DANIEL 2:45 - BIBEL JAMITA NA DENGGAN

⁴⁵ Nada he diida raja i do sada batu na magulang sian dolok-dolok i haru pe nada adong halak na mandabuhonsa, lalu manondong dohot mangaropuk patung na sian bosi, tumbaga, tano liat, perak dohot sere i? Didok Debata na sun godang i do tu raja i sanga aha muse na giot masa tu pudi on. Madung hupaboa nipi ni raja i na satutuna jana hupatorang astuanna na sasintongna.”

DANIEL 2:45 ပူးပေါင်းရင်းမြစ်များ

PAMUNGKAAN 41:26

Anggo na nidok ni lombu na mokmok na pitu i, i ma pitu taon, jana pitukamburir eme na porngis i pe, laing pitu taon do na nidokna, sarupa do astuan ni i.

PAMUNGKAAN 41:28

Songon na nidok i tu raja i – madung dipatidahon Debata tu raja i sanga aha na giot baenonNia.

PAMUNGKAAN 41:32

Diulahi do nipi ni raja i jabat dua noli, artina na dung ditontuhon Debata do i jana manigor patuluson ni Debata ma i.

2 SAMUEL 7:22

Na godang situtu do Ho antong, ale Tuhan Debata. Nada adong tudosanMu, jana sian najolo do hami boto, hum sasada Ho do Debata.

1 JUJUR TAON 16:25

Sipuji-pujion do hagodangan ni Tuhan. Manyalpui sude debata patut do nisangap Tuhan.

NEHEMIA 4:14

Di na huida mabiar rayat i, hudok ma tu halahi dohot tu angka hatobangon maradu tu angka pamimpin, “Ulang hamu mabiar mida musu! Tuhan na gogo jana na markuaso i ma ingot hamu, jana parjuangkon hamu ma angka kahanggimunu, angka dakdanak, dongan saripe dohot bagasmunu!”

NEHEMIA 9:32

O Debata, Debatanami na gogo! Debata na godang jana na jorbut! Sai na setia do Ho maniop sumpa dohot janji, digohi Ho do sandok janjiMu jana dipatulus Ho do i. Mamungka sian na nipisat ni raja Asur hami, lopus saonnari, ma bahat pardangolan hami alami. Angka raja, malim, panurirang maradu hatobangonnaMi, bope ompu dohot rayat madung sude manaonkon i. Ulang halupahon sude na hancit i! Ulang nian agohon i sian parningotanMi!

JOB 36:26

Na mulia do antong Debata, nada tuk hita mandodoiSa sanga pe maretong angka taonNa.

MASMUR 135:5

Huboto do tangkas, na santak godang do Tuhanta diatasi Ia do sandok debata.

MASMUR 145:3

Angke na tongam do Ho, ale Tuhan jana tarpuji situtu, nada hadodoan hagodanganMu.

MASMUR 2:9

Mardongan tungkot bosi tipulkononmu halahi songon hudon tano ropukonmu halahi.’ ”

MASMUR 48:1

Na godang do Tuhan jana na tarpuji situtu di Kota Ni Debatanta, di dolokNia na badia.

MASMUR 96:4

Angke na godang do Tuhan jana na tarpuji situtu do Ia, manyalpui sude debata patut dilehen sangap tuSia.

JESAYA 28:16

Hara ni i songon on ma didok Tuhan Debata, “BaenonKu ma ojahan na togu jana na tohong di Sion; di gincat ni batu parsuhi na arga i suratkononKu ma: ‘Haporsayaan na togu, padao ganggu ni roha.’

DANIEL 2:24

Dung i kehe ma si Daniel mandapotkon si Ariokh na disuru laho mamunu angka halak na pistar di Babel i. Didok si Daniel ma tusia, “Ulang bunu angka na pistar i. Oban ma au manopot raja i, angke giot paboaonku tu raja i sanga aha nipi i dohot astuanna.”

DANIEL 2:28

Tapi adong do di banua ginjang Debata na mambuka sude rahasia, jana madung dipaboa Ia tu raja i sanga aha na giot tarjadi tu pudi on. Jadi on ma nipi ni raja i dohot astuanna:

DANIEL 2:29

Taran modom raja i, marnipi do raja i taringot tu hatiha na giot ro. Dipatidahon Debata sibuka rahasia i do tu raja i sanga aha na giot masa.

DANIEL 2:44

Di hatiha ni angka raja-raja i mamarenta, giot pajongjongon ni Debata na di banua ginjang i ma sada harajaan na manongtong sapanjangna jana na so tartaluhon bangso dia pe. Roncohonon ni harajaan na sada i ma sandok harajaan na asing i tapi harajaan na sada i, manongtong do ro di salolot ni lolotna.

DANIEL 8:25

Dibaen malo do ia manipu, sai tulus do angka sipaoto-otonia. Dihaginjangkon ia ma dirinia, jana nada pola jolo mangalehen sipaingot matehononnia ma bahat jolma. Salang Raja ni sandok raja pe dialo ia do. Tapi roncohonon do ia nada pola hara ni gogo ni jolma.

HAGAI 2:22

ParrumpakkononKu ma angka harajaan jana sarsarkononKu angka kuaso ni halahi. Huparbalikkon angka kareta porang dohot na manenggetsa; marmatean ma sude kudona jana marsibunuan ma angka na manenggetsa.

ZAKARIA 12:3

Tapi muda dung dapot ari i, baenonKu ma Jerusalem songon batu na dokdok, sanga bangso dia pe na mancubo mangangkatsa, gabe dapotan hamamago. Mardomu ma sandok bangso na di tano on laho mamorangi Jerusalem.

MALEAKI 1:11

Dipasangap angka bangso na di tano on do Au sudena. Sanga na di dia ditutung halahi do dupa laho pasangapkon Au jana dihaulkon halahi do angka haul na patut tu Au. Olo! sude do halahi pasangapkon Au!”

MATEUS 21:24

Dialusi Jesus ma, “Au pe Hubaen jolo sada sapa-sapa tu hamu. Muda dung dialusi hamu naron sapa-sapa on, disi pe anso Hupaboa tu hamu, sanga na sian ise Hujagit kuaso laho mambaen songon i.

MATEUS 24:35

Anggo langit dohot tano on mago do, tapi anggo hatangKi angkon hot do salolot-lolotna.”

LUKAS 17:20

Jadi dung disapai halak Parise i Jesus, sanga andigan ma pajongjongon ni Debata HarajaanNia. Jadi dialusi Ia ma, “Nada adong tanda-tanda na bisa idaon ni jolma paboa na dung jongjong Harajaan Ni Debata.”

PANGARATAION 10:17

Di ginjang ni sude debata do Tuhan Debatamunu i jana Tuhan ni sasudena tuan, Debata na tongam jana na markuaso do Ia jana angkon nioloan. Nada ra Ia marpihak jana nada ra muse Ia manjagit sisip.

HALUMBAAN 1:19

Antong, suratkon ma sanga aha na niidamu, i ma angka na adong saonnari dohot angka na giot tarjadi tu pudi on.

HALUMBAAN 19:17

Dung i huida ma sahalak surusuruan jongjong di ginjang ni mataniari. Marsurak ma ia gogo tu sude unggas na habang di awang-awang, “Beta ma marlagut anso tatopot pesta godang na nipatupa ni Debata!

HALUMBAAN 4:1

Dung salpu i, huligi ma, mungkap do sada pintu di banua ginjang, jana mangkuling ma sora na dung hubege mangkatai dohot au di mulana i, songon sora ni sarune, ninna ma, “Manaek ma ho tuson jana patidahononKu ma tu ho sanga aha na giot tulus dung salpu on.”