HABAKUK 2:3 - BIBEL JAMITA NA DENGGAN

³ Suratkon ma i, angke nada saonnari dope hatihana. Tapi manigor ro ma hatihana i, jana musti tarjadi sanga aha na Hudokkon i tu ho. Haru pe laing honok dope idaon, tapi painte sajo ma! Pasti do ro hatiha ni i jana nada dipalambat-lambat.

HABAKUK 2:3 ပူးပေါင်းရင်းမြစ်များ

2 RAJA-RAJA 6:33

Inda jabat sidung dope si Elisa na mandok hata i, ma lalu raja i disi jana didok ma, “Tuhan do mambaen hasusaan on tu hita! Jadi aha dope he gunana arop rohangku di pangurupiNia?”

MASMUR 102:13

Giot jongjong do Ho jana manghaholongi Sion, madung dapot hatihana maribo roha Ho tusia.

MASMUR 27:14

Mararop roha tu Tuhan ma da, haporsayai ma, ulang padele roha. Tu Tuhan ma mararop roha.

HARURUAR 12:41

Di ari parpudi di taon pa 430 hon i, sude ma bangso ni Debata maninggalkon tano Mesir.

JESAYA 30:18

Haru pe songon i, laing dipainte Tuhan dope hatihana laho patuduhon tu hamu ibo ni rohaNia. Rade do Ia laho maribo ni roha tu hamu, angke Tuhan i do Debata na tigor. Martua do na marpos ni roha tuSia.

JESAYA 7:4

Dokkon ma tusia: Patogu ma rohamu jana pasonang, ulang ma mabiar sanga puntol rohamu, hara ni surpu ni api na dua i, i ma hamumuruk ni si Resin dohot Aram dohot anak ni si Remalya.

JESAYA 8:17

Madung ditabunihon Tuhan diriNa maradopkon bangsoNia, tapi anggo au porsaya jana mararop roha do tuSia.

JEREMIA 27:7

Mangoloi tusia do sandok bangso, tu anaknia dohot tu pahompunia lopus dapot hatihana madabu bangsonia i. Anggo di hatiha i mangoloi ma bangso Babel tu angka bangso na gogo dohot tu angka raja na godang.

JEHESKIEL 12:25

Au Tuhan Debata, Au sandiri noma manghobari tu bangso Israel jana sude na Hudokkon musti angkon tarjadi, nada pola marlambat-lambat be. Tangihon hamu ma, ale angka pangalo! Taran di ngolumunu on dope, dalankononKu ma sandok na dung Hupaboa hian tu hamu. Au Tuhan Debata madung mandok songon i.”

JEHESKIEL 30:9

“Muda dung dapot ari i, jana madung maronco Mesir, tongosonku ma angka utusan marhite angka kapal laho manyonggot halak Etiopia na topet lalap i, jadi gabe bajoaraon ma halahi. Ligi da, tutu do angkon ro ari i!”

DANIEL 10:14

Ro do au laho mambaen ho mangastui sanga aha na giot tarjadi sanoli on di bangsomu. Taringot tu hatiha na giot ro do parnidaan on.”

DANIEL 11:27

Dung i rap juguk ma raja na dua i sameja jana rap mangan, tapi marroha na jahat do halahi na dua, jana marsigabusan ma halahi. Tapi sundat do sangkap ni halahi i dibaen nada dapot dope hatihana.

DANIEL 11:35

Hona bunu ma deba angka pamimpin na marbisuk i, tapi akibatna songon on ma: gabe mur polin ma angka jolma i. Songon i ma torus lalu tu hatiha na parpudi, i ma hatiha na dung ditontuhon Debata.

DANIEL 8:17

Jadi ro ma ia tu inganan hajongjonganki, jana dompak ro ia tarsonggot ma au jana manungkap, dung i didok ia ma tu au, “Antusi ma, o anak ni jolma taringot tu ari parpudi do parnidaan on!”

DANIEL 8:19

“Paboaonku ma tu ho sanga aha na giot tarjadi muse hara ni hamumuruk ni Debata. Angke tudu-tudu tu hatiha na parpudi do parnidaanmi.

DANIEL 9:24

Pitu noli pitu pulu taon, i ma hatiha na ditontuhon ni Debata laho paluahon bangsomu dohot kotamu na badia i sian dosa dohot hajahatan. Ampunan noma sude jana pahoton hatigoran na manongtong, lopus gabe tulus tarjadi parnidaan i, jana Bagas Ni Tuhan na badia i pasahaton ma mangulahi tu Tuhan i.

MIKA 7:7

Tapi anggo au marpos ni roha tu Tuhan do; mardongan pos ni roha na godang hupainte Debatangku. Ditangihon Ia tangiangku jana dipalua Ia do au.

ZEPANYA 3:8

Hara ni i painte ma Au – ninna Tuhan – di ari harorongKu jadi saksi. Harana haputusanKu i ma papunguhon angka bangso dohot harajaan anso Huusehon rimasKu na marapi purun, harana sude tano angkon abis dibaen api ni pangiburuonKu.

BILANGAN 23:19

Nada dos Debata dohot jolma na ringgas margabus, na momo muba pikiranna. Muda dung Dijanjihon Debata, sudena pasti Dipatulussa! Muda Ia mangkuling, sude angkon tarjadi!

LUKAS 2:25

Jadi di hatiha i adong ma sahalak di Jerusalem na margoar si Simeon. Halak na burju do ia, na mabiar tu Debata jana na sai paintehon hatihana paluaon ni Debata halak Israel. Didongani Tondi Parbadia do ia.

BAENON NI ANGKA RASUL 1:7

Dialusi Jesus ma, “Damang do na umboto taringot tu ari dohot hatiha ni i. Nada porlu botoonmunu i, angke kuaso ni Damang do i.

BAENON NI ANGKA RASUL 17:26

Sian sada jolma dibaen Ia ma sude bangso jana disuru Ia halahi mangingani tano on sudena. Laing marguru diSia do sian mulana laho manontuhon sanga andigan hatihana jana olat ni dia batasna halahi tola mangolu.

GALATIA 4:2

Tapi adong do halak na manjago i dohot na mangurus sude haporluannia lopus dapot hatiha na nitontuhon ni amangnia i.

2 PETRUS 2:3

Hara ni na ahut tu dirina, caritohonon ni angka guru pargabus i ma tu hamu angka carito na nibaen ni halahi sandiri anso dapotan untung halahi sian hamu. Tapi anggo panguhuman laho manguhum halahi madung tibu dipasingkop jana hamagoan na dung ditontuhon pe tu halahi madung paintehon tu halahi.

2 PETRUS 3:9

Nada tarlambat Debata mangalehen sanga aha na nijanjihonNia songon na nipikiran ni deba halak. Tapi sobar do Ia paadop-adop hamu, angke sahalak pe nada dihagioti Ia mago. GiotNia ulang so muba nian sude roha ni jolma sian angka dosana be.