niidaNia dohot na nibegeNia do disaksihon Ia, hape umpe sahalak na mangkaporsayai hasaksianNia.

JOHANNES 8:26

Bahat dope na giot dokkononKu dohot uhumanKu taringot tu hamu. Tapi Hum na Hubege sian na marsuru Au, i sajo do paboaonKu tu portibi on – harana sintong do Ia.”

SURAT NI SI PAULUS TU PARLAGUTAN ROM 16:25

Debata do na tarbaen patogu rohamunu mangihutkon Jamita Na Denggan na hujamitahon i, i ma taringot tu Tuhan Jesus Kristus, jana mangihutkon hasimoon na dung dipapatar, dung jolo ditabunihon sian na robi.

GALATIA 1:12

Nada sian jolma hujagit jamita i, jana nada adong sahalak pe na mangajarkon i tu au. Jesus Kristus sandiri do na patangkaskon i tu au.

EPESUS 3:3

Diungkap Debata do rahasia ni sangkapNia jana dipajojor Ia i tu au. (Taringot tuson madung husuratkon i saotik nangkin di ginjang,

TITUS 1:1

Sian si Paulus, naposo ni Debata, bope rasul ni Jesus Kristus, na nipili do au jana na nisuru laho manyarihon angka na nipili ni Debata anso mur togu di haporsayaanna. Angkon togu-toguonku do halahi laho mananda hasintongan na niajarkon ni ugamonta,

HALUMBAAN 1:19

Antong, suratkon ma sanga aha na niidamu, i ma angka na adong saonnari dohot angka na giot tarjadi tu pudi on.

HALUMBAAN 1:9

Si Johannes do au, kahanggi bope donganmunu saparjuangan na topet manaon parkancitan, di harajaan dohot di pohom ni roha paintehon Jesus. Na tarbuang do au di pulo Patmos hara ni na pararatkon jamita na sian Debata na nipasahat ni Jesus.

HALUMBAAN 17:1

Dung i ro ma sada sian surusuruan na pitu i na maniop sambong na pitu i, mangkobari dohot au ninna ma, “Beta, anso hupatidahon tu ho sanga na bia baenon manguhumi panggampang godang i, na juguk di ginjang ni aek na bahat.

HALUMBAAN 19:10

Tungkap ma au di jolo ni surusuruan i giot marsomba tusia, tapi ning ia ma mandok tu au, “Ulang! Ulang pola marsomba ho tu au, Debata ma somba! Harana au pe laing naposo do songon ho jana sarupa dohot angka donganmu na marhasaksian taringot tu Jesus.” Somba ma Debata, angke anggo hasaksian taringot tu Jesus, i ma tondi hasurirangon.

HALUMBAAN 19:9

Dung i didok ia ma tu au, “Suratkon ma on: ‘Martua do sanga ise halak na dung niontang tu pesta parbagason ni Anak Ni Biri-biri i.’ ” Dung i didok surusuruan i muse dope tambana, “On ma angka hata na sintong na sian Debata.”

HALUMBAAN 21:2

Gabe huida ma Kota Na Badia i, i ma Jerusalem na imbaru, na mijur sian banua ginjang sian Debata. Madung jolo nihobasan kota i songon boru na giot marbagas laho mandapotkon halaklahina.

HALUMBAAN 21:9

Ro ma tu au sahalak sian surusuruan na pitu i na maniop angka sambong na bubung marisi bala na parpudi i, ning ia ma tu au, “Beta anso hupatidahon tu ho dadaboru ni Anak Ni Biribiri i, i ma boru sipabagason i.”

HALUMBAAN 22:1

Dipatidahon surusuruan i muse dope tu au batang aek na lan sajo songon kristal jana mangalehen ngolu do aekna i. Sian habangsa ni Debata do mardalan batang aek i dohot sian Anak Ni Biri-biri i,

HALUMBAAN 22:16

“Au, Jesus, madung Hutongos surusuruanKu tu hamunu anso dipaboa ia taringot tu pangalaho on laho manyarihon angka parlagutan i. Pomparan ni si Daud do Au; Au ma bintang sidongdong na torang i.”

HALUMBAAN 22:6

Jadi didok surusuruan i ma tu au, “Tutu do sude pandohan on jana sihaposan, Tuhan Debata na mangalehen TondiNia tu angka panurirang i, i do na marsuru surusuruanNia laho patuduhon tu angka naposoNia sanga aha na angkon masa santongkin nari.”

HALUMBAAN 22:8

Au si Johannes, madung hubege jana huida i sudena. Dung sidung hubege jana huida, tungkap ma au di jolo ni surusuruan na patidahon sasudena i tu au, giot marsomba ma nian au tusia,

HALUMBAAN 22:9

hape ning ia ma tu au, “Ulang! Ulang ho marsomba tu au! Debata ma somba! Angke laing naposo muse do au sarupa dohot ho, dohot songon angka donganmu panurirang dohot sudena halak na marmomos angka hata na di bagasan buku on!”

HALUMBAAN 4:1

Dung salpu i, huligi ma, mungkap do sada pintu di banua ginjang, jana mangkuling ma sora na dung hubege mangkatai dohot au di mulana i, songon sora ni sarune, ninna ma, “Manaek ma ho tuson jana patidahononKu ma tu ho sanga aha na giot tulus dung salpu on.”

HALUMBAAN 5:7

Dung i ro ma Anak Ni Biri-biri i tu jolo jana dibuat Ia ma buku na nibalun i sian tangan siamun ni na juguk di habangsa i.