DANIEL 7:27 - BIBEL JAMITA NA DENGGAN

²⁷ Lehenon noma tu bangso ni Debata Na Gumincat i kuaso dohot hagodangan ni sude harajaan na di tano on. Nada marujung be kuaso ni halahi laho mamarenta jana sandok parkuaso na di tano on unduk noma tu halahi di bagasan haburjuon.

DANIEL 7:27 ပူးပေါင်းရင်းမြစ်များ

MASMUR 145:13

Hot do harajaanMu sapanjangna, ro di salolot-lolotna do martahan kuasoMu. O Tuhan, setia do Ho di sude janjiMu, na denggan ma da tutu sude pambaenanMu.

MASMUR 22:27

Ingoton ni sude bangso ma Tuhan, sian desa na walu halahi marroan, sude horong ni bangso mulak ma tuSia, lalu marsomba tuSia.

MASMUR 72:11

Marsomba ma sude raja di adopannia, jana sude bangso ma mangoloi ia.

MASMUR 86:9

Ale Tuhan, giot marroan sandok bangso na nijadihonMu, laho marsomba Ho jana mamuji hagodanganMu.

JESAYA 14:2

Bahat bangso na giot mangurupi bangso Israel anso mulak halahi tu tano na nilehen ni Tuhan tu halahi, jana gabe hatoban ma angka bangso i disi tu Israel. Tabanon ni Israel ma angka halak na dung jungada manaban halahi jana parentaonna ma na unjung mamisat halahi.

JESAYA 54:3

Pabidangonku ma tanomu tu siamun dohot siambirang, kota lobu gabe sumuang niinganan. Madung dijuguhi bangso na asing luatmunu tapi mulak do luat i gabe nampunamunu.

JESAYA 9:7

Mur tu godangna do kuasonia, jana tongtong dame harajaannia. Ia ma raja na songon panggonti ni si Daud, marojakan tu hatigoran dohot hasintongan do harajaannia sian mulai saonnari lalu tu salolotna. Angkon tulus sudena i baenon ni Tuhan Na Markuaso i.

DANIEL 2:44

Di hatiha ni angka raja-raja i mamarenta, giot pajongjongon ni Debata na di banua ginjang i ma sada harajaan na manongtong sapanjangna jana na so tartaluhon bangso dia pe. Roncohonon ni harajaan na sada i ma sandok harajaan na asing i tapi harajaan na sada i, manongtong do ro di salolot ni lolotna.

DANIEL 4:34

“Dung salpu hatiha sipitu taon i, hupadorgak ma tu langit gabe sumuang ma torang rohangku. Jadi hupuji ma Na Gumincat i. Hupasangap jana hupagodang ma na Tongtong Mangolu i, Mamarenta noma Debata salolot-lolotna. Markuaso do Ia sapanjangna.

DANIEL 6:26

Dung i ditongos Raja Darius ma surat tu angka jolma sian sandok bangso, marga ni bangso dohot hata na marragam-ragam na di tano on sudena. Ninna ma, “Sai martamba ma di hamu rasoki!

DANIEL 7:14

Dilehen do tusia hasangapan dohot kuaso songon raja, jadi unduk ma tusia angka jolma sian sandok bangso, marga ni bangso dohot hata na marragam-ragam. Manongtong do kuasonia i salolot-lolotna, nada dirampas be sian ia harajaan.

DANIEL 7:18

Tapi anggo tu bangso ni Debata Na Gumincat i lehenon do kuaso laho mamarenta jana manongtong do salolot ni lolotna pangarajaina.”

DANIEL 7:22

Dung i ro ma Na Tongtong Mangolu i mangalehen haputusan na mandok tigor do bangso ni Debata Na Gumincat i. Madung dapot hatihana di halahi laho manjagit kuaso laho mamarenta.

OBAJA 1:21

Porangan ni halahi ma rap dohot halak Jerusalem na asing i halak Edom jana taluhononna. Jadi Au Tuhan, mamarenta noma gabe raja.”

ZAKARIA 14:9

Jadi mamarenta ma Tuhan gabe raja di sandok portibi on; sombaon ni ganop jolma ma Ia songon Debatana jana tandaon ni halahi ma Ia di bagasan goar na sarupa.

LUKAS 1:33

Jadi gabe raja ma Ia di angka pomparan ni si Jakob ro di salolot ni lolotna. Nada marujung be HarajaanNia.”

JOHANNES 12:34

Didok halak na bahat i ma tuSia, “Anggo mangihutkon Buku Tona ni ugamonami, salolot-lolotna do mangolu anggo Kristus i. Biasi do didokkon Ho patuginjangon di ginjang tano Anak Ni Jolma i. Ise lakna Anak Ni Jolma i?”

1 KORINTUS 15:24

Dung i ro ma hasisidungna. Taluhonon ni Kristus ma disi sudena pangarajaion, sude kuaso dohot hagogoon; lalu pasahatonNia ma kuaso ni harajaanNia tu Debata Amanta i.

HALUMBAAN 11:1

Dung i dilehen ma di au sada bulu suhat-suhat tarsongon tungkot, jadi diparentahon ma, “Kehe ma ho mangukur Bagas Na Badia ni Debata dohot meja inganan parkaulan i. Etong ma sanga sadia bahat halak na maribadat di bagasan.

HALUMBAAN 11:15

Dung i diombus surusuruan papituhon i ma sarunenia, gabe adong ma sora na gogo situtu di banua ginjang na marsurahi mandok, “Anggo kuaso laho mamarenta portibi on saonnari madung di bagasan tangan ni Tuhanta dohot Kristus na nijanjihon i. Mamarenta noma Ia salolot-lolotna!”

HALUMBAAN 17:14

Na giot marporang do halahi mangalo Anak Ni Biri-biri i. Tapi taluhonon ni Anak Ni Biri-biri i ma halahi, angke Ia do Tuhan ni angka tuan jana Raja ni angka raja. Dung i monang ma na rap dohot Ia, i ma angka na nipiohon dohot na nipili dohot na setia.”

HALUMBAAN 19:16

Tarsurat do di baju jubaNia dohot di hae-haeNia i goar on, “Raja ni sasude raja jana Tuan ni sude tuan.”

HALUMBAAN 20:4

Dung i huida ma angka habangsa dohot angka halak na juguk di habangsa i; dilehen ma kuaso tu halahi laho mandabu uhuman. Huida muse dope angka tondi ni halak na hona ponggol uluna hara ni hasaksian taringot tu Jesus dohot hara ni hata ni Debata. Halak on ma na so jungada ra manyomba binatang i bope patungna i. Tanda ni binatang i pe nada jungada dijagit halahi di bohi sanga pe di tangan ni halahi. Gabe mangolu ma halahi mangulahi jana mamarenta ma halahi songon raja rap dohot Kristus di na saribu taon i.

HALUMBAAN 22:5

Nada porlu be di halahi lampu sanga sinondang ni mataniari, angke nada adong be ro borngin disi boti hara ni na nisondangan ni Tuhan Debata do halahi. Gabe mamarenta ma halahi songon raja ro di salolot-lolotna.