ESRA 8:1 - BIBEL JAMITA NA DENGGAN

¹ On ma daftar ni angka kapala ni horong na dung dibuang tu Babel jana mulak rap dohot au tu Jerusalem di na mamarenta si Artahsasta gabe raja:

ESRA 8:1 ပူးပေါင်းရင်းမြစ်များ

1 JUJUR TAON 24:31

Laho manontuhon geleran ni halahi martugas, ganop kapala ripe rap dohot sada halak angginia, kehe ma manarik undian songon na nibaen ni kahanggi ni halahi, i ma angka malim pomparan ni si Harun. Di jolo ni Raja Daud rap dohot si Zadok, si Ahimelek dohot sude angka kapala ripe sian golongan ni malim-malim dohot sude golongan ni halak Levi, disi do ditarik undian i.

1 JUJUR TAON 26:32

Sandok urusan ugamo dohot urusan pamarenta di Israel Habincaran ni Batang aek Jordan – i ma Luat Ruben, Gad dohot Manase Habincaran – dipasahat ma i tu dua ribu pitu ratus kapala ripe sian horong ni si Jeria, angka halak na godang do sudena i na nipili ni Raja Daud.

1 JUJUR TAON 4:33

dohot di angka huta na humaliang inganan i lopus tu kota Baal di sabola Barat Daya. Songon i ma catatan na adong taringot tu pomparan ni si Simeon domu tu tarombo dohot angka inganan ni halahi.

1 JUJUR TAON 9:1

Tarsurat do sude halak Israel mangihutkon horongna be. Tarsurat do i di bagasan Buku Raja-raja Ni Israel. Dioban do rayat ni Israel tu habuangan laho manguhumi halahi hara ni dosana.

1 JUJUR TAON 9:34

Angka halak na nidok di ginjang i ma kapala ripe ni Marga Levi hombar tu horong-horong ni halahi. Maringanan di Jerusalem do halahi.

2 JUJUR TAON 26:12

Pungu ma sude tentara i 307.500 halak parajurit na bolas marporang di raja i, 2.600 halak ma komandan na mamimpin halahi.

ESRA 1:5

Dung i markobas mulak ma angka kapala ripe na sian Marga Juda dohot Benyamin, angka malim dohot angka halak Levi maradu sude halak na nigorakkon ni Debata rohana dohot laho mambangun Bagas Ni Tuhan mangulahi.

ESRA 2:2

Angka na mamimpin halahi, i ma si Zerubabel, si Jesua, si Nehemia, si Seraya, si Reelaya, si Mordehai, si Bilsan, si Mispar, si Bigwai, si Rehum, dohot si Baana. On ma daftar ni Israel marsasaompu, dohot bahat ni halakna sian ganop horong na mulak sian habuangan:

ESRA 2:3

Horong Paros – 2.172 Sefaca – 372 Arah – 775 Pahatmoab (pomparan ni si Josua dohot si Joab) – 2.812 Elam – 1.254 Zatu – 945 Zakai – 760 Bani – 642 Bebai – 623 Asgad – 1.222 Adonikam – 666 Bigwai – 2.056 Adin – 454 Ater (digoari muse si Hiskia) – 98 Besai – 323 Jora – 112 Hasum – 223 Gibar – 95

ESRA 7:13

Au mamarentahon, diisinkon kehe rap dohot ho sude malim, halak Levi dohot halak Israel na asing di sude harajaanku na marpor ni roha giot mulak tu Jerusalem.

ESRA 7:28

Marhite pangurupi ni Debata gabe jop roha ni raja i, angka panuturina dohot parpangkat na markuaso disi mida au. Madung dilehen Tuhan Debatangku semangat tu au, jadi gabe marhasil au marpio bahat kapala ni horong ni Israel anso mulak tu Jerusalem. ”

ESRA 7:6

Halak na marsikola do si Esra jana bahat do na binotonia salaho tu Uhum na nilehen ni Tuhan, Debata ni Israel tu si Musa. Dibaen dipasupasu Tuhan Debata do si Esra, gabe dilehen raja ma disia sandok na nipangidonia. Di taon papituhon mamarenta Raja Artahsasta, marangkat ma si Esra sian Babel manuju Jerusalem rap dohot sarombongan halak Israel, i ma angka malim, halak Levi, angka parende maradu panjago horbangan ni Bagas Ni Tuhan, dohot angka parkarejo.

ESRA 8:2

Si Gersom sian horong Pinehas Si Daniel sian horong Itamar Si Hatus anak ni si Sekanya sian horong Daud Si Zakaria, sian horong Paros rap dohot 150 halaklahi sian horongnia (adong do suratna taringot tu tarombo ni halahi). Si Elyuenai anak ni si Zerahya, sian horong Pahamoab, rap dohot 200 halak halaklahi. Si Sekanya anak ni si Jahasiel, sian horong Zatu, rap dohot 300 halak halaklahi. Si Ebed anak ni si Jonatan, sian horong Adin rap dohot 50 halak halaklahi. Si Jesaya anak ni si Atalya, sian horong Elam, rap dohot 70 halak halaklahi. Si Zebaya anak ni si Mikael sian horong Sefaca, rap dohot 80 halak halaklahi. Si Obaja anak ni si Jehiel, sian horong Joab, rap dohot 218 halak halaklahi. Si Selomit anak ni si Josifya, sian horong Bani, rap dohot 160 halak halaklahi. Si Zakaria anak ni si Bebai, sian horong Bebai, rap dohot 28 halak halaklahi. Si Johanan anak ni si Hakatan, sian horong Asgad, rap dohot 110 halak halaklahi. Si Elifelet, si Jehiel, dohot si Semaya, sian horong Adonikam, rap dohot 60 halak halaklahi (umpudi do halahi ro). Si Utai dohot si Zakur, sian horong Bigwai, rap dohot 70 halak halaklahi.