ESTER 3:12 - BIBEL JAMITA NA DENGGAN

^12-13 Jadi di tanggal tolu bolas bulan sada, dipiohon si Haman ma angka sekretaris ni raja i. Disuru ia ma halahi mambaen surat domu tu sude na niparentahonnia, dung i diterjemahkon ma surat i tu sude hata jana disalin tu sude surat na dipake di harajaan i. Markite-hite goar ni Raja Ahasweros do surat i dibaen jana dicap dohot tintinnia i lalu ditongoskon ma tibu tu angka na markuaso, gubernur dohot na sangap di sude propinsi. Anggo isina, i ma parenta na mandok angkon bunuon nada adong ampunna sude bangso Jahudi, na poso bope na matobang, bope dadaboru sanga na dakdanak jana sinadonganna i dirampas, i ma di tanggal tolu bolas bulan Adar.

ESTER 3:12 ပူးပေါင်းရင်းမြစ်များ

1 RAJA-RAJA 21:8

Dung i dibaen si Isebel ma surat, na nitanda tanganan dohot na nisegel ni si Ahab. Ditongoskon ia ma surat i tu angka pamimpin dohot angka pangituai ni rayat na di Jisreel.

ESRA 8:36

Dipasahat halahi muse ma dokumen na nilehen ni raja i tu halahi, tu gubernur dohot angka na manjabat di propinsi Efrat Hasundutan. Jadi gabe dilehen angka na marjabatan i bantuan tu bangso i anso laing tarbaen halahi tongtong maribadat di Bagas Ni Tuhan.

ESTER 1:22

Ditongoskon ia ma parenta tu sude luat ni harajaan i di hata dohot surat ni ganop luat i. Hata ni parenta i mandok angkon halaklahi do na pamimpin di bagasannia, jana mangkuling mangihutkon hata ni bangsona.

ESTER 3:11

Didok raja i ma tusia, “Hupasahat ma tu ho bangso i dohot hepengna i. Pambaeni ma sanga na aha giotmu tu halahi.”

ESTER 8:2

Ditalduskon raja i ma tintinnia na nibuatnia mangulahi sian si Haman jana dilehen ia ma i tu si Mordehai. Jana diangkat si Ester ma si Mordehai gabe na markuaso di arta ni si Haman.

ESTER 9:27

i ma dalanna gabe dibaen halahi sada paraturan di halahi sandiri, di pomparan ni halahi dohot di sude halak na giot gabe anggota ni bangso Jahudi. Mangihutkon paraturan i, ganop taon angkon rayahonon ni halahi do sudena ari na nitontuhon ni si Mordehai i.

DANIEL 3:10

Madung didabu raja i sandiri parenta na mandok, disi dipalu angka sarune, angkon manungkap ma sude jolma na marsomba tu patung sere i,

DANIEL 6:12

Marroan ma angka musu ni si Daniel di na niida ni halahi ia taran martangiang tu Debatania.

DANIEL 6:15

Umbege i marsak jana ganggu ma raja i, gabe dijalahi ia ma dalan laho paluahon si Daniel. Lopus tu andospotangna i laing marpikir-pikir dope raja i.

DANIEL 6:25

Dung i diparentahon raja i ma anso ditangkup angka na mangaduhon si Daniel i. Jadi rap diambungkon ma halahi dohot angka dakdanak dohot angka dadaboruna tu bagasan liang ni singa i. Nada jabat lalu dope halahi tu tandolan ni liang i, manigor disoro angka singa i ma halahi jana diropuk holi-holina i.

DANIEL 6:8

Hami sude na angka gubernur, angka wakil ni gubernur dohot angka na maniop jabatan na asing, madung martahi hami laho mangusulkon anso diparuar raja i surat parenta na mandok angkon oloan sian situtu ni roha. Diparentahon raja i ma nian sugari, anso di bagasan tolu pulu ari sada halak pe nada tola palalu pangidoan tu sada sian angka debata sanga tu jolma, asing ni na tu raja i sandiri. Sanga ise na mangalanggar parenta i ambungkonon ma tu bagasan liang ni singa.