HABAKUK 3:2 - BIBEL JAMITA NA DENGGAN

² Tarbege do tu au, ale Tuhan, taringot tu Ho, gabe digohi roha bisuk ma ate-atengku. Sugari diulahi Ho ma nian sanoli nari pambaenanMu na godang i di hatihanami saonnari. Holong ma nian rohaMu mida hami haru pe muruk Ho.

HABAKUK 3:2 ပူးပေါင်းရင်းမြစ်များ

ESRA 9:8

Hape saonnari, ale Tuhan Debatanami, apala on dope maribo ni roha Ho tu hami. Dipalua Ho do sanga na piga halak sian tonga-tonganami sian parhatobanan anso mangolu di bagasan dame di inganan na marhapunjungan on. Dilehen Ho do di hami ngolu na imbaru. Dompak di bagasan parhatobanan hami,

JOB 42:5

Nabaruon dapot sian parbinegean do parbinotoanku tu Ho, tapi anggo saonnari adop mata do hutanda Ho.

MASMUR 119:120

Humitir do au hara ni na mabiar mida Ho, panyogiton do au maradopkon haputusanMu.

MASMUR 25:6

Ingot ma denggan dohot holong ni rohaMu, na nipatidahonMu mamungka sian hatiha na salpu.

MASMUR 38:1

Tuhan, ulang uhumi au di bagasan parpiar ni murukMu, ulang parhanciti au di milas ni rohaMu.

MASMUR 44:1

Hami bege sandiri do, ale Debata, holong ni roha na nibaritahon ni ompunami, taringot tu hagodangan ni karejo na nipatulusMu di hatiha na salpu di na robi.

MASMUR 71:20

Madung dipadondonkon Ho tu au bahat sitaonon na dokdok, hape dipasuang Ho do gogongku, jana disungguli Ho au sian tanoman.

MASMUR 78:38

Hape dihasiani jana diampuni Ia do bangsoNia i jana nada dipatimpas Ia halahi. Marpupu do diorom Ia murukNia, jana nada dipagurgur Ia rimasNia.

MASMUR 85:6

BangsoMu do hami, pargogoi ma hami mangulahi, anso laing marpupu Ho tarpuji hami.

JESAYA 53:1

“Ise ma porsaya tu barita na hami bege? Tu ise ma na dung dipataridahon kuaso ni Tuhan na gok sahala?

JESAYA 54:8

Hara ni parpiar ni murukKu, Hutabunihon bohingKu, santongkin maradopkon ho. Tapi patuduhononKu ma tu ho holong ni rohangKu salolot ni lolotna.” Songon i ma na Hudok, Au Debata Sipalua ho.

JESAYA 63:15

Ale Tuhan, tatap ma hami sian banua ginjang, sian ingananMu na badia jana marmulia. Di dia do pangiburuMu dohot hagogoonMu? Di dia do holong dohot ibo ni rohaMu? Di dia do diparrohahon Ho hami? Ulang ma nian manghohom Ho tu hami.

JESAYA 66:2

Nada he tanganKu do mambaen sasudena umbahen masa na songon on? Songon i do pandok ni Tuhan. Tapi tu halak si songon on ma nolnol Au marnida, jolma na tartindas dohot na maheu, na mabiar tu hatangKu.

JEREMIA 10:24

Ajar ma hami ale Tuhan, dohot na sapatutna. Ulang ma dohot hamumurukMu, anso ulang gabe mago hami.

JEREMIA 10:7

Ise ma he na so mabiar marnida Ho, ale Raja ni sandok bangso? Tutu ma da, Ho do na patut sipujion jana na patut pasangapon. Sian sandok na pistar di tonga-tonga ni angka bangso dohot sian sude angka raja ni halahi, sahalak pe nada adong martudosan tu diriMu ale Tuhan.

JEREMIA 29:10

Didok Tuhan muse, ‘Muda dung dapot hatihana sipitu pulu taon di Babel, parrohahononKu ma hamu mangulahi jana patulusonKu ma na Hujanjihon laho paulakkon hamu mangulahi tu inganan on.

JEREMIA 46:28

Jadi ulang be hamu mabiar, ale bangsongKu, ro noma Au laho paluahon hamu. Giot timpaskononKu noma angka bangso ingananmunu Huparserak, tapi anggo tu hamu nada baenonKu songon i. Tutu nian anggo hara ni hasalaan na nibaenmunu angkon manjagit uhuman do hamu, tapi nada pola uhuman na mahancittu. Au Tuhan, madung mandok songon i.”

ANDUNG 3:32

Haru pe dibaen Ia hita susa, tapi nauli basa do anggo Tuhan, hot do holong ni rohaNia marlobi-lobian.

DANIEL 8:17

Jadi ro ma ia tu inganan hajongjonganki, jana dompak ro ia tarsonggot ma au jana manungkap, dung i didok ia ma tu au, “Antusi ma, o anak ni jolma taringot tu ari parpudi do parnidaan on!”

DANIEL 9:2

Di taon parjolo mamarenta ia, au si Daniel, mamparate-atehon di bagasan buku ugamo taringot tu bilangan ni taon hombar tu na nidok ni Tuhan tu panurirang Jeremia angkon masa tu Jerusalem na dung gabe lobu i, i ma pitupulu taon.

HABAKUK 3:1

Tangiang ni Panurirang Habakuk. Mangihutkon logu ni andung-andung.

HABAKUK 3:16

Panyogiton pamatangku pabege-begesa bibirku pe humitir, jana rohangku pe mabiar. Gabe gale ma au nada adong be gogo, tartuktuk patku, mardalan pe nada malo. Hupasada noma rohangku paintehon uhuman tu angka bangso na ro mamorangi hami.

ZAKARIA 1:12

Dung i didok Surusuruan i ma, “O Tuhan Na Markuaso, pitu pulu taon honokna muruk Ho tu Jerusalem dohot tu angka kota na adong di Juda. Sadia honok nari sai tongtong Ho muruk jana nada ampunanMu halahi?”

JOHANNES 10:10

Anggo panangko, na giot manangko sajo do i muda ro, mamatehon dohot manyegohon. Tapi anggo Au muda ro, anso marhangoluan do halahi – i ma hangoluan na marlobi-lobi.”

SURAT NI SI PAULUS TU PARLAGUTAN ROM 10:16

Tapi nada sudena halak manjagit Jamita Na Denggan i. Angke didok si Jesaya do, “O Tuhan, ise ma he na mangkaporsayai na hami baritahon i?”

PILIPPI 1:6

Debata sandiri do na mamungka karejo na denggan i di tonga-tongamunu. Jana pos do rohangku toruskononNia karejo i lopus tu ari haroro ni Kristus Jesus mangulahi.

IBRANI 11:7

Hara ni na porsaya, gabe dijagit si Noak do barita na nilehen ni Debata tusia taringot tu angka na giot masa muse, na so haidaan dope tanda-tandana. Laing hara ni i muse ma, gabe dioloi si Noak Debata, gabe dipauli ia sada parau na paluahon ia muse rap dohot pangisi ni bagasnia. Jadi gabe dipasala ma portibi on, hape anggo si Noak sandiri didok Debata ma gabe halak na burju hara ni haporsayaannia.

IBRANI 12:21

Sanga aha na niida ni halak Israel i, i noma sogenna jabat didok si Musa, “Mabiar do au jana humitir!”

HALUMBAAN 15:4

Ise dope he na so mabiar mida Ho, Tuhan, jana ise dope he na so ra pasangapkon goarMu? Hum Ho sajo do na badia. Marroan ma angka bangso sudena manyomba Ho dibaen madung diida sasude halak angka panguhumanMu na tigor i.”