EPESUS 3:7 - BIBEL JAMITA NA DENGGAN

⁷ Dilehen Debata do tu au karejo na gabe hapunjunganku, i ma karejo laho manjamitahon Jamita Na Denggan i. Hujagit do karejo i markite-hite kuaso ni Debata, na marsitutu markarejo di bagasan diringku.

EPESUS 3:7 ပူးပေါင်းရင်းမြစ်များ

JESAYA 43:13

“Satorusna Au do tongtong Debata, jana nada adong na bisa paluahon sian tanganKu. Au na mambaenna, ise ma he na bisa manyundati?”

BAENON NI ANGKA RASUL 9:15

Tapi didok Tuhan i ma tu si Ananias, “Kehe ma ho! Harana na dung Hupili do ia mangoloi Au, anso dijamitahon ia taringot tu goarKu tu sude angka bangso na asing dohot tu angka raja, songon i dohot tu halak Israel muse.

SURAT NI SI PAULUS TU PARLAGUTAN ROM 1:5

Markite-hite Ia do hami jagit asi ni roha dohot karejo ni rasul laho manogu-nogu angka bangso anso porsaya halahi jana mangoloi goarNia.

SURAT NI SI PAULUS TU PARLAGUTAN ROM 12:3

Markite-hite asi ni roha na nilehen di au, hupaingot ma hamu ganup marsada-sada ulang ma dipikiri hamu taringot tu hamu lobi sian na patut, tapi intap ni na patut ma parrohaonmunu, mangihutkon haporsayaan na diturpukkon ni Debata tu hamunu.

SURAT NI SI PAULUS TU PARLAGUTAN ROM 15:16

Madung dibaen Ia do au gabe pangoloi ni Kristus Jesus, suruanNia mandapotkon angka bangso na asing. Jana hubaen do au gabe songon malim, manjamitahon Jamita Na Denggan na sian Debata anso gabe haul na tumbuk tu roha ni Debata angka halak na asing i. Sai gabe haul hapunjungan ma di Debata halahi baenon ni Tondi Parbadia.

1 KORINTUS 15:10

Tapi hara ni asi ni roha ni Debata, madung gabe songon au na adong saonnari on, au. Jana nada parcuma na niampunan ni Debata au. Hape gabe lumoja dope au markarejo sian sude rasul na asing i. Tapi i pe sudena, nada hara ni usahongku i; usaho ni Debata na mangakaholongi au do i jana na markarejo rap dohot au.

1 KORINTUS 3:5

Jolma na bia ma he pola si Apollos? Jana tarbia muse si Paulus? Pangoloi ni Debata sajo do hami na dua, na dung manogu-nogu hamu anso porsaya tu Debata. Karejo na nipasahat ni Tuhan i tu hami be, i sajo do na hami dalankon.

2 KORINTUS 3:6

Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do.

2 KORINTUS 4:1

Na niurupan ni Debata do hami mangkarejohon karejo on. Na nilehenNia do karejo on di hami. Hara ni i ma umbaen na so mandele hami.

GALATIA 2:8

Harana, Debata na mambaen si Petrus i sanggup gabe rasul tu halak Jahudi, madung dilehen Ia muse do tu au hamaloan anso gabe rasul tu bangso na asing.

EPESUS 1:19

Jana na godang do kuasoNia di hita angka na dung porsaya mangihutkon kuaso hagogoonNia na togu i,

EPESUS 3:2

Ninna rohangku madung dibege hamu i, hara ni denggan ni roha ni Debata madung dilehen Ia tu au karejo on hara ni haporluanmunu.

EPESUS 3:20

Markite-hite kuaso ni Debata na marsitutu i markarejo di bagasan dirinta, tarpatupa Debata do dao umbahat dope sian angka na hita pangido dohot na tapikirkon.

EPESUS 3:8

Sian sudena na margoar halak na porsaya, au ma i tardok na umbile. Hape laing dipasahat Debata do tu au hasurungan on: I ma, anso hujamitahon Jamita Na Denggan on tu angka halak na so Jahudi paboa na adong do bahat sajo sinadongan na so ra abis di Kristus;

EPESUS 4:16

Muda Ia do uluan na mamimpin hita, sude angka bagian ni pamatang i maraturan do sude parsusun ni i, na nipadomu-domu ni angka ruasna be na sada tu na asing. Jadi muda denggan do marsikarejohon karejona be angka anggota i songon na sapatutna, gabe mur magodang ma sude pamatang i jana mur margogo markite-hite holong ni roha.

KOLOSSE 1:29

Hugogoi do markarejo anso lalu tu tujuan i. Marjuang do au mamake sude gogo na nipasahat ni Kristus di au jana na markarejo di bagasan diringku.

1 TESSALONIKA 2:13

Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus.

IBRANI 13:21

Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen.