EPESUS 5:2 - BIBEL JAMITA NA DENGGAN

² Angkon mardai holong ni roha ma nian ngolumunu, laing songon pangkaholongi ni Kristus di hita. Dihaulkon Ia do diriNia hara ni hita, gabe songon silehen-lehen dohot haul na huskus na pasonangkon roha ni Debata.

EPESUS 5:2 ပူးပေါင်းရင်းမြစ်များ

PAMUNGKAAN 8:21

Moga ma Tuhan dibaen uap na huskus sian haul somba-somba i, jana didok Tuhan ma di bagasan rohaNia, “Nanggo buraanKu be portibi on hara ni pangalaho ni jolma; Huboto, sian haposoon ni jolma i do jahat pikiranna. Nada uhumanKu be sude jolma na mangolu, songon na baru Hubaen i.

HARURUAR 29:18

Tutung ma sude biri-biri jantan i di ginjang ni langgatan i gabe haul na nitutung. Uap ni haul on ma na pasonang Au.

HARURUAR 29:25

Jadi buat ma roti i sian halahi lalu tutung ma di ginjang ni langgatan i, di ginjang ni haul situtungon sinangkinan gabe haul panganon di Au. Uap ni haul on ma na pasonang rohangKu.

HAMALIMON 1:13

Dung i basuon ni halahi ma butuha dohot pat pudi ni pahan-pahanan i, jadi sombahonon ni malim i ma haul i tu Tuhan, lalu ditutung sude di ginjang ni langgatan. Uap ni haul sipanganon i ma pajop roha ni Tuhan.

HAMALIMON 1:17

Dung i ditiop ma unggas i di pangkal ni habongna i laho manyuakkon andorana, tapi nada tola torus taldus habongna i. Dung i ditutung ma unggas i dipayakkon tu hayu na gara di ginjang ni langgatan i. Uap ni haul sipanganon i ma pajop roha ni Tuhan.

HAMALIMON 1:9

Angkon basuon ni halahi do butuha dohot pat pudi ni pahan-pahanan i, dung i markarejo ma malim manutung sude haul sipanganon i pajop roha ni Tuhan.

HAMALIMON 3:16

Tutungon ni malim i ma sudena i di ginjang ni langgatan, gabe haul sipanganon na pajop roha ni Tuhan. Sude tabo-tabona i di Tuhan do i.

AMOS 5:21

Didok Tuhan ma, “Goyak do rohangKu jana magigi Au mida angka pesta ni ugamomunu!

MATEUS 20:28

Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak.”

JOHANNES 13:34

Jagit hamu ma tona na imbaru on sian Au: Angkon marsihaholongan do hamu sama hamu. Songon pangkaholongingKu di hamu, laing songon i ma angkon marsihaholongan hamu.

JOHANNES 6:51

Au do roti na mijur sian banua ginjang i, i ma sipanganon na mangalehen hangoluan. Halak na mangankon sipanganon on, mangolu ma salolot-lolotna. Anggo sipanganon na giot lehenonKi, i ma pamatangKu. LehenonKu ma pamatangKon anso mangolu portibi on.”

SURAT NI SI PAULUS TU PARLAGUTAN ROM 15:16

Madung dibaen Ia do au gabe pangoloi ni Kristus Jesus, suruanNia mandapotkon angka bangso na asing. Jana hubaen do au gabe songon malim, manjamitahon Jamita Na Denggan na sian Debata anso gabe haul na tumbuk tu roha ni Debata angka halak na asing i. Sai gabe haul hapunjungan ma di Debata halahi baenon ni Tondi Parbadia.

SURAT NI SI PAULUS TU PARLAGUTAN ROM 4:25

i ma Jesus na dung dipasahat hara ni angka pangalaosionta, jana na nipangolu salaho tu hatigoranta.

SURAT NI SI PAULUS TU PARLAGUTAN ROM 8:3

Sanga aha na so tarpatupa Tona i, hara ni bako ni hajolmaonta na gale, madung dibaen Debata. Madung ditaluhon Debata do kuaso ni dosa na di bagasan bako ni jolma i, i ma markite-hite na marsuru AnakNia sandiri, na ro di bagasan pangalaho na sarupa dohot jolma pardosa, laho manyesa dosa.

SURAT NI SI PAULUS TU PARLAGUTAN ROM 8:37

Tapi di bagasan sasudena i, na monang situtu do hita markite-hite Ia na dung mangkaholongi hita!

1 KORINTUS 16:14

Sude na nibaenmunu, di bagasan holong ni roha ma i baen hamu.

1 KORINTUS 5:7

Jolo ambungkon hamu ma ragi na lolot i, i ma dosa i anso gabe songon adonan ni topung na imbaru boti na ias hamu sian ragi ni dosa na honok i. Harana madung mamungka Ari Pesta Paskah di hita; Kristus na gabe songon biri-biri Paskah di hita, madung dihaulkon.

2 KORINTUS 2:14

Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i.

2 KORINTUS 2:15

Dibaen songon uap na huskus ni Kristus do hami adop Debata di tonga-tonga ni angka na dapotan haluaan, bope di tonga-tonga ni angka na giot kehe tu hamagoan i.

2 KORINTUS 8:9

Angke tangkas do diboto hamu, holong situtu do roha ni Jesus Kristus Tuhanta i maradopkon hita. Na mora do Ia nian, tapi gabe marpogos do Ia hara ni hamu, anso mamora hamu hara ni hapogosonNia i.

GALATIA 1:4

na dung mangalehen diriNa hara ni dosanta, laho paluahon hita sian hajahatan saonnari, mangihutkon hagiot ni Debata Amanta i.

GALATIA 2:20

Anggo na mangolu saonnari on, nada au be i, tapi Kristus noma na mangolu di bagasan diringku. Anggo ngolu ni pamatangkon saonnari, na mangolu sian na mangkaporsayai Anak Ni Debata na manghaholongi au noma i, jana na mangalehen diriNa manghopkop au.

EPESUS 1:4

Dompak so dijadihon dope portibi on, madung ditodo Debata hian hita markite-hite Kristus anso gabe Debata sandiri nampuna hita jana na so martihas di adopanNia. Hara ni holong ni roha ni Debata,

EPESUS 3:17

Hara ni na porsaya i hamu tu Kristus, sai maringanan ma nian Kristus di bagasan rohamunu, jana mur togu ma ngolumunu hara ni holong ni roha na dung marurat di bagasan hamu.

EPESUS 3:19

na so tarastui sabagas-bagasna anggo marsuhat tu pikiran ni jolma. Sai ditanda hamu ma nian holong ni roha ni Kristus i, anso gok hamu dohot hadirion ni Debata na sanggam i.

EPESUS 4:15

Ulang songon i! Tapi angkon pabotohononta do na sintong hara ni holong ni roha, anso mur honok mur tu sanggamna hita di sude pangalaho songon Kristus na gabe Uluanta i.

EPESUS 4:2

Angkon martoruk ni roha do hamunu, lambok jana sobar. Patuduhon hamu ma holong ni rohamunu di na marsiurupan na sada tu na asing.

EPESUS 5:15

Hara ni i, pamanat hamu ma dohot denggan pardalan ni ngolumunu. Ulang songon halak na oto ngolumunu, songon halak na marroha ma hamu.

EPESUS 5:25

Hamu angka halaklahi, haholongi hamu ma dadaborumunu be, laing songon pangkaholongi ni Kristus di parlagutan i jana dilehen Ia do gabe haul diriNia hara ni parlagutan i.

PANGARATAION 27:6

angke angkon sian batu na so unjung dikarejoi dohot na so mabola do baenon sandok langgatan sipajongjongon di Tuhan Debatamunu. Angkon di ginjang ni langgatan i ma hamu manghaulkon angka haul situtungon.

PILIPPI 4:18

Madung hujagit sasudena – dohonon marlobi-lobi dope! Sude silehen-lehen na nitongosmunu i tu au, madung hujagit sian si Epafroditus. Saonnari madung tuk di au sanga aha haporluanku. Songon uap na huskus na sian haul na nihaulkon tu Debata jana na nihalomohon ni roha ni Debata, songon i do angka silehen-lehenmunu i.

KOLOSSE 3:14

Jana na umporlu: Angkon marsihaholongan do hamu sama hamu, angke holong i do na pasadahon hamu sudena gabe sanggam.

1 TESSALONIKA 4:9

Nada pola porlu be suratkononnami tu hamu anggo taringot tu na manghaholongi dongan sahaporsayaan sanga na bia baenonmunu. Hamu sandiri pe madung diajari Debata anso marsihaholongan.

1 TIMOTEUS 2:6

Madung dipasahat Ia diriNia gabe partobus humopkop sudena, anso disaksihon di hatiha na nitontuhon Debata.

1 TIMOTEUS 4:12

Ulang ma padiar sahalak pe marlayas ni roha tu ho hara ni na poso i dope ho. Tapi angkon gabe tiruan na denggan ma ho di angka halak na porsaya, di bagasan pangakataionmu, pangalahomu, holong ni rohamu, haporsayaanmu dohot di haiason ni ngolumu.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

IBRANI 8:3

Sude Malim Godang, niangkat do i laho manghaulkon na nisombahon sanga haul, tu Debata, laing songon i muse do Malim Godangta i; angkon adong do diSia sanga na aha sihaulkononNia.

IBRANI 9:14

mur ma mudar ni Kristus! Markite-hite Tondi na manongtong, dihaulkon Kristus do diriNia sandiri tu Debata gabe haul na sanggam. Dipaias mudarNia i do taroktokta sian angka karejo na so marguna, anso tarbaen hita dohot mangoloi karejo na so marguna, anso tarbaen hita dohot mangoloi Debata na mangolu i.

IBRANI 9:23

Angka songon i ma dalanna paiaskon angka barang na manggambarkon pangalaho na di banua ginjang. Tapi anggo taringot tu angka na di banua ginjang i sandiri porlu dope angka haul na dumenggan sian angka gambaran i.

IBRANI 9:26

Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri.

1 PETRUS 4:8

Tapi na umporlu sian sasudena i, marsihaholongan ma hamu sama hamu, angke muda marsihaholongan hamu gabe bahat ma dosa disesa.

1 JOHANNES 3:16

Anggo hita, sian on do tatanda holong ni rohaNia: Madung dipasahat Kristus ngoluNia humopkop hita! Hara ni i, hita pe angkon pasahatonta do ngolunta manghopkop angka donganta.

1 JOHANNES 3:23

Anggo na niparentahonNia tu hita, on do: Angkon tahaporsayai do AnakNia i, i ma Jesus Kristus; jana angkon marsihaholongan do hita sama hita songon na niparentahon ni Kristus tu hita.

HALUMBAAN 1:5

dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.