ESTER 6:1 - BIBEL JAMITA NA DENGGAN

¹ Laing di borngin i nada tarpodom raja i. Jadi hara ni i, dipangido ia ma anso dibuat catatan Sejarah Ni Harajaan i jana disuru ia ma halak manyisesa.

ESTER 6:1 ပူးပေါင်းရင်းမြစ်များ

PAMUNGKAAN 22:14

Dibaen si Abraham ma goar ni inganan i, “Tuhan do paradehon”. Jana lopus saonnari laing didokkon halak do, “Tuhan do paradehon di dolokNia”.

ESTER 10:2

Sude pambaenannia na godang jana na jebu i songon i muse barita salaho tu pangangkatnia di si Mordehai gabe pagawe tinggi sudena, tarsurat do i di bagasan Buku Sejarah Ni Angka Raja-raja ni Persia dohot Media.

ESTER 2:21

Sanoli dompak na martugas si Mordehai di bagas godang, martahi na jat ma dua halak pangoloi ni raja i, i ma si Bigtan dohot si Teres giot mamunu Raja Ahasweros, dibaen santakna goyak ni roha ni halahi di raja i.

ESTER 2:22

Tarboto si Mordehai ma sangkap i jana manigor dipaboa ia ma i tu si Ester. Nada be marlambat-lambat, dicaritohon si Ester ma tu raja i sanga aha na niboto ni si Mordehai i.

ESTER 2:23

Disihiri ma parkaro i, gabe torang ma antong na tutu lapuran i. Diuhum gantung ma sidua halak i. Hombar tu parenta ni raja i, disuratkon ma na masa i di bagasan Buku Sejarah Ni Harajaan i.

ESTER 5:8

“Muda lomo do roha ni raja i mangoloi pangidoanku, sugari laing ro ma nian raja i dohot si Haman mangulahi tu parjamuan sibaenonku ancogot borngin. Di parjamuan i ma hupasahat pangidoanku tu raja i.”

JESAYA 41:17

Muda manguas bangsongKu na lebak i, manjalahi aek harana hiang aru-aruna i, Au Tuhan, alusanKu do tangiang ni halahi; nada tadingkonon ni Debata ni Israel bangsoNa i.

DANIEL 2:1

Sanoli di sada borngin, dung dua taon mamarenta Raja Nebukadnesar, marnipi ma ia. Marsak ma rohania dibaen nipinia i, lopus nada tarpodom be ia.

DANIEL 6:18

Dung i ditutupkon ma sada batu na godang tu baba ni liang i jana dicap raja i ma batu i dohot cap ni harajaan dohot cap ni angka parpangkat gabe nada tarbaen sanga ise be paluahon si Daniel sian singa i.

MALEAKI 3:16

Jadi marsipandohonan ma angka halak na manghabiari Tuhan i na sada tu donganna. Dibege jana diparrohahon Tuhan do sanga aha na nihataan ni halahi i. Disuratkon do angka goar-goar ni na pasangapkon Tuhan dohot na mabiar mida Ia, di bagasan sada buku panyuratan na adong di joloNia.

SURAT NI SI PAULUS TU PARLAGUTAN ROM 11:33

Bagasna i antong hamoraon, habisuhon dohot parbinotoan ni Debata! Na so tardodo do angka haputusanNia, jana nada tarastui angka dalanNia.