ESRA 7:6 - BIBEL JAMITA NA DENGGAN

^6-7 Halak na marsikola do si Esra jana bahat do na binotonia salaho tu Uhum na nilehen ni Tuhan, Debata ni Israel tu si Musa. Dibaen dipasupasu Tuhan Debata do si Esra, gabe dilehen raja ma disia sandok na nipangidonia. Di taon papituhon mamarenta Raja Artahsasta, marangkat ma si Esra sian Babel manuju Jerusalem rap dohot sarombongan halak Israel, i ma angka malim, halak Levi, angka parende maradu panjago horbangan ni Bagas Ni Tuhan, dohot angka parkarejo.

ESRA 7:6 ပူးပေါင်းရင်းမြစ်များ

PAMUNGKAAN 32:28

Didok bayo i, “Nada si Jakob be goarmu. Madung marsiranggut ho mangalo Debata dohot mangalo jolma jana monang do ho; antong si Israel noma goarmu.”

ESRA 5:5

Tapi diparrohahon Debata do angka pamimpin ni Jahudi i jana dijagahon Ia, jadi gabe diputuskon angka pejabat ni Persia i ma anso ulang mambaen tindakan painte so jolo manongos surat halahi tu si Darius jana manjagit balosanna.

ESRA 6:22

Pitu ari lolotna halahi marjop ni roha mamestahon Pesta Ni Roti Na So Marragi i. I noma jop ni roha ni halahi hara ni na nibaen ni Tuhan marburju ni roha raja ni Asur tu halahi gabe diurupi halahi di bagasan karejo na mambangun mangulahi Bagas Ni Tuhan, Debata ni Israel i.

ESRA 7:21

Huparentahon do tu sude pangurus ni kas ni harajaan na di propinsi Efrat Hasundutan anso dilehen tusia manigor sanga aha pe na nipangido ni Malim Esra, Malim Ni Debata na markuaso di banua ginjang i,

ESRA 7:28

Marhite pangurupi ni Debata gabe jop roha ni raja i, angka panuturina dohot parpangkat na markuaso disi mida au. Madung dilehen Tuhan Debatangku semangat tu au, jadi gabe marhasil au marpio bahat kapala ni horong ni Israel anso mulak tu Jerusalem. ”

ESRA 7:5

Abisua Pinehas Eleasar Malim Godang Harun

ESRA 8:1

On ma daftar ni angka kapala ni horong na dung dibuang tu Babel jana mulak rap dohot au tu Jerusalem di na mamarenta si Artahsasta gabe raja:

ESRA 8:18

Hara ni denggan ni roha ni Debata, disuruhon halahi ma tu hami si Serebia, sada halak Levi na pistar na sian horong Mahli. Laing ro do rap dohot ia angka dakdanak dohot angka kahangginia salapan bolas halak bahatna.

ESRA 8:22

Maila do au laho mangido tentara na markudo tu raja i, laho manjagohon hami nian maradopkon musu di pardalanan i. Harana madung hudok tusia, bahaso na sai dipasupasu Debatanami do ganop halak na porsaya diSia jana dihasogohon bope diuhum Ia do ganop halak na so setia tuSia.

ESRA 8:31

Di tanggal dua bolas bulan parjolo, hami tadingkon ma Batang aek Ahawa jana kehe ma hami tu Jerusalem. Di bagasan pardalanan i dijagohon Debata do hami sian serangan dohot pangambat ni musu.

NEHEMIA 12:26

Di hatiha ni si Joyakim anak ni si Jesua jana pahompu ni si Josadak dohot di hatiha ni Gubernur Nehemia dohot Malim Esra Ahli Uhum i do halahi mangolu.

NEHEMIA 12:36

Mardalan ma di pudinia angka na sian horongnia, i ma; si Semaya, si Asareel, si Milalai, si Gilalai, si Maai, si Netaneel, si Juda dohot si Hanani. Maroban alat-alat musik do halahi sude, sarupa tu na nipake ni Raja Daud, naposo ni Debata i. Malim Esra Ahli Uhum Ni Debata i ma mardalan di jolo ni barisan i.

NEHEMIA 2:12

Salolot na tolu ari i nada hupaboa sanga na tu ise pe bahaso na nilehen ni Debata boa-boa tu au laho mambangun kota Jerusalem mangulahi. Borngin-borngin ancogotna i ngot ma au jana hupiohon ma angka dongan sanga na piga halak kehe tu ruar ni kota. Asing sian halode na hutengget i, nada adong hami oban pahan-pahanan sitenggeton na asing.

NEHEMIA 2:18

Lalu hucaritohon ma tu halahi sanga na bia dibaen Debata mangurupi au dohot na nidok ni raja i tu au. Dialusi halahi ma, “Tole ma da tapungka mambangun!” Lalu marhobas-hobas ma halahi laho mangkarejohon.

NEHEMIA 2:8

Tamba ni i, laing hupangido dope surat tu si Asap panjago ni harangan harajaan, anso dipasingkop ia hayu sibaenon tu pintu horbangan ni benteng na manjagohon Bagas Ni Tuhan, dohot sipakeon di tembok ni kota dohot bagas na giot ingananku. Dioloi raja i do sude pangidoanki, dibaen ditolong Debata do au.

NEHEMIA 4:15

Tarbege ma tu angka musunami bahaso na dung habotoan tu hami sangkap ni halahi i. Jadi gabe sadar ma halahi bahaso na dung disundati Debata sangkap ni halahi. Dung i karejo ma hami sude mangulahi padenggankon tembok i.

NEHEMIA 8:1

Di bulan pitu madung hot halak Israel maringanan di kotana be. Di tanggal sada bulan i marlagut ma halahi sude di Jerusalem, di alaman parjolo ni Pintu Horbangan Aek. Dipangido halahi ma anso dibuat Malim Esra Buku Uhum. Si Esra, i ma sada halak na ahli salaho tu Uhum na nilehen ni Tuhan tu Israel marhite si Musa.

NEHEMIA 8:13

Ancogotna i marlagut ma angka kapala ni horong, angka malim dohot angka halak Levi, lalu kehe ma halahi mandapotkon si Esra laho marsiajar salaho tu angka pangajaran ni Uhum i.

NEHEMIA 8:4

Jongjong ma si Esra di podium hayu na dibaen sipakeon di parlagutan i. Di siamunnia jongjong ma angka si Matica, si Sema, si Anaya, si Uria, si Hilkia dohot si Maaseya; jana di siambirangnia jongjong ma si Pedaya, si Misael, si Malkia, si Hasum, si Hasbadana, si Zakaria dohot si Mesulam.

NEHEMIA 8:9

Umbege Uhum na disise i, gok ma roha ni rayat i lalu martangisan halahi. Jadi gabe didok Gubernur Nehemia ma dohot Malim Esra Ahli Uhum i, maradu angka halak Levi na patorangkon Uhum i tu sude rayat i songon on, “Ari hapunjungan do ari sadari on di Tuhan Debatamu, jadi ulang hamu marsak sanga tangis.

NEHEMIA 9:13

Mijur Ho sian langit di Dolok Sinai na badia, lalu mangkobari Ho dohot bangsoMu sandiri. Dilehen Ho uhum, aturan dohot sipaingot na tigor, na denggan dohot na bonar boti marguna.

MASMUR 109:27

Jadi gabe botoon ni musungku ma, Ho do na paluahon au.

MASMUR 147:19

Dipabolkas Ia tonaNia tu bangsoNia, hatontuan dohot angka parenta tu bangso na nipiliNia.

MASMUR 45:1

Dituturi angka hata na denggan do au; hupatomu-tomu do ende on di raja. Tarsongon pulpen panggurit ni sada panyurat na somal marhata madung singkop dilangku pajojor umpama.

MASMUR 80:18

Gabe nada manyimbil be hami sian Ho, jagohon ma ngolunami, gabe pujionnami noma Ho.

PODA 3:6

Ingot ma Tuhan di bagasan sude na nikarejohonmu, anso dipatuduhon Ia tu ho dalan parngoluon na sintong.

JESAYA 50:2

Biasi nada adong na ro umpe sahalak sian bangsongKi, di na ro Au marpio halahi? Adong he na so sanggup Au dietong roha ni halahi paluahonsa umbaen na sip sajo halahi? Nada he sumurut aek ni laut hara ni parentangKu, Hupauba batang aek gabe padang manyahatang, gabe mate ihan sudena?

JESAYA 59:1

Satutuna, nada na hurang ginjang tangan ni Tuhan laho paluahon, jana parbinegeanNia nada na hurang tajom mambege.

JEREMIA 8:8

Puluk do hamu antong mandok na malo hamu, jana na pistar salaho tu angka tona! Cubo hamu ma jolo mangaligi angka tona na Hulehen i madung dipauba angka panyurat na so tigor!

MATEUS 13:52

Dung i ninna Jesus ma, “Hara ni i ma, sude Siboto Surat na dung mangguruhon Harajaan Ni Banua Ginjang i, gabe tarsongon sada halak tuan di sada bagas do i, na paruarkon sian panyimpananna sude barang-barangnia sigodang arga, na imbaru dohot na dung honok.”

MATEUS 23:2

“Juguk do angka Siboto Surat dohot halak Parise, di juguhan ni si Musa.

MATEUS 28:20

Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on.”

1 KORINTUS 1:20

Di dia dehe angka na bisuk i? Di dia dehe angka Siboto Surat i? Di dia dehe angka pangalo na sian portibi on? Nada he madung dibaen Debata habisuhon ni portibi on gabe hatoon?

1 KORINTUS 15:1

Hamu ale angka dongan! Saonnari giotku, ingot hamu ma mangulahi Jamita Na Denggan na sian Debata na hujamitahon i najolo tu hamu. Madung dijagit hamu i, jana marojahan tu Jamita Na Denggan i do haporsayaanmunu.

PANGARATAION 28:1

“Muda dioloi ho Tuhan Debatamu, jana dihaburjuhon ho patuluskon sude parenta na hulehen tu ho di ari sadari on, jadi baenon ni Tuhan ma ho gabe bangso na gumodang sian sude bangso na asing di portibi on.

PANGARATAION 4:5

Madung huajarkon sude angka aturan i tu hamu, songon na niparentahon ni Tuhan Debata tu au. Karejohon hamu ma sudena i di tano na giot simasuhan dohot siingananmunu.