ESTER 1:3 - BIBEL JAMITA NA DENGGAN

³ Di taon patoluhon mamarenta Raja Ahasweros, dibaen ma horja godang di sude na marpangkat dohot pagawenia. Ro do tu horja i tentara ni Persia dohot tentara ni Media, songon i muse angka gubernur maradu na mora-mora na sian propinsi.

ESTER 1:3 ပူးပေါင်းရင်းမြစ်များ

PAMUNGKAAN 40:20

Jadi di na marulang tahun raja i, i ma tolu ari dung i, mambaen pesta godang ma raja i di sude pagawenia; diparuar ia ma pangurus ni siinumon dohot pangurus ni rotinia i sian hurungan jana dioban ia halahi tu jolo ni sude pagawenia i.

1 RAJA-RAJA 3:15

Dung ngot, diboto si Salomo ma, hape Debata do na mangkatai dohot ia di bagasan nipi. Dung i kehe ma ia tu Jerusalem jongjong di jolo ni Poti Parjanjian ni Tuhan laho manghaulkon haul situtungon dohot haul haluaan. Dung salpu i dibaen ia ma pesta di sude pagawenia i.

ESRA 1:2

“On ma parenta ni si Kores, raja ni Persia. Madung dibaen Tuhan, Debata Na Markuaso di banua ginjang au gabe raja di sandok portibi on, jana ditugaskon do au laho mambangun sada bagas diSia di Jerusalem na di tano Juda.

ESTER 1:14

Anggo angka panuturi na jumotjot dipio raja i, i ma: Si Karsena, si Setar, si Admata, si Tarsis, si Meres, si Marsena dohot si Memukan. Halahi ma angka na sumurung sian Persia dohot Media na manjagit pangkat na gincat di harajaan i.

ESTER 1:4

Onom bulan honokna raja i patidahon sinadongan ni bagas godangnia i dohot hajagaron maradu hagodangan ni harajaannia i.

ESTER 2:18

Dung i dibaen raja i ma horja godang songon na pasangapkon si Ester jana diontang raja i ma sude pagawe dohot angka na sangapna. Dipabotohon ia ma ari paradianan di sandok harajaan i jana dibagi-bagihon ia ma silua marlobi-lobi.

ESTER 3:7

Di taon padua bolaskon mamarenta Raja Ahasweros di bulan sada, i ma bulan Nisan, disuru si Haman ma mambaen undi na margoar “purim” laho mamboto sanga ari dohot bulan dia na tumbuk laho palaluhon nietnia na jahat i. Jadi gabe ditontuhon ma tanggal tolu bolas bulan dua bolas, i ma bulan Adar.

JESAYA 21:2

Madung dipatuduhon tu au taringot tu na jorbut na giot masa, halumbaan taringot tu hajahatan dohot hasesegona. Maju ma hamu parangan ni Elam, roro ma! O hamu parangan ni Madai, hobuk hamu ma angka kota i! Na giot paujungonKu noma sude pardangolan na nibaenan ni Babel.

JEREMIA 51:11

Madung dijajang Tuhan angka raja na sian Media, hara ni na giot roncohononNia Babel. Songon i ma dalanna dibaen Ia laho mamalos parbuatan ni angka jolma na mangaroncohon bagasNia i. Didok komandan ni parangan parporang i ma, “Patajom be anak ni pana! Parade parince!

DANIEL 5:1

Sanoli diontang Raja Belsasar ma saribu halak angka na godang-godang anso ro mandohoti pestania na marlobi-lobi, dohot na minum-minum anggur.

DANIEL 5:28

Peres; astuanna; madung dibagi harajaan ni raja i jana dipasahat tu halak Media dohot Persia.”

DANIEL 6:1

Dung hona bunu si Belsasar, dirampas si Darius halak Media ma habangsa ni harajaan i. Marumur onom pulu dua taon ma ia di hatiha i.

DANIEL 8:20

Biri-biri jantan na niidami, na martanduk dua, i ma manggambarkon harajaan Media dohot Persia.

MARKUS 6:21

Ujungna dapot si Herodias ma ari na tumbuk, i ma di ari parningotan hatutubu ni si Herodes. Dibaen raja i ma pesta di angka kapala ni parpangkat na di harajaan i dohot angka komandan dohot di angka harajaon, hatobangon ni halak na di Galilea.