DANIEL 5:16 - BIBEL JAMITA NA DENGGAN

¹⁶ On dope hubege paboa na malo ho mambuka sandok rahasia dohot pasidungkon angka soal-soal na maol. Muda malo ho mambasa surat on dohot paboahon astuanna tu au hulehen pe di ho pakean harajaan baju juba na bunga torung dohot borgok sere tanda ni hasangapan. Tamba ni i, huangkat pe ho gabe parkuaso na patoluhon di bagasan harajaanku.”

DANIEL 5:16 ပူးပေါင်းရင်းမြစ်များ

PAMUNGKAAN 40:8

Alus ni halahi, “Na marnipi do hami, tapi nada adong halak dison na bisa patorangkon artina.” Ning si Josep ma, “Hum Debata do na mambaen tarpatorang jolma nipi. Patorang hamu ma jolo nipimunu i.”

PAMUNGKAAN 41:15

Ning raja i ma tusia, “Na marnipi do au, tapi nada adong umpe sahalak na malo patorangkon astuanna. Na nipaboa ni halak do tu au na malo ho patorangkon nipi.”

PAMUNGKAAN 41:42

dibuka raja i ma tintin na maruhir, sitempel ni harajaan, jana dipamasuk ia ma i tu jari-jari ni si Josep. Dipapakehon raja i muse ma tusia sada baju juba na sian linen na halus jana dipamasuk ia muse ma tu rungkungna i sada borgok sere.

DANIEL 2:48

Dung i dilehen ia ma di si Daniel pangkat na gincat, dileheni ia angka silua na jeges-jeges, jana diangkat ia si Daniel gabe pangarajai ni Babel lalu dibaen ia gabe pamimpin ni sude panuturi ni raja.

DANIEL 2:6

Tapi muda dapot hamu do, lehenonku ma tu hamu silehen-lehen na denggan dohot hasangapan. Antong, paboa hamu ma saonnari nipingki dohot astuanna!”

DANIEL 5:29

Manigor diparentahon si Belsasar ma angka pagawenia anso dipapakehon tu si Daniel baju juba na bunga torung jana dibaen borgok sere tu rungkungnia. Jadi diangkat ia ma si Daniel gabe parkuaso na patoluhon di bagasan harajaannia i.

DANIEL 5:7

Mangarar ma ia lalu mangido anso dipiohon angka datu na malo manjujur, na malo marjampi-jampi dohot na umboto parhalaan. Dung ro halahi, didok raja i ma, “Sanga ise na malo mambasa suratan i dohot paboahon astuanna tu au, lehenonku ma pakean harajaan, i ma baju juba na bunga torung dohot borgok sere tanda ni hasangapon. Tamba ni i angkatonku ma ia gabe parkuaso na patoluhon di bagasan harajaanku.”

DANIEL 6:2

Dibagi si Darius ma harajaannia i gabe saratus dua pulu propinsi na niparenta ni sada be gubernur.

BAENON NI ANGKA RASUL 8:18

Diida si Simon ma i, hara ni na nipayakkon ni angka rasul tanganna tu ulu ni halak Samaria i gabe dilehen ma Tondi Parbadia tu halahi. Jadi dioban si Simon ma hepeng tu si Petrus dohot si Johannes,