DANIEL 6:4 - BIBEL JAMITA NA DENGGAN

⁴ Manigor torang ma tarida na dumenggan parkarejoan ni si Daniel ulang pado angka gubernur dohot angka parpangkat na gincat na asing i. Hara ni i, por ma roha ni raja i giot mangangkat ia gabe parkuaso di sude harajaan i.

DANIEL 6:4 ပူးပေါင်းရင်းမြစ်များ

PAMUNGKAAN 41:38

jadi didok raja i ma tu halahi, “Aropku nanggo dapot hita be da na dumenggan halakna sian si Josep on, harana ia do na nigohan ni Tondi Ni Debata.”

PAMUNGKAAN 43:18

Disi dioban halahi masuk tu bagas ni gubernur i, mabiar be ma halahi jana marpikir, “Hara ni hepengta na nipaulakna i di bagasan angka harungta i di na ro parjolo hita tuson, hara ni i do umbaen na dioban hita tu bagas on. Hantamon ni halahi ma hita tompu, buaton ni halahi ma angka halodenta i jana baenon ni halahi ma hita gabe naposona.”

PODA 29:27

Halak na burju nada sonang rohana tu halak na jahat; magigi do halak na jahat tu halak na burju.

PARJAMITA 4:4

Laing huboto muse dope bahaso songon i situtuna jolma markarejo, hum hara ni na mangiburu paida-ida pandapotan ni hombar bagasna. Magopo do sudena i songon karejo na manangkup angin.

JEREMIA 18:18

Didok halahi ma, “Tole ma martahi hita mangalo si Jeremia. Haru so adong pe ia laing na adong do angka malim na mangalehen pangajaran, laing na malo do angka halak na bisuk mangalehen sipaingot; jana laing tarbaen angka panurirang do palaluhon angka tona ni Debata tu hita. Beta ma hita aduhon ia tu paruhuman jana nada be patangi-tangionta angka hatania.”

JEREMIA 18:23

Tapi diboto Ho do ale Tuhan sasude na nitahi ni roha ni halahi laho mamatehon au. Hara ni i, ulang be ampuni halahi; ulang sesa hasalaan ni halahi. Potuk ma halahi lopus dabu. Maralo ma Ho tu halahi di bagasan muruk ni rohaMu.”

JEREMIA 20:10

Tarbege ma halak marhusipi di sude inganan, “Biar noma na marroha-roha! Beta ma hita aduhon ia tu raja!” Salangkan angka ale-alengku sudena paintehon hadadabungku noma. Didok halahi, “Aropku marhite elek-elek, tartaluhon hita do i, anso tarbaen hita palalu hosom tusia.”

JEREMIA 29:7

Markarejo ma hamu anso dumpang hasonangan di angka kota habuanganmunu. Tangiangkon hamu ma tu au salaho tu haporluan ni angka kota i, angke muda masonang kota i laing masonang muse do dohot hamu.

DANIEL 3:8

Adong ma piga-piga halak Kasdim na mamake tingki i laho mangago halak Jahudi.

DANIEL 5:12

Sun do malo ni bayo i dohot bisukna boti malo do ia patorangkon nipi, mambuka rahasia dohot pasidungkon angka soal-soal na maol. Si Daniel goarna, tapi anggo raja i mandok si Beltsasar do goarnia. Paboaonnia do tu raja i sanga aha astuan ni suratan on.”

DANIEL 6:22

Dung i ninna si Daniel ma mangalusi raja i, “Sai ginjang ma umur ni raja i salolot-lolotna!

MATEUS 26:4

Martahi ma halahi laho manangkup Jesus anso dibunu halahi Ia.

MATEUS 27:18

Didok gubernur i pe songon i hara ni na dung diboto ia do, na late do roha ni halahi umbaen na dipasahat halahi Jesus tusia.

LUKAS 20:20

Jadi sai dijalahi halahi ma hatiha na denggan. Dilehen halahi ma hepeng sogok tu halak na gabe kaki tangan ni halahi jana disuru halahi ma angka kaki tangan i mangalancap songon halak na burju laho mangonjap Jesus markite-hite sapa-sapa, anso tarpasahat halahi Jesus tu toru ni kuaso ni gubernur.

LUKAS 20:26

Jadi tangkas ma di jolo ni halak na bahat i, na so tarbaen halahi padapot hasalaan ni Jesus. Tarkohom jana homang be roha ni halahi hara ni alusNia.

LUKAS 22:2

Sai dijalak-jalahi angka sintua ni malim dohot angka Siboto Surat Jahudi ma dalan mamatehon Jesus; angke mabiar do halahi mida halak na bahat i.

JOHANNES 19:4

Dung i haruar ma si Latus sanoli nari, didok ia ma tu halak na bahat i, “Ligi hamu ma! Madung huoban Ia saonnari tu ruar anso diboto hamu na so adong dapot au hasalaanNia bagi aha pe.”

2 KORINTUS 11:12

Sanga aha na hukarejohon saonnari, pupuonku do mambaen i, lopus inda tarbaen “angka rasul” na asing i be pagodang diri bope mandok na sarupa karejonami dohot halahi.

PILIPPI 2:15

Di na songon i, patuduhon hamu ma paboa na tutu hamu dakdanak ni Debata, na so martilako, na bulus jana bonar di tonga-tonga ni angka halak na jahat dohot na mardosa. Jana di na palaluhon jamita taringot tu hangoluan i hamu tu halahi, angkon gabe songon sinondang na manorangi portibi on do hamu maradopkon halahi. Muda songon i ngolumunu, gabe adong ma dalan di au saulahon laho mamuji diringku hara ni hamu, di haroro ni Jesus Kristus mangulahi. I ma tandana, na so sayang boti parjuanganki jana marhasil do halolojangki.

1 TIMOTEUS 5:14

Hara ni i ma dibaen na dumenggan hudok marbagas mangulahi angka na mabalu na poso dope. Denggan ma i mardakdanak halahi dohot na mangurus rumahtanggana anso ulang adong tarbaen angka musunta i dalan pajatjat-jatjatkon goarta.

TITUS 2:8

Angka pandohan na tabo ma pake, na so tarincahi halak, anso maila angka halak na mangalo ho angke sada pe nada adong na hurang denggan dapot halahi sihataanna taringot tu hita.

1 PETRUS 2:12

Angkon denggan do pangalahomunu di tonga-tonga ni angka halak na so porsaya tu Kristus, jadi haru pe diincahi halahi hamu songon halak na jahat, gabe idaon ni halahi ma angka pambaenanmunu na denggan i, jana gabe pujion ni halahi ma Debata di haroro ni Debata tu portibi on.

1 PETRUS 3:16

Tapi mardongan lambok ni roha dohot hapantunon ma baen hamu i sudena. Jana angkon ias do taroktokmunu, anso maila sandiri sanga ise na manilakoi hamu hara ni na denggan pardalananmunu songon siihutkon Kristus.

HAKIM-HAKIM 14:4

Nada diboto simatobang ni si Simson i bahaso Tuhan do na mambaen si Simson songon i pangalahona. Angke na manjalak-jalahi hatiha hadenggananna dope Tuhan laho mamorangi halak Pilistin. Markuaso do halak Pilistin di hatiha i tu halak Israel.

1 SAMUEL 12:4

Dialusi angka jolma i ma, “Nada adong, nada jungada ho amang manipu sanga mamparkanciti hami; nada unjung ho amang mambuat sanga aha nampuna ni sanga ise pe.”

1 SAMUEL 18:14

Manjadi do sude karejonia, angke didongani Tuhan do ia.

1 SAMUEL 22:14

Jadi dialusi si Ahimelek ma, “Panglima na umburju do si Daud di raja i! Babere ni raja i sandiri do antong ia, kapala ni pangawal ni raja i sandiri, jana na diparsangapi ni sude halak na adong di bagas godang ni raja i tusia.