EPESUS 1:7 - BIBEL JAMITA NA DENGGAN

⁷ Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia,

EPESUS 1:7 ပူးပေါင်းရင်းမြစ်များ

JOB 33:24

Dokkonon ni surusuruan i ma sian ibo ni rohana, ‘Palua ma da ia, nada tola ia manuat dope tu tanoman. On ma hepeng panobusna, anso tola ia maruli haluaan.’

MASMUR 130:4

Hape diampuni Ho do hami, diarop rohangku do janjiNa.

MASMUR 130:7

Mararop roha tu Tuhan ma hamu, o hamu bangsoNa angke sai dihaholongi Ia do hita, jana hobas do Ia paluahon hita.

MASMUR 86:5

Angke na burju do Ho ale Tuhan, jana sai mangampuni do Ho sanga ise na martangiang tu Ho sai dihaholongi Ho do.

HARURUAR 34:7

Hupatulus do baga-bagangKu tu marribu-ribu sundut jana Huampuni do hajahatan dohot dosa i tapi nada lalap boti Au manguhumi parjahat bope dakdanak dohot pahompumunu lopus tu sundut patoluhon dohot paopatkon hara ni dosa ni simatobang ni halahi.”

JESAYA 43:25

Au, Au do na manyesa dosamu, Huampuni ho, hara ni Au sandiri. Nada ra Au manyimpan dosamu di bagasan rohangKu, hasalaanmu na salpu nada be paingot-ingotonKu.

JEREMIA 31:34

Sahalak pe sian halahi nada porlu be mangajari donganna laho mananda Tuhan. Angke sude halahi, na menek sanga na magodang, tandaonna ma Au. HalupahononKu ma angka hasalaan ni halahi, jana Huampuni angka dosa ni halahi. Au Tuhan, madung mandok songon i.”

DANIEL 9:19

Ale Tuhan, tangihon ma hami, sesa ma dosanami, parrohahon ma hami jana urupi ma hami! Ulang be palolot-lolot, anso sude halak umboto Ho do Debata. Ho do nampuna kota on dohot bangso on.”

DANIEL 9:9

Gok di Ho hasesaan ni dosa dohot asi ni roha haru pe madung mangalo hami tu Ho.

JUNUS 4:2

Jadi martangiang ma ia, “Nada he hudok hian do ale Tuhan taran so kehe sian bagasku na salpu i, na giot songon i hian do baenonMu? Hara ni i ma umbaen na huompoti kehe tu Tarsis! Huboto humani do Debata pangusayang dohot parholong Ho, na lambok jana mura sajo do manigor di Ho pauba sangkapMu manguhumi.

MIKA 7:18

Nada adong Debata na songon Ho, ale Tuhan, na mangampuni dosa ni bangsoMu na teba i. Nada sapanjangna Ho muruk; balik tehe, sonang do rohaMu patuduhon holong ni rohaMu na so marparsuhatan i.

ZAKARIA 13:1

“Di ari i marbuldak ma sada mual ni aek laho paiaskon pomparan ni si Daud dohot halak na maringanan di Jerusalem sian dosa dohot parsombaan tu gana-ganaan na dung didalankon halahi.

ZAKARIA 13:7

Didok Tuhan Na Markuaso i ma, “Jongjong ma ho, ale podang, lancim ma parmahan na Husuru i! Matehon ma ia, gabe marserak ma angka biri-biri i. AloonKu ma bangsongKu.

ZAKARIA 9:11

Didok Tuhan ma tu bangsoNia, “Ho pe markite-hite mudar ni parjanjianKu dohot do paluaonKu angka na tarbuang sian ho, malua sian sumur na so marisi aek.

MATEUS 20:28

Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak.”

MATEUS 26:28

Angke on ma mudarKu na gabe jaminan ni parjanjian ni Debata. Niduruskon do mudarKon hara ni bahat halak, gabe hasesaan ni dosa.

MATEUS 6:12

sesa ma angka dosanami, songon hami manyesa dosa ni angka na mardosa tu hami,

MARKUS 14:24

Dung i didok Jesus ma tu halahi, “On ma mudarKu, na niduruskon di halak na bahat, i ma mudar na mambaen tulus parjanjian ni Debata.

LUKAS 1:77

Jana patuduhon tu bangsoNia pangastuion taringot tu haluaan, marhite na dung disesa angka dosa ni halahi,

LUKAS 24:47

Sada muse, tarsurat hian do angkon nijamitahon do tu sude bangso markite-hite goar ni Kristus i bahaso na giot ampunan ni Debata ma angka dosa muda dipauba jolma i rohana sian angka dosa ni halahi. Jana mamungka ma barita i sian Jerusalem on.

JOHANNES 20:23

Muda disesa hamu dosa ni sanga ise, laing tarsesa ma dosana i; muda nada disesa hamu dosa ni halak, laing na so tarsesa ma dosana i.”

BAENON NI ANGKA RASUL 10:43

Sude do angka panurirang manaringoti Ia. Didok halahi, dapotan hasesaan ni dosa do sudena halak na porsaya tu Jesus, markite-hite goarNia.”

BAENON NI ANGKA RASUL 2:38

Dialusi si Petrus ma, “Pauba hamu ma rohamunu sian angka dosamunu. Jana angkon dipandidihon ma hamu ganop be di bagasan goar ni Jesus Kristus, anso nisesa sude dosamunu i. Dung i jagitonmunu ma silehen-lehen ni Debata, i ma Tondi Parbadia.

BAENON NI ANGKA RASUL 20:28

Antong jagohon hamu ma dirimunu dohot sude habanan i, harana madung dipabangkit Tondi Parbadia hamu gabe parmahan. Parmahani hamu ma parlagutan ni Tuhan i, na nibaen gabe nampunaNia markite-hite mudarNia sandiri.

BAENON NI ANGKA RASUL 3:19

Hara ni i, pauba hamunu ma rohamunu sian angka dosamunu jana mulak ma hamu tu Debata, anso disesa Ia sude angka dosamunu i.

SURAT NI SI PAULUS TU PARLAGUTAN ROM 2:4

Sanga na marlayas ni roha do ho di godang ni denggan basaNia, lambok dohot burju ni rohaNia? Nada he diboto ho, denggan basa ni Debata do maroban ho tu haubaan ni roha?

SURAT NI SI PAULUS TU PARLAGUTAN ROM 3:24

Jana nipatigor do halahi songon silehen-lehen hara ni asi ni rohaNia markite-hite haluaan na di bagasan Kristus Jesus.

SURAT NI SI PAULUS TU PARLAGUTAN ROM 3:25

Jesus Kristus do na nipatumbuk ni Debata, gabe haul pardengganan markite-hite haporsayaan di mudarNia anso dipatidahon Ia hatigoranNia, angke dipadiar Ia do dosa i di hatiha hasobaranNia.

SURAT NI SI PAULUS TU PARLAGUTAN ROM 9:23

Por muse do roha ni Debata patuduhon tu hita hasangapanNia na marlobi-lobi na niusehonNia tu hita angka na nihaholonganNia. Madung dihobasi Ia hian hita laho manjagit hasangapanNia i,

1 KORINTUS 1:30

Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

2 KORINTUS 8:9

Angke tangkas do diboto hamu, holong situtu do roha ni Jesus Kristus Tuhanta i maradopkon hita. Na mora do Ia nian, tapi gabe marpogos do Ia hara ni hamu, anso mamora hamu hara ni hapogosonNia i.

EPESUS 1:14

Tondi i ma na gabe jaminan paboa na jagitonta ma sanga aha na nijanjihon ni Debata tu halakNia. Jana on ma na papos rohanta paboa na angkon paluaon ni Debata ma angka halakNia. Sipujion do Debata hara ni hagodanganNia i!

EPESUS 1:18

Hupangidohon anso torang mata ni rohamunu dibaen Ia, anso diastui hamu sanga aha na patut aropon ni rohamunu sian Debata na mamiohon hamu, bope hamoraon ni hasangapan, siteanon na nitontuhonNia di angka halak na porsaya.

EPESUS 1:6

Pinuji ma Debata hara ni hadengganan ni rohaNia na songon i godang na nipabotohonNia tu hita mardapot-dapot markite-hite Anak haholonganNia i.

EPESUS 1:8

na dung dilehen Ia di hita markite-hite ragam ni habisuhon dohot parbinotoan.

EPESUS 2:4

Tapi na godang do denggan ni roha ni Debata! Songon i ma holong ni rohaNia tu hita.

EPESUS 2:7

Dibaen Debata pe na songon i, anso diida jolma i do sanga na bia godangna hadengganon ni rohaNia di hatiha na giot ro, i ma na nipatidahonNia tu hita markite-hite Kristus Jesus.

EPESUS 3:16

Hutangiangkon do anso lomo nian roha ni Debata na sun marmulia i laho patoguhon rohamunu dohot TondiNia i.

EPESUS 3:8

Sian sudena na margoar halak na porsaya, au ma i tardok na umbile. Hape laing dipasahat Debata do tu au hasurungan on: I ma, anso hujamitahon Jamita Na Denggan on tu angka halak na so Jahudi paboa na adong do bahat sajo sinadongan na so ra abis di Kristus;

PILIPPI 4:19

Pasingkopon ni Debatangku ma sudena na hasaya di hamu mangihutkon hagabeanNia na so tarsuhat i na adong di Kristus Jesus.

KOLOSSE 1:14

Di bagasan Ia do adong di hita haluaan, i ma hasesaan ni dosa.

KOLOSSE 1:27

Anggo tu bangsoNia i ra do Debata paboahon sanga na bia dengganna dohot godangna rahasiaNia i di sudena jolma manusia. On do rahasia i: Di bagasan dirimunu do Kristus, jadi gabe dohot ma hamu maruli di hagodangan ni Debata.

KOLOSSE 2:13

Najolo madung mate hamu anggo salaho tu partondion hara ni na mardosa hamu, boti hara ni na so marsunat pamatangmunu. Tapi saonnari dipangolu Debata do hamu rap dohot Kristus, dibaen madung diampuni Debata sasudena dosanta,

KOLOSSE 2:2

Sai margogo ma nian roha ni halahi, jana marsihaholongan ma halahi anso gabe solkot halahi mardomu. Muda tutu halahi mangarti gabe maruli pos ni roha situtu ma halahi. Jadi mur tangkas muse ma tandaon ni halahi rahasia ni Debata; i ma Kristus sandiri.

1 TIMOTEUS 2:6

Madung dipasahat Ia diriNia gabe partobus humopkop sudena, anso disaksihon di hatiha na nitontuhon Debata.

TITUS 2:14

Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan.

TITUS 3:6

Diduruskon Debata do TondiNia i tu hita markite-hite Jesus Kristus i, di hita,

IBRANI 9:22

Tutu nian, anggo mangihutkon Tona ni ugamo Jahudi bolas nidok, sasudena sanga aha pe angkon nipaias dohot mudar do; jadi nada tarsesa dosa anggo so adong mudar na niduruskon.

1 PETRUS 2:24

Kristus sandiri do mamorsan angka dosanta i di pamatangNia sandiri di ginjang ni hayu parsilang i, anso tola hita malua sian kuaso ni dosa jana tola hita mangihutkon hagiot ni Debata. Angke bugang ni Kristus i do na paluahon hamu.

1 PETRUS 3:18

Angke sanoli sajo do mate Kristus hara ni dosanta ro di salolot-lolotna – i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi.

1 JOHANNES 2:12

Hubaen surat on tu hamu angka dakdanak, dibaen madung disesa dosamunu hara ni goarNia.

1 JOHANNES 2:2

Markite-hite Jesus Kristus do dapot hita hasesaan ni angka dosanta i. Jana nada hum dosanta na nisesaNia, tapi dohot do dosa ni sandok tano on.

1 JOHANNES 4:10

On do holong ni roha i: Nada hita parjolo mangkaholongi Debata tapi Debata do na mangkaholongi hita jana na marsuru AnakNia tu portibi on anso dapotan pardengganan hita taringot tu angka dosanta.

HALUMBAAN 14:4

Angka halak na manjagohon dirina do halahi, jana nada dipahodar halahi diri ni halahi markite-hite dadaboru; ias do halahi songon bujing-bujing. Dipaihut-ihut halahi do Anak Ni Biri-biri i sanga na tudia Ia kehe. Sian sudena jolma manusia, halahi ma na dung nipalua anso haulkononkon songon patumonaan ni haul tu Debata dohot tu Anak Ni Biri-biri i.

HALUMBAAN 5:9

Dung i diendehon halahi ma sada logu na imbaru: “Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso.