DANIEL 12:7 - BIBEL JAMITA NA DENGGAN

⁷ Dung i hubege ma sora ni bayo na marbaju linen na jongjong di julu ni batang aek i jana diangkat ia ma tangannia siamun dohot si ambirang adop ginjang anso marsumpa ma ia tu Debata na manongtong i: Sada hatiha dua hatiha dohot satonga hatiha dung abis kuaso ni na mamparkanciti bangso na badia i, marujung muse ma angka na masa i.

DANIEL 12:7 ပူးပေါင်းရင်းမြစ်များ

JESAYA 62:12

Goaron ma halahi: ‘Bangso Ni Debata’, ‘Bangso Na Nipalua ni Tuhan’. Goaron ma Jerusalem ‘Kota na nihalungunan’, ‘Kota na so nitadingkon ni Tuhan’.

JEREMIA 4:2

baru pe anso tola hamu marsumpa mangasahon goarKu. Jadi gabe pangidoon ni sandok bangso ma anso Hupasupasu halahi, jana pujion ni halahi ma Au.”

JEHESKIEL 20:5

Palalu ma sanga aha na Hudokkon on, “Madung Hupili Israel jana Hupudun janji dohot halahi. Di Mesir, Hupapatar do Au tu halahi jana Hudok, ‘Au do Tuhan Debatamu.’

DANIEL 10:5

Hupadorgak ma bohingku jana huida ma sada halak na marpakean abit linen jana na marbobat sere na polin.

DANIEL 11:13

Padua nolihon dibaen raja ni Siria parangan na bahat, umbahat sian na parjolo i dope. Muda dung dapot hatihana, pungkaonnia ma mardalan rap dohot tentara na marsinjata na singkop i.

DANIEL 12:6

Disapai na sada ma tu na marpakean linen i, na jongjong di julu ni aek i, “Andigan dehe marujung angka hahomangan na tarjadi on?”

DANIEL 12:8

Tutu do antong sude na nidoknia i, tapi nada tarastui au. Jadi husapai ma, “Tuan, bia do ujung ni on sudena?”

DANIEL 4:31

Nada abis dope ia mangkuling di na nibegenia sora sian langit mandok, “Tangihon ma on ale Raja Nebukadnesar! Madung dibuat sian ho kuasomu songon raja.

DANIEL 4:34

“Dung salpu hatiha sipitu taon i, hupadorgak ma tu langit gabe sumuang ma torang rohangku. Jadi hupuji ma Na Gumincat i. Hupasangap jana hupagodang ma na Tongtong Mangolu i, Mamarenta noma Debata salolot-lolotna. Markuaso do Ia sapanjangna.

DANIEL 7:21

Di na huparrohahon tanduk i, marporang ma ia dohot bangso ni Debata jana ditaluhon ia do halahi.

DANIEL 7:25

Mangkuling ma ia mangalo Debata Na Gumincat i jana parkancitannia ma bangso ni Debata. Akalkononnia ma paubahon angka aturan dohot angka pesta ugamo ni halahi jana rajaannia ma halahi tolu satonga taon honokna.

DANIEL 8:14

Dung i ning ia ma tu au: “1.150 ari nari. Sai ma lolotna nada dihaulkon haul potang ari dohot haul manyogot. Dung salpu pe i anso mulak sumuang bagas paribadatan i.”

DANIEL 8:24

Mur martamba ma hagogoonnia, tapi nada sagogo ni na parjolo i. Paroonnia ma hamamago na jorbut situtu, jana sai tulus do sanga aha na nibaennia. Bunuonnia ma angka halak na gogo dohot bangso ni Debata.

LUKAS 21:14

Paputus ma di bagasan rohamu, paboa na so humolos be ho hara ni angka hata sialuskononmu.

LUKAS 21:24

Adong ma na dibunu dohot podang, adong muse ma i na dioban gabe taban tu angka luat ni halak; jana dege-degeon ni halak ma Jerusalem lopus abis hatiha na dung nitontuhon ni Tuhan i tu halahi.”

PANGARATAION 26:19

Baenon ni Tuhan dope hamu gumodang sian sasude bangso na asing na dung dijadihon Ia, jana pujion boti pasangaponna hamu. Gabe bangso ni Tuhan ma hamu, laing songon na nijanjihonNa i.”

PANGARATAION 32:36

Paluaon ni Tuhan ma bangsoNa, jana haholonganNia angka naposoNa, muda diida Ia halahi gale-gale, jana abis gogona sude.

PANGARATAION 32:40

Au do satutuna na mangolu, Au do Debata, Huangkat tanganKu laho marsumpa,

PANGARATAION 7:6

Baen hamu ma sudena i, dibaen bangso na badia di Tuhan Debatamu do hamu. Sian sasude bangso na di sisik ni tano on, hamu do na nipiliNia na gabe bangso hapunjunganNia.

1 PETRUS 2:9

Tapi anggo hamu, bangso na Hupili do hamu, angka harajaan hamalimon, bangso na badia, bangso hapunjungan ni Debata. Ia do na mamiohon hamu haruar sian hagolapan anso masuk tu bagasan sinondangNia na tumorang i, anso pararatonmunu barita taringot tu angka pambaenanNia na godang i.

HALUMBAAN 12:14

Hape madung dilehen di dadaboru i dua habong ni rajawali na godang situtu anso tarbaen ia habang tu inganannia di parhorsihan jana anso malua ia sian serangan ni naga i. Di parhorsihan i ma ia dipauli-uli sada hatiha, dua hatiha, dohot satonga hatiha.

HALUMBAAN 12:6

Gabe marlojong ma dadaboru i tu parhorsihan, i ma inganan na nipasingkop ni Debata disia. Di inganan i noma ia dipauli 1260 ari honokna.

HALUMBAAN 13:5

Dipatola do binatang i pajojorkon angka ginjang ni rohana dohot pangincahion. Dipatola do ia mamarenta opat pulu dua bulan honokna.

HALUMBAAN 4:10

manungkap ma pangituai na dua pulu opat i di jolo ni na juguk di habangsa i, marsomba tuSia na mangolu i salolot-lolotna. Dung i dipayakkon halahi ma tuku ni halahi i tu jolo ni habangsa i jana ninna halahi ma,

HALUMBAAN 4:9

Diendehon mahluk siopat-opat i ma angka logu ni ende na pasangapkon jana na marmulia dohot na mandok tarimakasi tu na juguk di habangsa i, i ma na mangolu i salolot-lolotna. Jana di na marende i angka mahluk i,