ESRA 3:1 - BIBEL JAMITA NA DENGGAN

¹ Di bulan pitu, madung hot angka halak Israel i maringanan di angka kotana be. Di tanggal sada laing di bulan i, marlagut ma halahi di Jerusalem,

ESRA 3:1 ပူးပေါင်းရင်းမြစ်များ

NEHEMIA 7:73

Hot ma maringanan di angka kota dohot angka huta na di Juda, i ma angka malim, angka halak Levi, angka panjago horbangan ni Bagas Ni Tuhan, angka parende, sian angka rayat na somal, angka parkarejo di Bagas Ni Tuhan.

NEHEMIA 8:1

Di bulan pitu madung hot halak Israel maringanan di kotana be. Di tanggal sada bulan i marlagut ma halahi sude di Jerusalem, di alaman parjolo ni Pintu Horbangan Aek. Dipangido halahi ma anso dibuat Malim Esra Buku Uhum. Si Esra, i ma sada halak na ahli salaho tu Uhum na nilehen ni Tuhan tu Israel marhite si Musa.

NEHEMIA 8:14

Dapot halahi ma bahaso na adong do di bagasan Uhum na nilehen ni Tuhan i tu si Musa, na disuru ni Tuhan halak Israel maringanan di bagasan undung-undung darurat salolot Pesta Undung-undung Bulung Rata.

HAMALIMON 16:29

“Angka aturan on pe angkon patuluson tu zaman na giot ro sapanjangna. Di ari sampulu bulan pitu, sude halak Israel dohot angka halak na leban na rap dohot halahi, angkon marpuaso do jana nada tola mangkarejohon sanga aha pe, angke ari na sun badia do ari i. Di ari i angkon baenon do pesta paiaskon bangso Israel sian sude dosa ni halahi, anso ias halahi mangihutkon aturan ni ugamo.

ZEPANYA 3:9

Tapi dung salpu i paubaonKu ma roha ni angka bangso-bangso i gabe martangiang tu Au sajo noma halahi, jana nada be tu angka debata na asing. Oloan ni angka bangso i noma Au.

BAENON NI ANGKA RASUL 2:46

Ganop ari marlagut do halahi di Bagas Ni Debata; marmoga-moga jana martoruk ni roha, rap mamonggoli roti halahi di angka bagas ni halahi. Jana rap mangan ma halahi di bagasan jop ni roha dohot toruk ni roha;

BAENON NI ANGKA RASUL 4:32

Sudena halahi na dung porsaya i, saroha jana satondi do ngolu ni halahi. Nada adong sian halahi na mangetong sinadonganna gabe nampunania sandiri. Sudena na adong di halahi, rap mamake do halahi.

1 KORINTUS 1:10

Hamu ale angka dongan! Mangasahon goar ni Tuhanta Jesus Kristus hupangido anso saroha hamu sudena di sude pangkataionmunu, anso ulang masa parbolat-bolatan di hamu. Angkon laing sada do hamu di pikiran dohot di angka haputusanmunu.

PANGARATAION 16:16

Angkon ro do sude halaklahi ni Israel manyomba Tuhan di inganan paribadatan na sada i tolu noli sataon: Di Ari Pesta Paskah, Pesta Gotilon dohot di Pesta Undung-undung Bulung Rata. Angkon ganop be marsioban haulna,

HAKIM-HAKIM 20:1

Jadi marroan ma sude halak Israel sian Dan di Utara lopus tu Berseba di Selatan, dohot sian Gilead di Habincaran laho mangoloi pio-pio i. Marlagut ma halahi jana marsada di Mispa di adopan ni Tuhan.