HABAKUK 2:5 - BIBEL JAMITA NA DENGGAN

⁵ Matua dipaoto-oto hakayoan i do jolma. Jolma na songkal, bulbul do i jana sai humasusa. Songon hamatean do i, na so habutongan; luat tu luat sai rampasonna.

HABAKUK 2:5 ပူးပေါင်းရင်းမြစ်များ

2 RAJA-RAJA 14:10

Hara ni na dung talu dibaen ho halak Edom ale Amasia, gabe ginjang ma rohamu. Dumengganan ma marmoga-moga ho hara ni hamonanganmi, di bagasmu ma ho. Aha ma gunana di ho mangalap-alapi hasusaan na hum pabaen-baen mago tu ho sandiri dohot tu rayatmu?”

MASMUR 138:6

Na godang do Ho, hape laing diparrohahon Ho muse do halak na menek, nada tarbaen halak siginjang roha martabuni sian joloMu.

PODA 20:1

Inumon na koras mambaen jolma hurang ajar jana gaor oto do halak na minum lopus mabuk.

PODA 21:24

Jolma na oto jana siginjang roha sai mangincahi do i jana pamalo-malohon.

PODA 27:20

Anggo di inganan ni halak na mate, lumbang do inganan; laing songon i ma hagiot ni jolma nada tarsuhat bidangna.

PARJAMITA 5:10

Barang ise na impol rohana tu hepeng, nada tarpapuas dohot hepeng, jana barang ise na impol rohana tu sinadongan, nada tarpapuas dohot pandapotanna. On pe magopo do.

JESAYA 14:6

na manyosak marhite murukna jana sai torus mamparhanciti angka bangso na nitaluhonna.

JESAYA 16:6

Didok bangso Juda ma, “Madung hami bege sanga songon dia ginjang ni roha ni Moab. Hami boto do na gakgak halahi jana na bunggal, hape hatana na teal i na so marisi bagi aha do i.”

JESAYA 2:17

Patutoruon ma halak na gakgak, jana papatuon ma halak na ginjang roha. Mago noma angka gana-ganaan sian sisik ni tano on. Anggo di ari i hum sasada Tuhan noma sipasangapon.

JESAYA 21:5

Huida muse ma horja na godang na dung dihobasi; rade juguhan di angka tamu na niontang. Mangan minum ma halahi. Ompot ma tarbege parenta, “Hamu angka panglima! Pasingkop hamu angka parincemunu!”

JESAYA 5:14

Maradu ngangang ma pamangan ni rura hamatean laho mambondut angka halak na godang di Jerusalem rap dohot rayat na somal marpesta i.

JESAYA 5:8

Marjaya ma hamu! Ditobusi hamu ma angka bagas dohot angka ladang laho manamba sinadonganmunu. Nada sadia honok nari abis ma inganan di halak na asing jana hum hamu sajo noma na maringanan di luat i.

JEREMIA 25:9

‘PiohononKu ma sude bangso na sian Utara, songon i muse naposongKu si Nebukadnesar raja ni Babel. ArahononKu ma halahi marporang mangalo Juda dohot halakna i sude dohot bangso na humaliangsa. PatimpasonKu sude bangso on rap dohot angka bangso hombarna jana padiaronKu malala sapanjangna. Tarsonggot ma halak na midasa jana panyogiton. Au Tuhan, madung mandok songon i.

JEREMIA 50:29

Didok Tuhan, “Suru hamu ma angka parpana manyerang Babel. Arahon hamu ma sandok halak na malo mamake pana. Hobuk hamu ma kota i jana sahalak pe ulang paloas hamu luncat. Baloskon sude pambaenanna i jana baen hamu ma tusi hombar tu pangalahona angke na dung salpu do pambaenna maradopkon Au, Na Sun Badia, Debata Ni Israel.

JEREMIA 51:39

Di na manggogo roha ni halahi giot mangan, pasingkoponKu ma sipanganon di halahi, jana baenonKu ma halahi mabuk jana ribur lopus tarpodom jana nada tarsunggul-tarsunggul be.

HABAKUK 1:15

Ditangkup bangso Babel do angka jolma dohot hail, songon dia ihan halahi pambaenna. Lalu disarat ma halahi di bagasan jala, dung i dipamasuk tu bagasan hadang-hadanganna; gabe marmoga-moga ma bangso Babel hara ni doharna.

HABAKUK 1:17

Padiaron ma he sai torus halahi manyintak podangna mamunui angka bangso, nada adong ampunna?

HABAKUK 2:4

Jana ingot ma: halak na gakgak nada tigor rohana, tapi anggo halak na tigor sian haporsayaanna, i do na giot mangolu.”

1 TESSALONIKA 4:11

Usahohon ma anso sonang hamu, ulang pola anto-antoi hamu parsoalan ni halak na asing. Marsijalahi ngoluna ma hamu mamake tanganna be, songon na dung hami dok na salpu i tu hamu.

JAKOBUS 4:6

Haru songon i pe, gumogo dope asi ni roha ni Debata na nilehenNa i di hita ulang pado hagiot ni rohanta i. Hara ni i do umbaen na laing tarsurat di Buku Na Badia i muse, “Dialo Debata do halak siginjang roha, tapi asi do rohaNia anggo tu halak na toruk roha.”